ކްލަބް ވެލެންސިއާ 4-0 އިން ބަލިކޮށް، ސައްތައިން ސައްތަ ރެކޯޑަކާ އެކު މާޒިޔާ ސްޕޯޓްސް އެންޑް ރެކްރިއޭޝަނުން އުރީދޫ ދިވެހި ޕްރިމިއާ ލީގުގެ ފުރަތަމަ ބުރު މިރޭ ނިންމާލައިފި އެވެ.
މިއީ ފުރަތަަމަ ޑިވިޝަނުގައި ވާދަކުރަން ފެށި ފަހުން މުބާރާތެއް ފައްޓައިގެން މާޒިޔާ އިން ލީގު ބުރެއްގެ ހުރިހާ މެޗެއް ކާމިޔާބުކުރި ދެ ވަނަ ފަހަރެވެ. މާޒިޔާ އިން 2017 ވަނަ އަހަރު މެސެޑޯނިއާގެ ކޯޗު މަރުޖާން ސެކުލޮސްކީގެ އިރުޝާދުގެ ދަށުން އެސްޓީއޯ މާލޭ ލީގު ފެށީ ފުރަތަމަ ހަތް މެޗުން މޮޅުވެގެންނެވެ. މި ފަހަރުގެ ދިވެހި ޕްރިމިއާ ލީގު ފެށުމުގެ ކުރިން މާޒިޔާއާ ހަވާލުވި، ސާބިއާގެ މަޔޮޑްރަގް ޖެސިކްގެ ކޯޗުކަމުގައި މާޒިޔާ އިން މި ވަނީ ދިވެހި ޕްރިމިއާ ލީގުގެ ފުރަތަމަ ބުރުގެ ހަތް މެޗުން ވެސް މޮޅުވެފަ އެވެ.
ފުރަތަމަ ބުރު ނިމުނުއިރު، މާޒިޔާ އެއް ވަނައިގައި އޮތީ 21 ޕޮއިންޓާ އެކު އެވެ. ދެ ވަނައިގައި އޮތް އީގަލްސް އަށް 16 ޕޮއިންޓް ލިބިފައިވާއިރު، ތިން ވަނައިގައި ވެލެންސިއާ އޮތީ 12 ޕޮއިންޓާ އެކު އެވެ. ހަތަރެއްގައި ޓީސީ ސްޕޯޓްސް ކްލަބް 10 ޕޮއިންޓް ހޯދައިގެން އޮތްއިރު، ފަސް ވަނައިގައި ޔުނައިޓެޑް ވިކްޓްރީ އޮތީ ނުވަ ޕޮއިންޓާ އެކު އެވެ. ހަ ވަނައިގައި އޮތް ސުޕަ ޔުނައިޓެޑް ސްޕޯޓްސް (ސަސް) އަށް ހަތް ޕޮއިންޓް ލިބިފައިވާއިރު، ހަތް ވަނައިގައި ކްލަބް ގްރީން ސްޓްރީޓްސް އޮތީ ހަތަރު ޕޮއިންޓާ އެކު އެވެ. އެންމެ ފުލުގައި ދަ ގްރާންޑޭ ސްޕޯޓްސް ކްލަބް އޮތީ މޮޅެއް ނުލިބި، އެއް ޕޮއިންޓާ އެކު އެވެ.
އަނިޔާ އާއި ސަސްޕެންޝަންގެ އިތުރުން އެކި މައްސަލަތަކުގައި އޮތް ވެލެންސިއާ އިން މިރޭ ނުކުތީ ޕްރެޒިޑެންޓްސް ކަޕްގައި މާޒިޔާ އަތުން މޮޅުވި ދެ މެޗާ އަޅާކިޔާއިރު، މުހިންމު ގިނަ ކުޅުންތެރިންތަކެއް ނުލަ އެވެ. އޭގެ ތެރޭގައި އަމިއްލަ ސަބަބަކާ ނުކުޅޭ ގޯލްކީޕަރު މުހައްމަދު ފައިސަލް އާއި އެޓޭކްގެ މުހިންމު ދެ ކުޅުންތެރިން ކަމަށްވާ އަލީ ފާސިރު (ސެންޓޭ) އާއި ސްޕެއިންގެ ފޯވާޑް ބޯހާސް މާޓިން ހިމެނެ އެވެ. އަނިޔާގެ ސަބަބުން މާޒިޔާގެ ކެޕްޓަން މުހައްމަދު އިރުފާން (އިރޭ) ވެސް މި މެޗުގައި ނުކުޅެ އެވެ.
ވެެލެންސިއާ އިން ވަރަށް ބޮޑަށް ފަހަތަށް ޖެހިގެން ކުޅެމުންދިޔަ މި މެޗުގައި މާޒިޔާ އަށް ގޯލު ޖަހައިދޭން 12 ވަނަ މިނިޓްގައި ސެއިން ވިންސެންޓްގެ ގައުމީ ޓީމު ފޯވާޑް ކޮނޭލިއަސް ސްޓެވާޓް (ކޯނޭ) ޖެހި ބޯޅަ ވަނީ ބްލޮކްވެފަ އެވެ. އޭގެ ފަހުން މާޒިޔާ އަށް ކުޅޭ ސްޕެނިޝް ލަލީގާގައި ކުރިން ކުޅުނު މިޑްފީލްޑަރު، ޓަނާ ޑޮމިންގޭޒް ފޮނުވާލި ދެ ހިލޭޖެހުން ވެސް ވެލެންސިއާ ގޯލުގައި ހުރި ގޯލްކީޕަރު، ތޮލާލް ހަސަން (ޓޮޕްލަކް) ވަނީ މަތަކޮށްފަ އެވެ. އެކަމަކު، މެޗުގެ 27 ވަނަ މިނިޓްގައި އޭރިއާތެެރެއިން ވެލެންސިއާގެ ޑިފެންޑަރުން ގައިގައި ޖެހިފައި ބްލޮކްވެގެން އައި ބޯޅައެއް ކޯނޭ ވަނީ ގޯލުގެ ތެރެއަށް ފޮނުވާލައިފަ އެވެ.
މި މެޗުގައި ވެލެންސިއާގެ އެންމެ ކުރިއަށް ކުޅެމުންދިޔަ ފޯވާޑް، އަބްދުﷲ ޔާމީން (ޔާން) އަށް އެންމެ ރަނގަޅު ބޯޅަތަކެއް ނުލިބި، ވެލެންސިއާ އެޓޭކް ފެނުނީ އާދައިގެ ގޮތަކަށެވެ. އެކަމަކު، ދެ ވަނަ ހާފު ފަށައިގެން ޔާނު އަށް ލިބުނު ރަނގަޅު ފުރުސަތެއްގައި އެ ޓީމުގެ އަބްދުﷲ މިދުހަތު ފަހުމީ (ބިޗަޑް) އަށް ދޭން ފޮނުވާލި ނަމަވެސް މާޒިޔާ ޑިފެންޑަރުން ސަމާލުވެ ތިބެ، އެ ބޯޅަ ހުއްޓުވި އެވެ.
މާޒިޔާ އިން ލީޑުފުޅާކުރި ގޯލު ޖެހީ މެޗުގެ 56 ވަނަ މިނިޓްގައި ޓަނާ އެވެ. ވެލެންސިއާ ޑިފެންސްތެރެއިން އައި ބޯޅައެއް ޓަނާ ވަނީ ކީޕަރު ޓޮޕްލަކް ކައިރިން ގޯލަށް ފޮނުވާލައިފަ އެވެ. މިއީ މާޒިޔާ އަށް ކުޅުނު ހަ މެޗުގެ ތެރެއިން ޓަނާ އެ ޓީމަށް ކާމިޔާބު ކޮށްދިން ހަތް ވަނަ ގޯލެވެ.
ބޯޅަ ހިފަހައްޓައިގެން ކުޅެމުންދިޔައިރު، މެޗުގެ 78 ވަނަ މިނިޓްގައި މާޒިޔާ އިން ތިން ވަނަ ގޯލެއް ޖެހުމާ ގާތަށް ދިޔަ އެވެ. ޓަނާ ނެގި ކޯނަރަކުން އެ ޓީމުގެ ސާބިއާ ޑިފެންޑަރު ނަމަންޏާ ކާޓާލް ބޮލުން ޖެހި ބޯޅަ އަމާޒުވީ ގޯލުގެ ދަނޑިއަށެވެ. އޭގެ ތިން މިނިޓް ފަހުން އަސަދުﷲ އަބްދުﷲ (އަސައްކޮ) ބޮލުންޖެހި ބޯޅަ ބޭރުވީ ވެލެންސިއާ ޑިފެންޑަރެއް ގައިގައި ޖެހި ދަނޑީގައި ވެސް ޖެހިފަ އެވެ. އެ ކޯނަރުން މާޒިޔާގެ ތިން ވަނަ ގޯލު ޖެހީ އަކުރަމް އަބްދުލް ގަނީ (އަކޫ) އެވެ. މިއީ ޓަނާ ނެގި ކޯނަރަކުން އަކޫ ބޮލުން ޖެހި ގޯލެކެވެ.
މެޗުގެ 89 ވަނަ މިނިޓްގައި މާޒިޔާ އިން ހަތަރު ވަނަ ގޯލެއް ޖެހިިއިރު، މި ގޯލުގައި ބަދަލަކަށް ކުޅެން އެރި މާޒިޔާގެ އިބްރާހިމް ވަހީދު ހަސަން (އިއްބެ) ދައުރު ބޮޑެވެ. އިއްބެ ބޯޅަ ހިފައިގެން އޭރިއާތެރެއަށް ވަދެ ހުރަސްކޮށްލި ބޯޅަ އަސަދުﷲ ވަނީ ގޯލަށް ފޮނުވާލައިފަ އެވެ.
މި ސީޒަނުގައި ވެލެންސިއާ އާއި މާޒިޔާ ޖުމްލަ ހަތަރު މެޗެއް ކުޅުނުއިރު، ޗެރިޓީ ޝީލްޑް މެޗުން މާޒިޔާ މޮޅުވީ 5-0 އިންނެވެ. ޕްރެޒިޑެންޓްސް ކަޕް ލީގު ބުރުގައި ވެލެންސިއާ އިން 1-0 އިން މާޒިޔާ ބަލިކުރި އެވެ. އަދި އެ މުބާރާތުގެ ފައިނަލުގައި މާޒިޔާ އަތުން ވެލެންސިއާ މޮޅުވީ 2-1 އިންނެވެ. މާޒިޔާ އިން މި ވަނީ ޕްރިމިއާ ލީގުގައި ވެލެންސިއާ ބަލިކޮށްފަ އެވެ.
ލީގުގެ ދެ ވަނަ ބުރު ފަށަން ނިންމާފައިވަނީ އަންނަ މަހު އެވެ.
