އޭއެފްސީ ކަޕްގެ ދެކުނު އޭޝިއާގެ ޓީމުތައް ވާދަކުރާ ގްރޫޕް ޑީގައި މިއަދު ހަވީރު ކުޅުނު މެޗުގައި ގޯކުލަމް ކެރަލާ އެފްސީ އަތުން 2-1 އިން ބަޝުންދަރާ ކިންގްސް މޮޅުވެ، އިންޓަ ޒޯން ޕްލޭއޮފް ސެމީ ފައިނަލަށް ދިއުމުގެ އުންމީދު ދަމަހައްޓައިފި އެވެ.
ބަޝުންދަރާގެ މި މޮޅާ އެކު ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނަށް ވަނީ އިންޓަ ޒޯން ޕްލޭއޮފް ސެމީ ފައިނަލަށް ދަތުރުކުރުމުގެ ދޮރު ބަންދުވެފަ އެވެ. މާޒިޔާ އިން މިރޭ އޭޓީކޭ މޯހަން ބަގާން އާ ދެކޮޅަށް ކުޅޭއިރު، އެ މެޗުން މޮޅުވިޔަސް ހެޑް ޓު ހެޑް ގަވާއިދަށް ބަލާއިރު އެއް ވަނަ ނުލިބޭނެ އެވެ. އެއީ ބަޝުންދަރާ އަތުން މާޒިޔާ ބަލިވެފައިވާތީ އެވެ. މާޒިޔާ އިން މިރޭ އޭޓީކޭ ބަލިކޮށްފިނަމަ ނޫނީ މެޗު އެއްވަރުކޮށްފިނަމަ ބަޝުންދަރާ އަށް އިންޓަ ޒޯން ޕްލޭއޮފް ސެމީ ފައިނަލްގެ ޖާގަ ލިބޭނެ އެވެ. އޭޓީކޭ އަށް އަނެއް ބުރަށް ދެވެން އޮތީ މިރޭ މޮޅުވެގެންނެވެ.
ގްރޫޕް ޑީގެ އެއް ވަނައިގައި ބަޝުންދަރާ އޮތީ ތިން މެޗުން ހަ ޕޮއިންޓާ އެކު އެވެ. ދެ ވަނައިގައި އޮތީ ދެ މެޗުން ތިން ޕޮއިންޓާ އެކު އޭޓީކޭ މޯހަން ބަގާން އެވެ. ތިން ވަނައިގައި އޮތީ ދެ މެޗުން ތިން ޕޮއިންޓާ އެކު މާޒިޔާ އެވެ. އަދި ފުލުގައި އޮތީ ތިން މެޗުން ތިން ޕޮއިންޓާ އެކު ގޯކުލަމް ކެރަލާ އެވެ.
ސޯލްޓް ލޭކް ސްޓޭޑިއަމްގައި މިއަދު ހަވީރު ކުޅުނު މެޗު ފަށައިގެން ބަޝުންދަރާ އިން ބޯޅަ ހިފަހައްޓައިގެން ކުރިއަށް ޖެހި، ގޯލެއް ޖެހޭތޯ މަސައްކަތް ކުރަމުންދިޔަ އެވެ. ގޯކުލަމް އިން ވެސް ލިބޭ ބޯޅަތަކުގައި އަވަސް ޕާސްތަކެއް ކުރުމަށް ފަހު އެޓޭކަކަށް ބަދަލުކޮށްލެވޭތޯ ބަލަމުންދިޔަ އެވެ.
މެޗުގެ ދެ ވަނަ މިނިޓްގައި ބަޝުންދަރާގެ ކެޕްޓަން، ބްރެޒިލްގެ ފޯވާޑް، ރޮބީނިއޯ ޖެހި ޝޮޓް ދިޔައީ ގޯކުލަމް ކުޅުންތެރިއަކު ފައިގައި ޖެހިފައި ބޭރަށެެވެ. މެޗުގެ ފަސް ވަނަ މިނިޓްގައި ގޯކުލަމްގެ ޖިތިން އަށް މުޅިން ހުސްކޮށް ލިބުނު ފުރުސަތަކުން އޭނާ ޖެހި ބޯޅަ ދިޔައީ އަރިމަތިން ބޭރުންނެވެ.
ގޯކުލަމްގެ ޖިތިން (ކ) ކައިރިން ބަޝުންދަރާގެ މަހުބޫބު ބޯޅަ ހިފައިގެންދަނީ.-- ފޮޓޯ: ގޯކުލަމް މީޑިއާ
ބަޝުންދަރާ އިން ފުލުފުލުގައި ހަމަލާތައް އުފައްދަމުންދިޔައިރު، މެޗުގެ 22 ވަނަ މިނިޓްގައި ބަޝުންދަރާގެ ބްރެޒިލް މިޑްފީލްޑަރު މިގޭލް ފެރޭރާ ޖެހި ބޯޅަ ދިޔައީ ބޭރުންނެވެ. އޭގެ ތިން މިނިޓް ފަހުން ގޯކުލަމް އޭރިއާތެރެއިން ރޮބީނިއޯ ޖެހި ބާރު ބޯޅަ ގޯކުލަމް ކީޕަރު، ރަކްޝިތު ދާގަރު ވަނީ މަތަކޮށްފަ އެވެ. އެކަަމަކު، މެޗުގެ 36 ވަނަ މިނިޓްގައި ރޮބީނިއޯ ވަނީ ބަޝުންދަރާ އަށް ލީޑުނަގައިދީފަ އެވެ. ގޯކުލަމްގެ ދެ ޑިފެންޑަރުން ކައިިރިން ދެމިގަތުމަށް ފަހު ރޮބީނިއޯ ޖެހި ބޯޅަ އަމާޒުވީ ގޯލުގެ މަތީ ކަނަށެވެ. އޭގެ މިނިޓެއް ފަހުން ދެ ވަނަ ލަނޑެއް ޖަހަން ރޮބީނިއޯ ޖެހި ބޯޅަ ދިޔައީ ހުރަސްދަނޑިމަތިންނެވެ.
ފުރަތަމަ ހާފު ނިމުމުގެ ކުރިން ނަތީޖާ ހަމަހަމަކުރަން ގޯކުލަމްގެ ސްރީކުއްތާން ޖެހި ބޯޅަ ބަޝުންދަރާގެ ކީޕަރު އަނީސުރް ރަހްމާން ޒީކޯ ވަނީ މަތަކޮށްފަ އެވެ.
ބަޝުންދަރާ އިން ވަނީ ދެ ވަނަ ހާފްގެ ކުޅުން ފެށިގެން ނުވަ ވަނަ މިނިޓްގައި ދެ ވަނަ ގޯލެއް ޖަހައިފަ އެވެ. މިއީ މެޗުގެ 54 ވަނަ މިނިޓްގައި ގެމްބިއާގެ ފޯވާޑް ނުހާ މުރޮންގް ޖެހި ގޯލެކެވެ. އަރިމަތިން ރޮބީނިއޯ ނެގި ހުރަހަކުން ނުހާ މި ގޯލު ޖެހީ ބޮލުންނެވެ. މާޒިޔާ އަތުން ފުރަތަމަ މެޗުގައި ބަޝުންދަރާ މޮޅުކޮށްދިން ގޯލު ޖެހީ ވެސް ނުހާ އެވެ.
މެޗުގެ 62 ވަނަ މިނިޓްގައި ގޯކުލަމް އިން ވަނީ ރަނގަޅު އެޓޭކެއް ކޮށްފަ އެވެ. އެ ގޮތުން ހިލޭ ޖެހުމަކުން ގޯކުލަމްގެ ކެޕްޓަން، އަފްގާނިސްތާންގެ މިޑްފީލްޑަރު މުހައްމަދު ޝަރީފް ނެގި ބޯޅަ އެ ޓީމުގެ ކެމަރޫން ޑިފެންޑަރު ބައުބާ އަމީނޯ ބޮލުންޖެހިިއިރު، އަމާޒުވީ އަރިމަތީ ދާގަނޑަށެވެ.
ބަދަލުތަކެއް ގެނެސްގެން ގޯކުލަމް ކެރަލާ އިން ގޯލެއް ޖެހޭތޯ ކުރި މަސައްކަތް މެޗުގެ 75 ވަނަ މިނިޓްގައި ކާމިޔާބުކުރި އެވެ. ބަދަލަކަށް ކުޅެން އެރި ޖާސިމް އަރިމަތިން ނެގި ހުރަހެއް އޭރިއާތެރެއިން ކޮންޓްރޯލް ކުރުމަށް ފަހުު ގޯކުލަމްގެ ޖެމެއިކާ ފޯވާޑް، ޖޯޑެން ފްލެޗާ ވަނީ ގޯލުގެ ތިރީ ކަަނަށް ބޯޅަ ފޮނުވާލައިފަ އެވެ.
މެޗުގެ 89 ވަނަ މިނިޓްގައި ފްލެޗާ ވަނީ ނަތީޖާ ހަމަހަމަ ކުރުމާ ގާތަށް ޖެހިލައިފަ އެވެ. ހިލޭ ޖެހުމަކުން ފްލެޗާ ޖެހި ބާރު ބޯޅަ ކީޕަރު އަނީސުރް އަތުގައި ޖެހިފައި ބޭރުވީ ހުރަސްދަނޑީގައި ވެސް ޖެހިފަ އެވެ. އިތުރު ވަގުތުގެ ގޮތުގައި ދެއްްކި ފަސް މިނިޓްގެ ތެރޭގައި ބަޝުންދަރާގެ ރޮބީނިއޯ ޖެހި ބޯޅައެއް ގޯކުލަމްގެ ޑިފެންޑަރުން ވަނީ ބްލޮކްކޮށްފަ އެވެ.
