މައުންޓްގެ ހެޓްރިކާ އެކު ހަތް ގޯލުން މޮޅުވެ ޗެލްސީ އަށް އެއް ވަނައިގައި ލީޑެއް

Oct 23, 2021, 1:43 PM
މައުންޓް ލަނޑު ޖެހުމަށް ފަހު އުފާފާޅުކުރަނީ.-- ފޮޓޯ: އޭއެފްޕީ

މައުންޓް ލަނޑު ޖެހުމަށް ފަހު އުފާފާޅުކުރަނީ.-- ފޮޓޯ: އޭއެފްޕީ

ލަންޑަން (އޮކްޓޫބަރު 23) - އިނގިރޭސި ޕްރިމިއާ ލީގުގައި މިރޭ އެންމެ ފުލުގައި އޮތް ނޯވިޗް ސިޓީ އަތުން ޔޫރަޕްގެ ޗެމްޕިއަން ޗެލްސީން 7-0 އިން މޮޅުވެ، ލީގުގެ އެއް ވަނައިގައި ހަތަރު ޕޮއިންޓުގެ ލީޑެއް ނަގައިފި އެވެ.

ނޯވިޗާ ދެކޮޅަށް ކުޅުނު މި މެޗުގައި ޗެލްސީގެ މޭސަން މައުންޓް ހެޓްރިކެއް ހެދިއިރު، މިއީ އޭނާގެ ޗެލްސީ ކެރިއަރުގައި ހެދި ފުރަތަމަ ހެޓްރިކް އެވެ. އަދި މިއީ މިިދިޔަ 11 ވަރަކަށް އަހަރު ތެރޭ ލީގުގެ މެޗެއްގައި ޗެލްސީން ހަތް ގޯލު ޖެހި ފުރަތަމަ ފަހަރެވެ.

ފުރުސަތުގެ ބޭނުން ހިފައި ޗެލްސީން ލީގުގެ އެއް ވަނައިގައި ލީޑުނެގިއިރު، އެ ޓީމަށް ނުވަ މެޗުން ވަނީ 22 ޕޮއިންޓް ލިބިފަ އެވެ. ދެ ވަނައިގައި އޮތް ލިވަޕޫލަށް އަށް މެޗުން 18 ޕޮއިންޓް ލިބިފައިވާއިރު، މާދަމާރޭ އެ ޓީމު ނުކުންނާނީ ރަށުންބޭރުގައި މެންޗެސްޓާ ޔުނައިޓެޑާ ދެކޮޅަށެވެ.

Advertisement

ލީގުގެ ތިން ވަނައިގައި އެންމެ ފަހުގެ ޗެމްޕިއަން މެންޗެސްޓާ ސިޓީ އޮތީ އަށް މެޗުން 17 ޕޮއިންޓާ އެކު އެވެ. ހަތަރެއްގައި އޮތް ބްރައިޓަން އަށް ވަނީ އަށް މެޗުން 15 ޕޮއިންޓް ލިބިފަ އެވެ. މިރޭ ސިޓީ ރަށުންބޭރުގައި ބްރައިޓަންއާ ބައްދަލުކުރާނެ އެވެ.

ޗެމްޕިއަންސް ލީގުގައި މަލްމޯއާ ބައްދަލުކުރި މެޗުގައި ޗެލްސީގެ ދެ ފޯވާޑުން ކަމަށްވާ ރޮމެލޫ ލުކާކޫ އާއި ޓިމޯ ވާނާ އަށް އަނިޔާވުމުން ޗެލްސީން މި މެޗަށް ނުކުތީ އެ ދެ ކުޅުންތެރިން ނުލަ އެވެ. މުހިއްމު ދެ ފޯވާޑުން ނެތް ކަމުގައި ވިޔަސް ޗެލްސީ އަށް މާ ބޮޑު މައްސަލައެއް މި މެޗުގައި ދިމައެއް ނުވެ އެވެ.

ޗެލްސީން ފުރަތަމަ ހާފު ނިންމާލީ ތިން ގޯލު ކުރީގައި އޮވެގެންނެވެ. އަށް ވަނަ މިނިޓްގައި މައުންްޓް ޗެލްސީ އަށް ލީޑުނަގައިދިންއިރު، މެޗުގެ 18 ވަނަ މިނިޓްގައި ކަލުމް ހަޑްސަން އޮޑޯއި ވަނީ އެ ޓީމުގެ ލީޑުފުޅާކޮށްދީފަ އެވެ. ފުރަތަމަ ހާފު ނިމުމުގެ ކުރިން ޗެލްސީގެ ތިން ވަނަ ގޯލު ޖެހީ ރީސް ޖޭމްސް އެވެ.

ދެ ވަނަ ހާފްގެ ކުޅުން ފެށިގެން މެޗުގެ 57 ވަނަ މިނިޓްގައި ބެން ޗިލްވެލް ވަނީ ޗެލްސީގެ ހަތަރު ވަަނަ ގޯލު ޖަހައިފަ އެވެ. ޗެލްސީ އެންމެ ފަހުން ކުޅުނު ހަތަރު މެޗުގައި ވެސް ޗިލްވެލް ގޯލު ޖެހިއިރު، އޭނާ އަކީ 2013 ވަނަ އަހަރު ފްރޭންކް ލަމްޕާޑަށް ފަހު ޖެހިޖެހިގެން ހަތަރު މެޗުުގައި ޗެލްސީ އަށް ގޯލު ޖަހައިދިން ފުރަތަމަ ކުޅުންތެރިޔާ އެެވެ. މެޗުގެ 62 ވަނަ މިނިޓްގައި ނޯވިޗްގެ މެކްސް އާރޮންސް އަތުން ބައިކޮޅަށް ވަން ލަނޑުން ޗެލްސީން ފަސް ވަނަ ގޯލެއް ޖެހި އެވެ.

މެޗުގެ ފަހު 25 މިނިޓް ނޯވިޗުން ކުޅުނީ ކުޅުންތެރިއަކު މަދުކޮށެވެ. ފަސް ގޯލު ފަހަތުގައި އޮއްވައި ނޯވިޗްގެ ބެން ގިބްސަން ފުލުފުލުގައި ހޯދި ދެ ރީނދޫ ކާޑާ އެކު އޭނާ އަށް ރަތް ކާޑެއް ދައްކައި ދަނޑުން ފޮނުވާލި އެވެ.

މެޗުގެ 85 ވަނަ މިނިޓްގައި މައުންޓް އޭނާގެ ދެ ވަނަ ގޯލު އަދި ޗެލްސީގެ ހަ ވަނަ ގޯލު ޖެހީ ޕެނަލްޓީ އަކުންނެވެ. މައުންޓް ފުރަތަމަ ފޮނުވާލި ޕެނަލްޓީ ނޯވިޗްގެ ކީޕަރު ޓިމް ކްރުލް މަތަކުރި ނަމަވެސް އެ ޕެނަލްޓީ އަލުން ޖަހަން ދިނެވެ. އެއީ މައުންޓް ފޮނުވާލިއިރު، ކްރުލް ގޯލު ލައިންގެ ކުރިއަށް ޖެހިފައި ޕެނަލްޓީ މަތަކުރުމުންނެވެ. ޕެނަލްޓީ ޖަހަން ދެ ވަނަ ފަހަރަށް ލިބުނު ފުރުސަތުގައި މައުންޓް ވަނީ ގޯލަށް ބޯޅަ ފޮނުވާލައިފަ އެވެ. އިތުރު ވަގުތުގައި މައުންޓް އޭނާގެ ހެޓްރިކް ފުރިހަަމަ ކުރީ ރުބެން ލޮފްޓަސް-ޗީކް ދިން ބޯޅައަކުންނެވެ.

މައުންޓަކީ ޕްރިމިއާ ލީގުގެ ތާރީހުގައި ޗެލްސީ އަށް ހެޓްރިކެއް ހަދައިދިން 20 ވަނަ ކުޅުންތެރިޔާ އެވެ. އެއް ޓީމަކަަށް ނިސްބަތްވާ ތަފާތު ކުޅުންތެރިންނަށް ބަލާއިރު، އެންމެ ގިނަ ހެޓްރިކް ފެނުނީ އާސެނަލުންނެވެ. އާސެނަލް ޖޯޒީގައި ތަފާތު 21 ކުޅުންތެރިއަކު ވަނީ ޕްރިމިއާ ލީގުގައި ހެޓްރިކް ހަދައިފަ އެވެ.

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox