ކޮވިޑް ފަތުރާ ވައިރަހުގެ އާ ވޭރިއެންޓުތައް އުފެދުމުގައި އެޗްއައިވީއާ އޮތް ގުޅުން ދެނެގަތުމުގެ މަސައްކަތް ދެކުނު އެފްރިކާގެ ސައިންސްވެރިން ކުރަމުން އެބަދެ އެވެ.
މިހާރު ހަލުވިކަމާ އެކު ފެތުރެމުންދާ އޮމިކްރޯން ވޭރިއެންޓް އެންމެ ފުރަތަމަ ހޯދި ދެކުނު އެފްރިކާގެ ސައިންސްވެރިންގެ ދިރާސާގައި ބަލަނީ ދިފާއީ ނިޒާމު ބަލިކަށިވެފައިވާ މީހުންގެ ހަށިގަނޑަށް ކޮވިޑް ވައިރަސް އެތެރެވުމަށް ފަހު އަންނަ ބަދަލުތަކަށެވެ. އެފަދަ މީހުންގެ ތެރޭގައި އެޗްއައިވީ އަށް ފަރުވާ ނުކޮށް ތިބޭ މީހުން ހިމެނެ އެވެ.
އެޗްއައިވީ ޕޮޒިޓިވް މީހުންގެ ތެރެއިން ތަފާތު އެކި ސަބަބުތަކާ ހެދި ބޭސް ނުކައި ތިބޭ މީހުންގެ ހަށިގަނޑުގައި އާދަޔާ ހިލާފަށް ގިނަ ދުވަސް ވަންދެން ކޮވިޑް ވައިރަސް އުޅޭ ކަމަށް މީގެ ކުރިން ސައިންސްވެރިން ހޯދާފައިވެ އެވެ.
"ހަށިގަނޑުގެ ދިފާއީ ނިޒާމު ރަނގަޅަށް މަސައްކަތް ކުރާ ނަމަ، މާ ލަސްތަކެއް ނުވެ ވައިރަސް ބޭރުކޮށްލާނެ،" ކޭޕް ޓައުންގައި ހިންގާ ޑެސްމޮންޑް ޓޫޓޫ އެޗްއައިވީ ފައުންޑޭޝަންގެ ޕްރޮފެސަރު ލިންޑާ ގެއިލް ބެކާ ބީބީސީ އަށް ވިދާޅުވި އެވެ.
"ދިފާއީ ނިޒާމު ބަލިކަށިވެފައިވާ ނަމަ، ވައިރަސް ނުގޮސް އުޅޭ ހާލަތެއް ފެނިދާނެ. އެފަދަ ހާލަތުގައި ހަށިގަނޑުގެ ތެރޭގައި އުޅުމުގެ އިތުރުން ވައިރަސް ދާނީ އިތުރުވަމުން. އިތުރުވާ ވަރަކަށް ވައިރަހަށް ތަފާތު ގިނަ ބަދަލު އައުމުގެ ފުރުސަތު ބޮޑު ވާނެ،" އޭނާ ވިދާޅުވި އެވެ.
ދެކުނު އެފްރިކާގެ ސައިންސްވެރިންގެ ދިރާސާ ކުރިއަށް ގެންދާ އިރު، އެ މީހުން އެންމެ ކަންބޮޑުވަނީ ދިރާސާއާ ހެދި އެ ގައުމާއި އެހެން ގައުމުތަކުގައި އުޅޭ އެޗްއައިވީ ބަލި މީހުންނާ މެދު ތަފާތު ކުރުމެއް އުފެދިދާނެތީ އެވެ.
"ފާހަގަކުރަން ޖެހޭ ވަރަށް މުހިއްމު ކަމެއް އެއީ އެންޓި ރެޓްރޯވައިރަލް ބޭސް ކަމުންދާ ނަމަ، އެ މީހުންގެ ހަށިގަނޑުގެ ދިފާއީ ނިޒާމު މަސައްކަތް ކުރާކަން،" ޕްރޮފެސަރު ބެކާ ވިދާޅުވި އެވެ.
ދިރާސާ އަށް މުހިއްމު ކަމަށް ފާހަގަވާ ދެ ކޭސް މިހާރު ވެސް ވަނީ ދެކުނު އެފްރިކާގެ ހޮސްޕިޓަލްތަކުން ފެނިފަ އެވެ. ފުރަތަމަ ކޭސްގައި ހިމެނޭ އަންހެން މީހާ އަށް މަސް ވަންދެން ކޮވިޑަށް ޕޮޒިޓިވް ކަމަށް ދެއްކި އިރު، އޭނާގެ ހަށިގަނޑުގެ ތެރޭގައި ވައިރަހަށް 30 އަށް ވުރެ ގިނަ ޖެނެޓިކް ބަދަލު އައެވެ.
އޮމިކްރޯން ވޭރިއެންޓް ދެނެގަތް ޓީމުގައި އިސްކޮށް އުޅޭ ޕްރޮފެސަރު ޓޫލިއޯ ޑެ އޮލިވެއިރާ ވިދާޅުވީ އެ ކޭސްއާ އެއް ފަދަ 10-15 ކޭސް އެކި ގައުމުތަކުން ފެނިފައިވާ ކަމަށެވެ. އޭގެ ތެރޭގައި އިނގިރޭސިވިލާތް ވެސް ހިމެނެ އެވެ.
އެޗްއައިވީގެ އިތުރުން ވެސް މީހުންގެ ދިފާއީ ނިޒާމު ބަލިކަށިވެދާނެ ބައިވަރު ސަބަބުތައް ވާ ކަމަށް ސައިންސްވެރިން ބުނެ އެވެ. އެގޮތުން އިނގިރޭސިވިލާތުން ފެނުނު އަލްފާ ވޭރިއެންޓު ލިންކު ކުރެވުނީ އެ ގައުމުގައި ކެންސަރަށް ފަރުވާ ހޯދަމުންދާ މީހަކަށެވެ.
"ހަކުރު ބަލި، ކެންސަރު، ބަނޑުހައިހޫނުކަން، ދިފާއީ ނިޒާމު ބަލިކަށިކޮށްލާ ބަލިތައް، ޓީބީ، މާ ބޮޑަށް ފަލަވުން - މި ހުރިހާ ކަމަކީ ވެސް ހަށިގަނޑުގެ ދިފާއީ ނިޒާމު ބަލިކަށިވާން ދިމާވާ ސަބަބުތައް،" ކޭޕް ޓައުންގެ ގްރޫޓް ޝާ ހޮސްޕިޓަލުގެ ޕްރޮފެސަރު މާކް މެންޑެލްސަން ބީބީސީ އަށް ވިދާޅުވި އެވެ.
