އަދަބުދީފާނެތީ ރެފްރީގެ ވާހަކަ ދައްކަން އޮސްކާ ބޭނުމެއް ނުވި

Aug 24, 2021, 3:47 PM
އަދަބުދީފާނެތީ ރެފްރީގެ ވާހަކަ ދައްކަން އޮސްކާ ބޭނުމެއް ނުވި

އޭއެފްސީ ކަޕްގެ ދެކުނު އޭޝިއާގެ ގްރޫޕްގެ އެއް ވަަނަ ހޯދަން ބަންގްލަދޭޝްގެ ބަޝުންދަރާ ކިންގްސް އިން މިއަދު ހަވީރު ކުުޅުނު މެޗުގައި އިންޑިއާގެ އޭޓީކޭ މޯހަން ބަގާންއާ އެއްވަރުވެ، މުބާރާތުން ކެޓިއިރު، އެ މެޗުގައި ހިނގާދިޔަ ކަންތައްތަކުގެ ވާހަކަތަކެއް ދަައްކައިގެން ބޮޑު އަދަބެއް އަންނަން ބޭނުންނުވާ ކަމަށް ބަޝުންދަރާގެ ކޯޗު ސްޕެއިނުގެ އޮސްކާ ބްރުޒޮން ބުނެފި އެވެ.

ގްރޫޕް ޑީން އެއް ވަނަ ހޯދާ ޓީމަކަށް އެކަނި އަނެއް ބުރުގެ ފުރުސަތު ލިބޭއިރު، އެ ޖާގަ ހޯދަން ބަޝުންދަރާ އަށް މިއަދު އޮތް ހަަމައެކަނި މަގަކީ އޭޓީކޭ ބަލިކުރުމެވެ. އެކަމަކު، އެ މެޗުން ބަޝުންދަރާ ލީޑުނަގާފައި އޮއްވައި ދެ ވަނަ ހާފްގައި އޭޓީކޭ އިން ގޯލު ޖަހައި މެޗު 1-1 އިން އެއްވަރުވުމުން މުބާރާތުގެ އިންޓަ ޒޯން ޕްލޭއޮފް ސެމީ ފައިނަލްގެ ޖާގަ ލިބުނީ އޭޓީކޭ އަށެވެ.

ގްރޫޕްގެ އެއް ވަނަ އޭޓީކޭ އަށް ލިބުނީ ކުޅުނު ތިން މެޗުން ހަތް ޕޮއިންޓާ އެކު އެވެ. ބަޝުންދަރާ ދެ ވަނަ އަށް ދިޔައިރު އެ ޓީމަށް ލިބުނީ ފަސް ޕޮއިންޓެވެ. ގްރޫޕްގެ ފަހު މެޗުގައި ތިން ވަނައިގައި އޮތް އިންޑިއާގެ ބެންގަލޫރާއި ހަތަރެއްގައި އޮތް ރާއްޖޭގެ މާޒިޔާ މިރޭ ކުޅޭނެ އެވެ.

ބަޝުންދަރާ އަށް މިއަދުގެ މެޗު ގެއްލުމުގައި ދިމާވި އެންމެ ބޮޑު މައްސަލަ އަކީ ފުރަތަމަ ހާފުގެ އިތުރު ވަގުތުގައި އެ ޓީމުގެ ސުޝާންޓޯ ޓްރިޕޫރާ އަށް ދެ ވަަނަ ރީނދޫ ކާޑާއެކު ރަތް ކާޑު ދެއްކުމެވެ. މެޗަށް ފަހު އޮތް ނޫސްވެރިންގެ ބައްދަލުވުމުގައި އޮސްކާ ބުނީ ރަތް ކާޑާ ބެހޭގޮތުންނާއި ރެފްރީގެ ކަންކަމުގެ ވާހަކަ ދައްކަން ބޭނުމެއް ނުވާ ކަމަށެވެ.

"އަހަރެން ރެފްރީންނާ ބެހޭގޮތުން ވާހަކަ ދައްކައިފިއްޔާ މަދުވެގެން 35 މެޗަށް ސަސްޕެންޑްވާނެ. އެއީ އަހަރެން ރެފްރީއާ މެދު ދެކޭގޮތް ބުނެފިއްޔާ ވާނެ ގޮތް. އެހެންވީމަ އަހަންނަށް އެންމެ ރަނގަޅު ގޮތަކީ ހަމަޖެހިގެން ހުރެ މެޗުގައި ދިމާވި އެހެން ކަންތައްތަކުގެ ވާހަކަ ތަކަށް ފޯކަސް ކުރުން،" އޮސްކާ ބުންޏެވެ.

މިއަދުގެ މެޗު ކުރިއަށްދިޔައިރު ބަޝުންދަރާގެ ބެންޗުން ތަކުރާރުކޮށް ވަނީ މެޗުގެ ރެފްރީ އޮމާންގެ ގާސިމް މަތާރުގެ ނިންމުންތަކާ މެދު ހިތްހަމަ ނުޖެހުން ފާޅުކޮށްފަ އެވެ. ގިނަ ފައުލުތަކެއް ފެނިގެންދިޔަ މި މެޗުގައި އޭޓީކޭ އަށް ދެ ރީނދޫ ކާޑު ދެއްކިއިރު، ބަޝުންދަރާގެ ފަސް ކުޅުންތެރިއަށް ވަނީ ރީނދޫ ކާޑު ދައްކައިފަ އެވެ. އަދި އެއް ރަތް ކާޑު ދެއްކި އެވެ.

