ދިވެހި ޕްރިމިއާ ލީގު ހޯދައިދިނުމަށް ފަހު ޖެސިކް މާޒިޔާ ދޫކޮށް ސައުދީ އަށް

Jul 25, 2022, 6:04 AM
މާޒިޔާގެ ކޯޗު ޖެސިކް: އޭނާ ވަނީ ލީގު ހޯދައިދިނުމަށް ފަހު އެ ޓީމު ދޫކޮށް ސައުދީ ލީގުގެ ކްލަބަކަށް ބަދަލުވެފައި.

މާޒިޔާގެ ކޯޗު ޖެސިކް: އޭނާ ވަނީ ލީގު ހޯދައިދިނުމަށް ފަހު އެ ޓީމު ދޫކޮށް ސައުދީ ލީގުގެ ކްލަބަކަށް ބަދަލުވެފައި.

ބާކީ ދެ މެޗު އޮއްވައި މާޒިޔާ ސްޕޯޓްސް އެންޑް ރެކްރިއޭޝަން އަށް ދިވެހި ޕްރިމިއާ ލީގުގެ ޗެމްޕިއަންކަން ހޯދައިދިން ސާބިއާގެ ކޯޗު މަޔޮޑްރަގް ޖެސިކް އެ ޓީމާ ވަކިވެ، ސައުދީ އަރަބިއްޔާގެ އެއް ވަނަ ޑިވިޝަން ކްލަބަކަށް ބަދަލުވެއްޖެ އެވެ.

މިދިޔަ ފެބްރުއަރީ މަހުގެ ކުރީކޮޅު މާޒިޔާ އިން ގެނައި ޖެސިކް ވަނީ އެ ޓީމަށް ޖެހިޖެހިގެން ތިން ވަނަ ފަހަރަށް ލީގު ޗެމްޕިއަންކަން ހޯދައިދިނުމުގައި ކާމިޔާބު ހޯދައިފަ އެވެ.

ޖެސިކް، މާޒިޔާގެ މެނޭޖްމަންޓާ މަޝްވަރާ ކުރުމަށް ފަހު، އެ ޓީމު ދޫކޮށް މިހާރު ވަނީ ސައުދީގެ އެއް ވަނަ ޑިވިޝަން އަލް ޝޯލާ އެފްސީ އަށް ބަދަލުވެފަ އެވެ. ޖެސިކްއާ އެކު އޭނާގެ ފިޓްނަސް ކޯޗު، ގޯރާން ގުޒިޖާން ވެސް ވަނީ ޝޯލާ އަށް ބަދަލުވެފަ އެވެ.

Advertisement

މާޒިޔާ އިން ވަނީ ޖެސިކް އާއި ގޯރާން އެ ކްލަބަށް ކޮށްދިން ހިދުމަތަށް ޝުކުރު އަދާކޮށްފަ އެވެ.

ޖެސިކް ހަވާލުވި ފަހުން މާޒިޔާ އިން ދިވެހި ޕްރިމިއާ ލީގުގައި ކުޅުނު 19 މެޗުގެ ތެރެއިން ބަލިވީ އީގަލްސް އަތުން އެކަންޏެވެ. އެ މެޗުތަކުގައި މާޒިޔާ އިން 76 ގޯލު ޖެހިއިރު، ބައިކޮޅަށް ވަނީ ފަސް ގޯލެވެ.

މާޒިޔާ އިން މިދިޔަ މެއި މަހު ޖެސިކްއާ އެކު އޭއެފްސީ ކަޕްގައި ވާދަކުރިއިރު، ބަންގްލަދޭޝްގެ ޗެމްޕިއަން ބަޝުންދަރާ ކިންގްސް އަތުން 1-0 އިން ބަލިވިއިރު، އިންޑިއަން ސުޕަ ލީގުގެ، އޭޓީކޭ މޯހަން ބަގާން އަތުން ބަލިވީ 5-2 އިންނެވެ. މާޒިޔާ އިން ވަނީ އޭއެފްސީ ކަޕްގައި މި ފަހަރު އިންޑިއާގެ އައި ލީގުގެ ޗެމްޕިއަން، ގޯކުލަމް ކެރަލާ 1-0 އިން ބަލިކޮށްފަ އެވެ.

ޖެސިކް (މ) އާއި ގޯރާން (ކ) ސައުދީގެ އަލް ޝޯލާ އެފްސީއާ ގުޅުމަށް އެ ގައުމަށް ދިއުމަށް ފަހު،

ޖެސިކް ކޯޗިން ކެރިއަރު ފެށީ 1997 ވަނަ އަހަރު ސާބިއާގެ ރެޑްނިކީ އިންނެވެ. އޭގެ ފަހުން ސާބިއާގެ އޯއެފްކޭ ބިއޮގްރަޑާއި ޕާޓީޒަން އަށް ކޯޗުކޮށްދީފައިވެ އެވެ. ދެން، ޓިއުނީޝިއާގެ ސީއެސް ސްފަޒިއޭންއާ ހަވާލުވެ، އެއް އަހަރު އެ ޓީމަށް އިރުޝާދުދިނެވެ. ތުރުކީގެ އަލްޓޭ އަށް ކުރު މުއްދަތެއްގައި ކޯޗުކޮށްދީ 2002-2004 އަށް ޖެސިކް ފެނުނީ ބަލްގޭރިއާގެ ސްލޯވިއާ ސޯފިއާ އިންނެވެ. ޖެހިގެން އައި އަހަރު އީރާންގެ ޕެގާ ގިލާން އަށް ކޯޗުކޮށްދިނުމަށް ފަހު ދެން ޖެސިކް ފެނުނީ ބަލްގޭރިއާގެ ޗެމްޕިއަން ސީއެސްކޭއޭ ސޯފިއާ އިންނެވެ.

މިދިޔަ 15 ވަރަކަށް އަހަރަށް ބަލާއިރު، ޖެސިކް ވަނީ އީރާނާއި ޔޫއޭއީ، މޮންޓެނެގްރޯ، ޗައިނާ، ލީބިޔާ، މިޔަންމާ އަދި ސައުދީ އަރަބިއްޔާގައި ކޯޗިންގެ މަސައްކަތްތަކެއް ކޮށްފަ އެވެ. ލީބިޔާގެ އަލް އަހްލީގައި އެންމެ ފަހުން ހުރި، ޖެސިކް އޭގެ ކުރިން ވަނީ އެ ގައުމުގެ އަލް ތަހަދީ އާއި އަލް އިއްތިހާދުގައި ވެސް ކޯޗެއްގެ ގޮތުގައި މަސައްކަތްކޮށްފަ އެވެ.

ކޯޗިންގައި ޖެސިކްގެ ކާމިޔާބީތަކަށް ބަލާއިރު، އީރާނުގެ ސްފަޒިއޭން އަށް 2000 ވަނަ އަހަރު އަރަބް ޗެމްޕިއަންސް ލީގު ކާމިޔާބު ކޮށްދިނެވެ. ސީއެސްކޭއޭ ސޯފިއާ އަށް ބަލްގޭރިއާ ލީގާއި ކަޕް 2005 އާއި 2006 ވަނަ އަހަރު ކާމިޔާބު ކޮށްދިނެވެ. އޭގެ ފަހުން ބަލްގޭރިއާގެ ލިޓެކްސް ލޮވެކަށް ބަލްގޭރިއާ ސުޕަ ކަޕާއި ބަލްގޭރިއާ ކަޕް ކާމިޔާބު ކޮށްދިނެވެ.

ލީބިޔާގެ އަލް-އިއްތިހާދާ ހަވާލުވެހުރިއިރު، ޖެސިކް ވަނީ އެ ޓީމަށް ލީބިޔަން ޕްރިމިއާ ލީގު 2009 އާއި 2010 ވަނަ އަހަރު ކާމިޔާބުކޮށްދިނުމުގެ އިތުރުން ލީބިޔަން ކަޕް 2009 ވަނަ އަހަރު އަދި ލީބިޔަން ސުޕަ ކަޕް 2009 އާއި 2010 ވަނަ އަހަރު ކާމިޔާބުކޮށްފަ އެވެ. މީގެ އިތުރުން މިޔަންމާގެ ޔަންގޮން ޔުނައިޓެޑަށް 2015 ވަނަ އަހަރު އެ ގައުމުގެ ލީގު ޗެމްޕިއަންކަން ހޯދައިދިނެވެ.

ކޯޗިން ކެރިއަރުގައި ޖެސިކްގެ އެންމެ ހާއްސަ އެއް މެޗަކީ 2005 ވަނަ އަހަރުގެ ޗެމްޕިއަންސް ލީގުގެ ކޮލިފައިންގައި ބަލްގޭރިއާގެ ސީއެސްކޭއޭ ސޯފިއާ ގޮވައިގެން ނުކުމެ ލިވަޕޫލް ދަނޑުގައި 1-0 އިން މޮޅުވުމެވެ. ސޯފިއާ ދަނޑުގައި ލިވަޕޫލް ފުރަތަމަ ލެގުގައި މޮޅުވެފައިވަނިކޮށް، ޖެސިކްގެ ކޯޗުކޮށްދީގެން ދެ ވަނަ ލެގުގައި ލިވަޕޫލްގެ އެންފީލްޑްގައި ސޯފިއާ ވަނީ މޮޅުވެފަ އެވެ.

މާޒިޔާ، ފުރަތަމަ ޑިވިޝަންގައި 2006 އިން ފެށިގެން ވާދަކުރަން ފެށި ފަހުން އެ ޓީމުގައި ޖުމްލަ ހަތް ކޯޗުން ވަނީ އެކި ފަހަރު މަތިން މަސައްކަތް ކޮށްފަ އެވެ. އޭގެ ތެރޭގައި ހިމެނެނީ ދިވެހި ހަަތަރު ކޯޗުން ކަމަށްވާ އިސްމާއިލް މަހަފޫޒް (އިންމަ)، އަލީ ސުޒޭން، މުހައްމަދު ނިޒާމް (ނިޒާމްބެ) އަދި މުހައްމަދު ޝިޔާޒް (މޯހަން)ގެ އިތުރުން ބިދޭސީ ކޯޗުން ކަމަށްވާ، މެސެޑޯނިއާގެ މަރުޖާން ސެކުލޮސްކީ، ސާބިއާގެ ރިސްޓޯ ވިޑަކޮވިޗް އަދި ޖެސިކް އެވެ.

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox