ތުރުކީގެ ކޮންޏާގައި މިހާރު ކުރިއަށްދާ އިސްލާމިކް ސޮލިޑާރިޓީ ގޭމްސްގައި ގައުމީ އަންހެން ޓީޓީ ޓީމުން ކުޅުނު ފުރަތަމަ މެޗުގައި ޖިބޫޓީ އަތުން 3-0 އިން މޮޅުވެއްޖެ އެވެ.
ކޮންޏާގެ ތުޔަޕް ފެއާ ސެންޓަރުގެ ޓީޓީ ކޯޓުގައި މިއަދު ހެނދުނު ކުޅުނު މެޗުގައި ރާއްޖޭން މޮޅުވީ ފުރަތަަމަ ކުޅުނު ދެ ސިންގަލްސް އިން ފާތިމަތު ޖުމާނާ ނިމާލް އާއި ފާތިމަތު ދީމާ އަލީ އެވެ. ފުރަތަމަ ޑަބަލްސްގައި ދީމާ އާއި އައިޝަތު ރަފާ ނާޒިމްގެ ޕެއާ ވަނީ މޮޅުވެފަ އެވެ. ރާއްޖޭގެ ތިން ގޭމް ވެސް ކާމިޔާބުކުރީ ސެޓެއް ވެސް ނުގެއްލި އެވެ.
ފުރަތަމަ ސިންގަލްސްގައި ޖުމާނާ ވަނީ 11-02، 11-09 އަދި 12-10 އިން ސެޓުތައް ގެންގޮސްފަ އެވެ. ފުރަތަމަ ސެޓުގައި ފަސޭހަކަމާ އެކު ޖުމާނާ ރަނގަޅު ލީޑަކާ އެކު ސެޓު ގެންދިޔަ ނަމަވެސް، ދެ ވަނަ ސެޓު ގެންދަން ޖެހުނީ ފަހަތުން އަރަ އެވެ. އަދި ތިން ވަނަ ސެޓުގައި ޖިބޫޓީގެ ކުޅުންތެރިޔާ، ރަނގަޅު ފައިޓެއް ދިން ނަމަވެސް ސެޓު ނިންމުމުގައި ޖުމާނާ ތަޖުރިބާގެ ބޭނުންހިފައި މޮޅުވި އެވެ.
ރާއްޖޭގެ ޖުމާނާ ކުޅުނު ސިންގަލްސް މެޗުގެ ތެރެއިން.--- ފޮޓޯ: މޯލްޑިވްސް އޮލިމްޕިކް ކޮމިޓީ/ އިސްމާއިލް ތޯރިގު
ދެ ވަނަ ސިންގަލްސްގައި ދީމާ ކުޅެން އަރައި، މާ ބޮޑު ޗެލެންޖެއް ނެތި ގޭމް ގެންދިޔަ އެވެ. އެ ގޮތުން ދީމާ ސެޓުތައް ގެންދިޔައީ 11-03، 11-07 އަދި 11-03 އިންނެވެ. ތިން ވަނަ އަށް ކުޅުނު ގޭމްގައި، ރާއްޖޭގެ އެއް ވަނަ ޕެއާ، ރަފާ އާއި ދީމާ ވަނީ 12-10، 11-06 އަދި 11-06 އިން ސެޓުތައް ގެންގޮސްފަ އެވެ. މި ގޭމުގެ ފުރަތަމަ ސެޓުގައި ޖިބޫޓީ ކުޅުންތެރިން ކޮންމެ ވެސް ވަރެއްގެ ޗެލެންޖެއް ދިނެވެ. އެކަމަކު، ރަފާ އާއި ދީމާ މެޗުގެ ޓެމްޕޯ އަށް ހޭނި ފުރަތަމަ ސެޓު ގެންގޮސް ކޮންފިޑެންސް ހޯދި އެވެ. ނަތީޖާ އަކަށް ވީ ދެން ކުޅުނު ދެ ސެޓު، ފަސޭހައިން ގެންގޮސް މެޗުން މޮޅުވުމެވެ.
ޓީޓީ އަންހެން ޓީމަށް މިއަދު އިތުރު މެޗެއް އެބައޮތެވެ. އެއީ ތުރުކީއާ ދެކޮޅަށް ކުޅޭ މެޗެވެ. ތުރުކީ ވަނީ ފުރަތަމަ މެޗުން ޔޫގާންޑާ ބަލިކޮށްފަ އެވެ. ކޮންމެ ގްރޫޕަކުން ދެ ޓީމު އަނެއް ބުރަށް ހޮވޭއިރު، ރާއްޖޭން ފުރަތަމަ މެޗުން މޮޅުވުމުން އަނެއް ބުރުގެ ފުރުސަތު އޮތީ ފަހިކޮށެވެ.
ރާއްޖޭގެ ފިިރިހެން ޓީޓީ ޓީމު ފުރަތަމަ މެޗުގައި މިއަދު ކުޅޭނީ އީރާނާ ދެކޮޅަށެވެ. އެ ގްރޫޕްގައި ދެން އޮތީ ބަންގްލަދޭޝް އެވެ.