އޮސްކާ ބުނީ ރެފްރީގެ ކަންކަމާ ބެހޭގޮތުން ކްލަބުން ކަންތައްތަކެއް ކުރާނެ ކަމަށާއި ހަމައެކަނި މައްސަލަ ދިމާވީ އޭޓީކޭއާ އެކު ކުޅުނު މެޗުގައި އެކަނި ނޫން ކަމަށާއި ބެންގަލޫރާ ދެކޮޅަށް ކުޅުނު މެޗުގެ ކަންކަން ދިޔަގޮތާ މެދު ވެސް ވިސްނަން ޖެހޭ ކަމަށެވެ.

"ރެފްރީގެ ކަމަކީ އަހަރެމެންގެ ކްލަބުން ކޮންމެވެސް ކަމެއް ކުރަން ޖެހޭ ކަމެއް. އެއީ ހަމައެކަނި މިއަދު ދިމާވި ކަމެއް ނޫން. ބެންގަލޫރާ ދެކޮޅަށް ކުޅުނު މެޗުގައި ވެސް ދިމާވި ހަމަ އެކި ކަންކަން،" ކުރިން ނިއު ރޭޑިއަންޓަށް ކޯޗުކޮށްދިން އޮސްކާ ބުންޏެވެ.

ރަތް ކާޑަށް ފަހު ބަޝުންދަރާގެ ގޭމަށް ވަރަށް ބޮޑަށް އަސަރުކުރި ކަމަށާއި އެ ހިސާބުން އޭޓީކޭ އަށް އޮތް އެޑްވާންޓޭޖް އިތުރުވިކަން އޮސްކާ ފާހަގަކުރި އެވެ. އޮސްކާ ބުނީ ކުޅުންތެރިއަކު މަދުކޮށް ވެސް ދެ ވަނަ ހާފަށް ނުކުތީ ވަރަށް ބޮޑު އިތުބާރަކާ އެކު ކަމަށާއި ހެދުނު އެންމެ ގޯހަކުން އޭޓީކޭ އިން ގޯލު ޖެހީ ކަމަށެވެ.

"އެ މީހުން އޭގެ ބޭނުން ހިފީ އެ ގޮތަށް ފުރުސަތު ލިބުނު ހަމައެކަނި ބޯޅައިގައި. އެއީ އެ ގޮތަށް އެ މީހުންނަށް މުޅި މެޗުގެ 90 މިނިޓްގައި ހުސްކޮށްދިޔަ ހަމައެކަނި ބޯޅައޭ ވެސް ބުނެވިދާނެ،" އޮސްކާ ބުންޏެވެ.

އޮސްކާ ބުނީ ގްރޫޕް ސްޓޭޖުގެ މެޗުތަކުގައި މޯހަން ބަގާން އިން ކުރި މަސައްކަތަށް ތައުރީފް ކުރަން ޖެހޭ ކަމަށެވެ. އޭގެ އެންމެ ބޮޑު ސަބަބަކީ 21 ދުވަހުގެ ތައްޔާރީ އަށް ފަހު ގްރޫޕް ސްޓޭޖު ކުޅެން އައިސް 72 ގަޑިއިރުން މެޗެއް ކުޅެން ޖެހުނުއިރު ވެސް އެެއްވެސް ޝަކުވާއެއް ނެތި ފޯކަސްކޮށްގެން ޓާގެޓްކުރި ކަންތައް ހާސިލްކުރުމުން ކަމަށް އޮސްކާ ބުންޏެވެ.

މިއީ ބަޝުންދަރާ ކިންގްސް އިން އޭއެފްސީ ކަޕްގެ ގްރޫޕް ސްޓޭޖެއް ފުރިހަމަަކުރި ފުރަތަމަ ފަހަރެވެ. މިދިޔަ އަހަރުގެ ގްރޫޕް ސްޓޭޖުގައި ބަޝުންދަރާ އިން ފުރަތަމަ މެޗުގައި ވަނީ ރާއްޖޭގެ ޓީސީ އަތުން 5-1 އިން މޮޅުވެފަ އެވެ. އެކަމަކު ފަހުން އެ މުބާރާތް އޭއެފްސީން ވަނީ ކޮވިޑްގެ ސަބަބުން ކެންސަލްކޮށްފަ އެވެ.

ބަންގްލަދޭޝްގެ ޗެމްޕިއަންކަން ހޯދައިގެން މި ފަހަރުގެ އޭއެފްސީ ކަޕާ ކުރިމަތިލި ބަޝުންދަރާ ފުރަތަމަ މެޗުގައި މާޒިޔާ އަތުން 2-0 އިން މޮޅުވި އެވެ. ދެ ވަނަ މެޗުގައި ބެންގަލޫރާ ލަނޑެއް ނުޖެހި އެއްވަރުވިއިރު، ފަހު މެޗުގެ ބޮޑުބައިގައި އެއް ކުޅުންތެރިއަކު މަދުކޮށް ކުޅެގެން ވެސް އެ މެޗު އެއްވަރުކުރި އެވެ. މުބާރާތުން ކެޓި ނަމަވެސް ބަޝުންދަރާ އިން ގްރޫޕް ސްޓޭޖު ނިންމާލީ ބައްޔެއް ނުވެ އެވެ.

އޮސްކާ ބުނީ ޖުމްލަކޮށް ހުރިހާ ކުޅުންތެރިން ކުރި މަސައްކަތް ފާހަގަކުރާ ކަމަށާއި މި ތަޖުރިބާގެ އަލީގައި ކުރިއަށް އޮތްތަނުގައި ބަޝުންދަރާ އަށް އިތުރު ކަންކަން ހާސިލްކުރެވޭނެ ކަމަށެވެ.

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox