ބޮޑު ބަޖެޓެއް އޮތުމަކީ ކާމިޔާބު ޔަގީންވުމެއް ނޫން: ކެރަލާ ކޯޗު

ގޯކުލަމް ކެރަލާގެ ކޯޗު ވިންޗެންޒޯ އަލްބާޓޯ.-- ފޮޓޯ: ގޯކުލަމްކެރަލާ މީޑިއާ

ގޯކުލަމް ކެރަލާގެ ކޯޗު ވިންޗެންޒޯ އަލްބާޓޯ.-- ފޮޓޯ: ގޯކުލަމްކެރަލާ މީޑިއާ

އޭއެފްސީ ކަޕްގައި މާދަމާ ހަވީރު ގޯކުލަމް ކެރަލާ އިން ކުޅެން ޖެހޭ އޭޓީކޭ މޯހަން ބަގާން އަކީ ބޮޑު ބަޖެޓެއް އޮތް މުއްސަނދި ކްލަބެއް ކަމަށާއި އެކަމަކު، އޭގެ މާނަ އަކީ އެ ޓީމަށް ކާމިޔާބީ ޔަގީންވުމެއް ނޫން ކަމަށް ފާއިތުވި ދެ އަހަރު އިންޑިއާގެ އައި ލީގުގެ ޗެމްޕިއަންކަން ގޯކުލަމް ކެރަލާ އަށް ހޯދައިިދިން އިޓަލީގެ ކޯޗު ވިންޗެންޒޯ އަލްބާޓޯ ބުނެފި އެވެ.

އިންޑިއާގެ ފުޓްބޯޅައިގެ ފޯރިގަދަ ސަރަހައްދެއް ކަމަށްވާ ކަލްކަތާގެ މަޝްހޫރު ސޯލްޓް ލޭކް ސްޓޭޑިއަމްގައި މި ފަހަރުގެ އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް ސެންޓްރަލައިޒްކޮށް ކުރިއަށްދާއިރު، މިއަދު ވަނީ ފުރަތަމަ މެޗުތަކުގެ ކުރިން ނޫސްވެރިންގެ ބައްދަލުވުން ބާއްވައިފަ އެވެ.

ފާއިތުވި ދެ އަހަރު އައި ލީގުގެ ޗެމްޕިއަންކަން ހޯދި ގޯކުލަމް ކެރަލާ ޓީމު މާދަމާ ހަވީރު ކުޅޭނީ އިންޑިއަން ސުޕަ ލީގުގެ ތިން ވަނަ ޓީމު، އޭޓީކޭ މޯހަން ބަގާން އެވެ. އޭޓީކޭ އަކީ މިިދިޔަ ފަހަރު އޭއެފްސީ ކަޕްގައި ދެކުނު އޭޝިއާގެ ގްރޫޕް ކާމިޔާބުކުރި ޓީމެވެ. މި ފަހަރުގެ މުބާރާތުގެ ދެކުނު އޭޝިއާ ގްރޫޕް ހޯސްޓްކުރަނީ އޭޓީކޭ ކަމަށްވާއިރު، ފޭވަރިޓުންގެ ގޮތުގައި ވެސް ގިނަ ބަޔަކު ދެކެނީ އެ ޓީމެވެ.

Advertisement

"މި ދެ ޓީމުގެ ފަރަގުގެ ވާހަކަ ދެއްކިދާނެ. އޭޓީކޭގެ އެބައޮތް ބަޖެޓެއް. އެ މީހުންގެ އެއް ކުޅުންތެރިއަކުގެ އަގަކީ އަހަންނާއި މި މުޅި ޓީމުގެ އަގޭ ވެސް ބުނެވިދާނެ. ފުޓްބޯޅައިގައި މި އޮންނަނީ ބަޖެޓްގެ މޮޅު ކަމެއް ނޫން. ދަނޑުމަތީގައި 11 ކުޅުންތެރިންނާއި 11 ކުޅުންތެރިންގެ ވާދަވެރިކަމެއް. އަހަރެމެން ކުޅުންތެރިން ނުކުންނާނީ އައި ލީގާއި ސުޕަ ލީގުގެ ފަރަގަށް ވިސްނައިގެނެއް ނޫން، ދެ ޓީމުގެ ލެވަލަށް ވެސް މި ވަގުތު ނުބަލަން،" ކުރިން ފަލަސްތީނާއި އިންޑޮނީޝިއާގެ ކްލަބަކަށް ކޯޗުކޮށްދިން ވިންޗެންޒޯ ބުންޏެވެ.

"ވަރަށް ސާފުކޮށް ބުނަން، ބަލިނުވާން ނޫނީ އެއްވަރުކޮށްލަން އެހެނެއް ނޫން ކުޅޭނީ، ގޯކުލަމް (ކެރަލާ) ނުކުންނާނީ މޮޅުވާން،"

ގޯކުލަމް ކެރަލާ އާއި އޭޓީކޭގެ އިތުރުން ދެން އޭއެފްސީ ކަޕްގެ ދެކުނު އޭޝިއާގެ ގައުމުތަކަށް ހާއްސަ ގްރޫޕް ޑީގައި އޮތީ ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާއި ބަންގްލަދޭޝްގެ ޗެމްޕިއަން ބަޝުންދަރާ ކިންގްސް އެވެ.

މި ވަގުުތު ފެންނަ ފެނުމަށް އެންމެ ރަނގަޅަށް އޮތީ ކޮން ޓީމެއްތޯ ވިންޗެންޒޯ ގާތުގައި އެހުމުން އޭނާ ބުނީ މިއީ ޓީމުތައް ގިންތި ކޮށްފައި ވާހަކަ ދައްކަން އެންމެ ރަނގަޅު ވަގުތު ކަމަށް ނުވެދާނެ ކަމަށާއި މެޗެއް ކުުޅުމަށް ފަހު އެ ސުވާލަށް ޖަވާބު ދެވޭނެ ކަމަށެވެ.

ގޯކުލަމް ޓީމުގައި ހިމެނޭ ބިދޭސީ ކުޅުންތެރިންނަށް ބަލާއިރު، މާޒިޔާ އަށް ކުރިން ކުޅުނު އަފްގާނިސްތާން ގައުމީ ޓީމުގެ މުހައްމަދު ޝަރީފްގެ އިތުރުން ސްރީ ލަންކާ ގައުމީ ޓީމުގެ ފޯވާޑް ވަސީމް ރަޒީކް ހިމެނެ އެވެ. ވަސީމް ވަނީ މިދިޔަ ނޮވެމްބަރު މަހު ރާއްޖެ ކޮޅަށް ފޯ ނޭޝަންސް ކަޕްގައި ހަތަރު ގޯލު ޖަހައިފަ އެވެ.

ސްޕެއިންގެ ކޯޗު ފެރާންޑޯ: އޭނާ ގޯއާ ޓީމު ދޫކޮށް އޭޓީކޭއާ ހަވާލުވީ މިދިޔަ އަހަރު ޑިސެމްބަރު މަހު.

ފޭވަރިޓޭ ބުނާތީ ހިތްހަމަޖެހުނަސް އޭޓީކޭ އިން ބުނަނީ ފަސޭހަނުވާނެ ކަމަށް

އޭޓީކޭ އަކީ މި ފަހަރުގެ އޭއެފްސީ ކަޕަށް ކޮލިފައިން ބުރުން އައި ޓީމެވެ. ކޮލިފައިން ބުރުގައި އޭޓީކޭ އިން ވަނީ ކޮލިފައިން ފުރަތަމަ މެޗުގައި، ސްރީ ލަންކާގެ ބްލޫ ސްޓާ 5-0 ބަލިކުރުމަށް ފަހު ޕްލޭއޮފްގައި ބަންގްލަދޭޝްގެ ޑާކާ އަބަހާނީ އަތުން 3-1 އިން މޮޅުވެފަ އެވެ.

މިދިޔަ އަހަރު އޭޓީކޭ އިން އޭއެފްސީ ކަޕްގެ ދެކުނު އޭޝިއާގެ ގްރޫޕްގެ އެއް ވަނަ ހޯދިއިރު ކޯޗަކަށް ހުރީ ސްޕެއިންގެ ތަޖުރިބާކާރު ކޯޗު އެންޓޯނިއޯ ލޮޕޭޒް ހަބާސް އެވެ. މިދިޔަ އަހަރު ގޯއާ ކްލަބްގެ ކޯޗަކަށް ހުރި ޖުއާން ފެރާންޑޯ ވަނީ މިދިޔަ ޑިސެމްބަރު މަހު އޭޓީކޭއާ ހަވާލުކޮށްފަ އެވެ.

ބާސެލޯނާ އަށް އުފަން، ފެރާންޑޯ ބުނީ އޭނާގެ ޓީމަކީ މި ފަަހަރުގެ ގްރޫޕްގެ ހޯސްޓް ކަމަށާއި އެއީ ފޭވަރިޓޭ ބުނާތީ ހިތްހަމަޖެހޭ ކަމަށެވެ. އެކަމަކު، ގަބޫލުކުރަން ޖެހޭ ހަގީގަތަކީ އޭޓީކޭ އަމިއްލަ ދަނޑުގައި ކުޅެން ނުކުތަސް ވާދަވެރިންނަށް ތިބީ ތިން ގައުމުގެ ޗެމްޕިއަނުން ކަމަށް ފެރާންޑޯ ބުންޏެވެ.

"ވެދާނެ އޭޓީކޭ މޯހަން ބަގާން އެ ނަން ބޮޑުވެފައި ތާރީހެއް މި ކްލަބާ އެކު އޮތީމަ ފޭވަރިޓުންނަށް ވަނީ ކަމަށް. އަހަންނަށް ޕްރެޝަރެއް ނެތް. އަހަރެންގެ ހަކަތަ ހުސްކުރާނީ ޓީމަށް ފައިދާ ހުރި ކަންކަމަށް. ޕްރެޝަރު ވެދާނެ، އެއީ އަހަންނަށް އޮތް ކަމަކަށް. ޓީމަށް އޭގެ އަސަރެއް ކުރިޔަ ނުދޭނަން،" ޕްރެޝަރާ ކުރިމަތިލާނީ ކެރިގެން ކަމަށް އިޝާރާތްކޮށް ފެރާންޑޯ ބުންޏެވެ.

ގްރޫޕްގައި އިންޑިއާ ތަމްސީލްކުރާ ދެ ޓީމު އޮތްއިރު، މި ދެ ޓީމު ނިސްބަތްވަނީ އިންޑިއާ ފުޓްބޯޅައިގެ ވަރުގަދަ ދެ ސަރަަހައްދަށެވެ. މިއީ ކެރަލާ އާއި ކަލްކަތާގެ ކުރިމަތިލުމެއްގެ ގޮތުގައި ސިފަކޮށް، މާދަމާގެ މެޗަށް 35،000 ސަޕޯޓަރުންނަށް ވުރެ ގިނަ ސަޕޯޓަރުން ވަންނާނެ އެވެ.

ފެރާންޑޯ ބުނީ ސަޕޯޓަރުން ވަންނާނެ ކަމުގެ އިތުބާރު އެބައޮތް ކަމަށާއި މިއީ ސަޕޯޓަރުންގެ އެހީއާ އެކު މޮޅުވެވޭނެ މެޗެއް ކަމަށެވެ.

"އަމިއްލަ ދަނޑުގައި ކުޅުން އެ ހިތްހަމަޖެހުން. ސަޕޯޓަރުން އެއީ އެޑްވާންޓޭޖެއް. ހަނދާން ނައްތާލައިގެން ނުވާނެ ދަނޑުމަތީގައި މި ކުޅެނީ 11 ކުޅުންތެރިންނާއި 11 ކުޅުންތެރިންގެ މެޗެއް. އެހެންވީމަ މަސައްކަތް ކޮށްގެން މި ވަނީ އަހަރެމެން ވަރަށް ބުރަކޮށް މަސައްކަތް މި ކުރަނީ. އެއް ޕޮއިންޓް އަހަރެމެން ކޮޅަށް މި އޮތީ އެއީ ސަޕޯޓަރުން. ބާކީ މަސައްކަތް އަހަރެމެންނަށް މި އޮތީ" މަލާގާ ޔޫތު ޓީމަށް ކުރިން ކޯޗުކޮށްދިން ފެރާންޑޯ ބުންޏެވެ.

ގޯކުލަމް އިން މި ފަހަރުގެ އައި ލީގު ނިންމާލީ ވަރަށް ރަނގަޅު ފޯމެއްގަ އެވެ. އެ ޓީމު ލީގަށް ބަލާއިރު، މެޗަކުން ބަލިނުވެ އެވެ. މުޅި ސީޒަނުގައި އެންމެ މެޗަކުން ބަލިވެފައި އޮތުމަކީ ގޯކުލަމްގެ ކޮންފިޑެންސް ރަނގަޅުވާނެ ސަބަބެއް ކަމަށް ފެރާންޑޯ ދެކުނެވެ.

"ޑިފެންސާއި އެޓޭކްގެ ޓްރާންސިޝަން ވެސް ރަނގަޅު 90 މިނިޓް އަހަރެމެން ފޯކަސް ކޮށްގެން ކުޅެން ޖެހޭނީ. ފުޓްބޯޅައިގައި އެންމެ މުހިންމު ކަންތައް ގޯކުލަމްގައި އެބައޮތް އެއީ ރަނގަޅު ޓީމް ވޯކެއް އޮތުން. އަހަރެމެން ވިސްނަން ޖެހޭ. އަހަރެމެން ވަރަށް ރަނގަޅަށް ކުޅެން މި ޖެހެނީ ރަނގަޅު ވަގުތުގައި އެޓޭކް ކޮށްފައި، ރަނގަޅު ވަގުތު ޑިފެންސަށް ވިސްނައިގެން،" ފެރާންޑޯ ބުންޏެވެ.

އެހެން ޓީމުތަކާ އަޅާކިޔާއިރު، އޭޓީކޭ އަށް އޮތް ހިތްހަމަޖެހުމަކީ ގިނަ ބިދޭސީ ކުޅުންތެރިންތަކެއްގެ ތެރެއިން ސިލެކްޝަނެއް ހަދަން ފުރުސަތު އޮތުމެވެ. ފެރާންޑޯ ބުނީ މާދަމާގެ މެޗުގެ ކުރިން މި ވަގުތު އެ ޓީމުން ބޭނުންކުރާނެ ބިދޭސީ ކުޅުންތެރިން ހާމަކުރުމަކީ އަނެއް ޓީމަށް ދެވޭނެ އެޑްވާންޓޭޖެއް ކަމަށެވެ.

ގޯކުލަމް ކެރަލާ އާއި އޭޓީކޭ މޯހަން ބަގާންގެ މެޗު ފަށާނީ ރާއްޖެ ގަޑިން 16:00 ގަ އެވެ.

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox