މާޒިޔާ ބަލިކޮށް އޭޓީކޭ މޯހަން ބަގާން އަނެއް ބުރަށް

މާޒިޔާގެ ސަމުއްޓެ (ކ) ކައިރިން އޭޓީކޭ މޯހަން ބަގާންގެ ރޯއީ ކްރިޝްނާ ބޯޅަ ހިފައިގެންދަނީ.-- ފޮޓޯ: އޭޓީކޭ މޯހަން ބަގާން

މާޒިޔާގެ ސަމުއްޓެ (ކ) ކައިރިން އޭޓީކޭ މޯހަން ބަގާންގެ ރޯއީ ކްރިޝްނާ ބޯޅަ ހިފައިގެންދަނީ.-- ފޮޓޯ: އޭޓީކޭ މޯހަން ބަގާން

އޭއެފްސީ ކަޕްގެ ދެކުނު އޭޝިއާގެ ޓީމުތައް ވާދަކުރާ ގްރޫޕްގައި މިރޭ ކުޅުނު މެޗުން އޭޓީކޭ މޯހަން ބަގާން އިން 5-2 އިން މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް ޖެހިޖެހިގެން ދެ ވަނަ ފަހަރަށް އިންޓަ ޒޯން ޕްލޭއޮފް ސެމީ ފައިނަލުން ފުރުސަތު ހޯދައިފި އެވެ.

މި ގްރޫޕްގައި މިއަދު ހަވީރު، ކުޅުނު މެޗުން ގޯކުލަމް ކެރަލާ އެފްސީ އަތުން 2-1 އިން ބަޝުންދަރާ ކިންގްސް މޮޅުވުމާ އެކު މާޒިޔާ މިރޭގެ މެޗަށް ނުކުތުމުގެ ކުރިން ވަނީ ކަޓައިފަ އެވެ. މާޒިޔާ އިން އޭޓީކޭ މޯހަން ބަގާން އިން މޮޅުވިޔަނުދިންނަމަ އިންޓަ ޒޯން ޕްލޭއޮފް ސެމީން ފުރުސަތު ލިބޭނީ ބަޝުންދަރާ އަށެވެ. އެކަމަކު، އޭޓީކޭ މޯހަން ބަގާނުން ވަނީ އަމިއްލަ ސަޕޯޓަރުންގެ ކުރިމަތީގައި މޮޅުވެފަ އެވެ.

ގްރޫޕް ޑީގެ އެއް ވަނަ އަށް ދިޔަ އޭޓީކޭ މޯހަން ބަގާން އާއި ދެ ވަނަ އަށް ދިޔަ ބަޝުންދަރާ އަށް ލިބުނީ ހަ ޕޮއިންޓެވެ. އޭޓީކޭ އަށް ކުރި ލިބުނީ ހެޑް ޓު ހެޑް ގަވާއިދުންނެވެ. ތިން ވަނައިގައި ނިންމާލި މާޒިޔާ އާއި ފުލުގައި އޮތް ގޯކުލަމް އަށް ވެސް ވަނީ ތިން ޕޮއިންޓް ލިބިފަ އެވެ. މާޒިޔާ އަށް ކުރި ލިބުނީ ވެސް ހެޑް ޓު ހެޑް ގަވާއިދަށް ބަލައިގެންނެވެ.

ގްރޫޕްގެ ތިން މެޗުގައި ވެސް މާޒިޔާ އިން ބޭނުންކުރީ އެއް ފުރަތަމަ އެގާރަ އެކެވެ. ފުރަތަމަ މެޗުގައި ހަސަން ޝިފާޒް (ޑުންގާ) ކެޕްޓަންކުރި ނަމަވެސް ފަހު ދެ މެޗުގައި ބޭންޑް އެޅީ ސަމޫހު އަލީ (ސަމުއްޓެ) އެވެ.

އޭޓީކޭ މޯހަން ބަގާންގެ ފުރަތަަމަ ދެ ގޯލު ޖެހީ ކައުކޯ: އޭނާ އަކީ މިދިޔަ އަހަރު ޔޫރޯގައި ފިންލެންޑް ގައުމީ ޓީމަށް ކުޅުނު ކުޅުންތެރިއެއް.-- ފޮޓޯ: އޭޓީކޭ މޯހަން ބަގާން

ސޯލްޓް ލޭކް ސްޓޭޑިއަމްގައި މިރޭ ކުޅުނު މެޗު ފަށައިގެން 16 ވަނަ މިނިޓްގައި މާޒިޔާގެ ހަމްޒާ މުހައްމަދު (ހަމްޕު) އަށް ރަނުގެ ފުރުސަތެއް ލިބުނެވެ. އިބްރާހިމް އައިސަމް ހުސްކޮށްލާފައި ހަމްޕު އަށް ދިން ބޯޅަ ހިފައިގެން އޭރިއާތެރެއަށް ވަދެ، އޭނާ ފޮނުވާލި ބޯޅަ ދިޔައީ އަރިމަތިން ބޭރުންނެވެ. އޭޓީކޭ މޯހަން ބަގާންގެ ކެޕްޓަން، ފިޖީ ގައުމީ ޓީމުގެ ފޯވާޑް، ރޯއީ ކްރިޝްނާ މެޗުގެ 21 ވަނަ މިނިޓްގައި ޖެހި ޝޮޓް ވަނީ މާޒިޔާ ޑިފެންޑަރުން ބްލޮކްކޮށްފަ އެވެ.

މެޗު ފަށައިގެން ރަނގަޅަށް ކުޅެމުން ދިޔަ މާޒިޔާ އިން މެޗުގެ 23 ވަނަ މިނިޓްގައި އައިސަމް ޖެހި ބޯޅަ ދިޔައީ އަރިމަތިން ބޭރުންނެވެ. އޭރިއާ ރޮނގުކައިރިން ޖާގަ ހުސްކޮށްލުމަށް ފަހު އަައިސަމް ރަނގަޅު ވަގުތުގައި ބޯޅަ ފޮނުވާލި ނަމަވެސް ގޯލާ ސީދާވާގޮތެއްނުވި އެވެ.

އޭގެ ތިން މިނިޓް ފަހުން އޭޓީކޭ މޯހަން ބަގާން އިން ވަނީ ލީޑުނަގައިފަ އެވެ. މެޗުގެ 26 ވަނަ މިނިޓްގައި މާޒިޔާގެ ގޯލުގައި ހުރި ނޭޕާލް ގައުމީ ޓީމުގެ ކީޕަރު ކިރަން ކުމާރް ލިމްބޫ ޖެހި ބޯޅައެއް ލިބުނީ ހުސްކޮށް ހުރި، އޭޓީކޭ މޯހަން ބަގާންގެ ފިންލެންޑް ގައުމީ ޓީމަށް ކުޅޭ މިޑްފީލްޑަރު ޖޯނީ ކައުކޯ އަށެވެ. އޭނާ ވަނީ ހަމަޖެހިލާފައި ގޯލުގެ ކަނަށް ބޯޅަ ފޮނުވާލައިފަ އެވެ.

އޭގެ 10 މިނިޓް ފަހުން، މެޗުގެ 36 ވަނަ މިނިޓްގައި ކައުކޯ ވަނީ ދެ ވަނަ ގޯލެއް ޖަހައި، އޭޓީކޭ މޯހަން ބަގާން އަށް ލީޑުފުޅާކޮށްދީފަ އެވެ. މިއީ އޭޓީކޭ މޯހަން ބަގާންގެ ފޯވާޑް މަންވީރު ސިންގް ބޮލުން ޖައްސާލި ބޯޅައެއް ހިފައިގެން އޭރިއާތެރެއަށް ވަދެ ކައުކޯ ޖެހި ގޯލެކެވެ. ދެ ބޯޅައިގައި ވެސް ކީޕަރު ކިރަންގެ ގޯސް ފާހަގަކުރެވުނެވެ.

އޭޓީކޭ މޯހަން ބަގާންގެ ލިސްޓަން (ކ) އަތުން ބޯޅަ ހޯދަން މާޒިޔާގެ ސަމޫހު ޓެކަލްކުރަނީ.-- ފޮޓޯ: އޭޓީކޭ މޯހަން ބަގާން

މާޒިޔާ އިން ވަނީ ފުރަތަމަ ހާފު ނިމުމުގެ ކުރިން ގޯލެއް ޖަހައިފަ އެވެ. މިއީ މެޗުގެ 45 ވަނަ މިނިޓްގައި ސްޕެއިނުގެ މިޑްފީލްޑަރު ޓަނާ ޑޮމިންގޭޒް ޖެހި ގޯލެކެވެ. މެދުތެރެއިން އޭޓީކޭ މޯހަން ބަގާންގެ މިޑްފީލްޑަރު ދީޕަކް ތަންގްރީ އަތުން ގެއްލުނު ބޯޅައެއް ހިފައިގެން މާޒިޔާގެ ސެއިންޓް ވިންސެންޓްގެ ފޯވާޑް ކޮނޭލިއަސް ސްޓެވާޓް (ކޯނޭ) އޭރިއާތެރެއިން، ހުސްކޮށްލާފައި ޓަނާ އަށް ދިން ބޯޅަ އޭނާ ވަނީ ގޯލުގެ ތިރީ ކަނަށް އަމާޒުކޮށްލައިފަ އެވެ.

ދެ ވަނަ ހާފްގެ ކުޅުން ފަށައިގެން 10 މިނިޓްގެ ތެރޭގައި އޭޓީކޭ މޯހަން ބަގާން އިން ވަނީ ތިން ވަނަ ގޯލެއް ޖަހައިފަ އެވެ. މެޗުގެ 55 ވަނަ މިނިޓްގައި އޭޓީކޭ މޯހަން ބަގާންގެ ފުލްބެކް، ސުބަޝިޝް ބޯސް ނެގި ހުރަހެއް އޭރިއާތެރެއިން ކޮންޓްރޯލް ކުރުމަށް ފަހު ރޯއީ ކްރިޝްނާ ވަނީ ގޯލުގެ މަތީ ކަނަށް ބޯޅަ ފޮނުވާލައިފަ އެވެ. އޭގެ ދެ މިނިޓް ފަހުން އޭޓީކޭ މޯހަން ބަގާން އިން ވަނީ ހަތަރު ވަަނަ ގޯލު ޖަހައިފަ އެވެ. މިއީ ހިލޭ ޖެހުމަކުން ލިސްޓަން ކޮލާސޯ ނެގި ހުރަހަކުން ސުބަޝިޝް ޖެހި ގޯލެކެެވެ. ސުބަޝިޝް ޖެހި ބޯޅަ ގޯލަށް ވަނީ ކީޕަރު ކިރަން އަތުގައި ޖެހިފަ އެވެ. އެއީ އާންމު ގޮތެއްގައި ކީޕަރު ކިރަން ފަސޭހަކަމާ އެކު ނަގާ ބޯޅައެކެެވެ. އެކަމަކު، މި ފަހަރު ސުބަޝިޝް ޖެހި ބޯޅަ ކިރަން އަތުގައި ޖެހިފައި ވަނީ ގޯލަށެވެ.

އޭޓީކޭ މޯހަން ބަގާން އިން ފަސް ވަނަ ގޯލު ޖެހީ މެޗުގެ 71 ވަނަ މިނިޓްގަ އެވެ. މިއީ ކާލް މެކްހިއު ޖެހި ބޯޅައެއް މާޒިޔާގެ ޑިފެންޑަރެއް ފައިގައި ޖެހިފައި ވަން ގޯލެކެވެ. އޭގެ ދެ މިނިޓެއް ފަހުން މާޒިޔާ އިން ވަނީ ދެ ވަނަ ގޯލެއް ޖަހައިފަ އެވެ. މިއީ، މެޗުގެ 73 ވަނަ މިނިޓްގައި ކޯނޭ ނެގި ހުރަަހަކުން ޓަނާ ބޮލުން ޖެހި ގޯލެކެވެ. އެ ބޯޅަ ގޯލަށް ވަންއިރު، ކީޕަރު އާޝް އަންވަރަށް ބޯޅަ ހުއްޓުވަން މާ ބޮޑު ކަމެއް ނުކުރެވުނެވެ.

ބަދަލަކަށް ކުޅެން އެރި އޭޓީކޭ މޯހަން ބަގާންގެ ލެނީ ރޮޑްރިގޭސް މެޗުގެ 79 ވަނަ މިނިޓްގައި ޖެހި ބޯޅަ ކީޕަރު ކިރަން ވަނީ މަތަކޮށްފަ އެވެ. އޭގެ ދެ މިނިޓް ފަހުން އޭރިއާތެރެއިން، ރޯއީ ކްރިޝްނާ ޖެހި ބޯޅައެއް ވަނީ ގޯލުގެ ދަނޑިއަށް އަމާޒުވެފަ އެވެ. މެޗުގެ ފަހު ކޮޅުގައި ލިސްޓަން އާއި ޑޭވިޑް ވިލިއަމްސް ޖެހި ގޯލުތަކެއް ވަނީ އޮފްސައިޑްވެފަ އެވެ.

މި މެޗު ބަލަން ސޯލްޓް ލޭކް ސްޓޭޑިއަމަށް ވަނީ 33،735 ސަޕޯޓަރުން ވަދެފަ އެވެ. މި ދަނޑަކީ 85،000 މީހުންގެ ޖާގައިގެ ސްޓޭޑިއަމެކެވެ.

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox