ފާއިތުވި ހަ ވަރަކަށް އަހަރު ތެރޭ ސްޕެއިންގެ ހުނަރުވެރި ކޯޗު އޮސްކާ ބްރުޒޮން ވަނީ ސާކް ސަރަހައްދުގެ ތިން ގައުމެއްގައި ފުޓްބޯޅައިގެ ހިތްގައިމު މަސައްކަތްތަކެއް ކޮށްފަ އެވެ. އެއީ އިންޑިއާގެ ސްޕޯޓިން ގޯއާ އަދި މުމްބާއީ ސިޓީ އާއި ރާއްޖޭގެ ނިއު ރޭޑިއަންޓް އަދި މިހާރު ބަންގްލަދޭޝްގެ ބަޝުންދަރާ ކިންގްސްގަ އެވެ. އޭއެފްސީ ކަޕްގެ ގްރޫޕް ސްޓޭޖުގައި މިއަދު ހަވީރު އިންޑިއާގެ ބެންގަލޫރާ ދެކޮޅަށް ކުޅޭ މެޗުގެ ކުރިން އޮސްކާ ވަނީ ތިން ގައުމުގެ ފުޓްބޯޅައާ މެދު އޭނާ ދެކޭ ގޮތް ހިއްސާކޮށްފަ އެވެ.
މިއަދުގެ މެޗުތަކުގެ ކުރިން އިއްޔެ ގަލޮޅު ދަނޑުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން އޮސްކާ ބުނީ ތިން ގައުމުގެ ފުޓްބޯޅައިގައި ވެސް އެކިއެކި ކަންކަމުގައި ތަފާތު އެބަހުރި ކަމަށެވެ.
"ފުރަތަމަ ކަަމަކީ މެޗުތައް ކުޅޭ ދަނޑުގެ ފެންވަރު. ބަންގްލަދޭޝް ފުޓްބޯޅަ އަށް ވުރެ ރާއްޖޭގެ ފުޓްބޯޅަ ޓެކްނިކަލީ ރަނގަޅުވާނެ. ބަންގްލަދޭޝް ފުޓްބޯޅަ ވަރަށް ފިޒިކަލްވާނެ. ރާއްޖޭގެ ފުޓްބޯޅަ ޓެކްނިކަލް ވީމަ ބިދޭސީ ކުޅުންތެރިންނަށް ތަފާތު ދައްކަން ފަސޭހަ. އަހަރެމެން ބަންގްލަދޭޝްގައި މި ގެންނަނީ ޓެކްނިކަލް އަށް ވުރެ ފިޒިކަލީ ވެސް ތަފާތު ކުޅުންތެރިން. އެއީ ހަމައެކަނި ޓެކްނިކަލީ ރަނގަޅުވެގެން ބަންގްލަދޭޝްގައި ފަސޭހަނުވާނެ. އޭގެ މިސާލެއް ގޯޓޯ އަކީ،" އޮސްކާ ބުންޏެވެ.
މައިގަނޑު ތަފާތެއްގެ ގޮތުގައި ބަންގްލަދޭޝް އާއި ރާއްޖޭގެ ކްލަބް ފުޓްބޯޅައިގައި މިހާރު އޮތީ ލީގުގެ ފެންވަރު ކަމަށް އޮސްކާ ވަނީ ފާހަގަކޮށްފަ އެވެ. އެ ގޮތުން ބަންގްލަދޭޝް ލީގުގައި މި ވަގުތު ކުޅޭ 13 ކްލަބަކީ ވެސް ވަރަށް ބެލެންސް ޓީމުތަކެއް ކަމަށް އޮސްކާ ބުންޏެވެ. އަދި ކޮންމެ ޓީމަކަށް ވެސް ދެން އޮންނަ ޓީމެއް ބަލިކުރެވިދާނެ ކަން މި ފަހަރުގެ ލީގުން ވެސް ސާބިތުވެފައިވާ ކަމަށް އޮސްކާ ބުނެފައިވެ އެވެ.
"ރާއްޖޭގެ ލީގުގައި ކޮންމެ އަހަރަކު ވެސް ގިނަވެގެން މި ފެންނަނީ ތިނެއް ނޫނީ ހަތަރު ޓީމު އެންމެ ތަފާތުކޮށް. އެކަމަކު ގަބޫލުކުރަން ޖެހޭ މި ތިނެއް ނޫނީ ހަތަރު ކްލަބަކީ ސަރަަހައްދަށް ބަލާއިރު ތަފާތު ދައްކާނެ ޓީމުތަކެއް،" ނިއު އަށް އަހަރެއްގެ ތެރޭ ހަތަރު ތަށި ހޯދައިދިން އޮސްކާ ބުންޏެވެ.
މާޒިޔާއާ ދެކޮޅަށް ކުޅުނު މެޗުގެ ތެރެއިން އޮސްކާ.-- ފޮޓޯ: އޭއެފްސީ
ބަންގްލަދޭޝް އާއި ރާއްޖެ އަށް ވުރެ ކްލަބް ފުޓްބޯޅައިގައި އިންޑިއާ ތަފާތުވާ ސަބަބެއްގެ ގޮތުގައި އޮސްކާ ފާހަގަކޮށްފައިވަނީ ފުޓްބޯޅައިގެ އޮނިގަނޑާއި ކުރަމުން އަންނަ ހަރަދަށް ބަލާއިރު އެތައް ގުނައެއް އިތުރުވުމެވެ.
އިންޑިއާގައި އޭއެފްސީ ކަޕްގެ ލެވަލްގައި މި ރީޖަނުގައި ކުޅެވޭނެ 20 ޓީމު އޮތަސް ހަގީގަތުގައި އެއީ ރާއްޖެ އާއި ބަންގްލަދޭޝްގެ ކްލަބްތަކަށް ބަލިނުކުރެވޭނެ ޓީމުތަކެއް ނޫން ކަން މި ފަަހަރުގެ އޭއެފްސީ ކަޕުން ވެސް ފެންނަ ކަމަށް އޮސްކާ ވަނީ ބުނެފަ އެވެ.
"މިސާލަކަށް ބަލާއިރު މި ފަހަރުގެ އޭއެފްސީ ކަޕްގެ މެޗުތައް ވެސް އެ ހުރީ ވަރަށް ކުޑަކުޑަ ފަރަގަކުން މެޗު ބަދަލުވެފައި. ބެންގަލޫރުން އީގަލްސް ބަލިކުރިއިރު ތަފާތެއް ނުކުތީ އެއްލުމަކުން. މޯހަން ބަގާން އިން ބެންގަލޫރު ބަލިކުރިއިރު ކޯނަރަކުން ބޮޑަށް ކަންކަން ބަދަލުވީ. ދެން އަހަރެމެން (ބަޝުންދަރާ) އަށް މާޒިޔާ ބަލިކުރެވުނުއިރު ފަރަގަކަށް މިއައީ މާޒިޔާގެ ޑިފެންޑަރެއްގެ މިސްޓޭކެއް،" އޮސްކާ ބުންޏެވެ.
އޮސްކާ ބުނީ ކޮންމެ ގައުމެއްގައި ވެސް ފުޓްބޯޅައިގައި ތަފާތުތަކެއް ހުރި ނަމަވެސް އަދިވެސް މި ތިން ގައުމުގައި ކްލަބް ލެވަލަށް ބަލާއިރު ފުޓްބޯޅައިގައި އެހާ ބޮޑު ފަރަގުތަކެއް ނެތް ކަމަށާއި ތަފާތަކީ ފުޓްބޯޅައިގައި އޮތް އޮނިގަނޑު ކަމަށެވެ. އޮނިގަނޑު ބަދަލުކޮށްގެން ކުރިއަށް ދެވޭނެ ފެންވަރު ކޮންމެ ގައުމެއްގައި ވެސް ހުރި ކަމަށް އޮސްކާ ދެކެ އެެވެ.
ބެންގަލޫރަކީ އެކުލަވާލަމުން އަންނަ ޓީމެއް: އޮސްކާ
އޮސްކާ، ނިއު ރޭޑިއަންޓް ގޮވައިގެން 2018 ވަނަ އަހަރުގެ އޭއެފްސީ ކަޕްގައި ކުޅުނުއިރު, ވަނީ ބެންގަލޫރާ ދެކޮޅަށް ދެ ފަަހަރު ނުކުމެފަ އެވެ. ބެންގަލޫރުގައި ކުޅުނު މެޗުން އެ ޓީމު 1-0 އިން މޮޅުވީ ފަހު ވަގުތު ގޯލު ޖަހައިގެންނެވެ. ރާއްޖޭގައި ކުޅުނު މެޗުން ނިއު އިން ވަނީ 2-0 އިން ބެންގަލޫރު ބަލިކޮށްފަ އެވެ.
އޮސްކާ މިހާތަނަށް ބަޝުންދަރާ ގޮވައިގެން އޭއެފްސީ ކަޕްގައި ކުޅުނު ދެ މެޗުން ވަނީ މޮޅުވެފަ އެވެ. އެއީ މިދިޔަ އަހަރު ބަންގްލަދޭޝްގައި ކުޅުނު މެޗުން ރާއްޖޭގެ ޓީސީ ސްޕޯޓްސް ކްލަބް އަތުން 5-1 އިންނާއި މި ފަހަރުގެ ގްރޫޕް ސްޓޭޖުގައި މާޒިޔާ އަތުންނެވެ.
މި ވަގުުތު އޮތް ބެންގަލޫރު ޓީމާއި 2018 ވަނަ އަހަރުގެ ޓީމުގެ ތަފާތަކީ ކޮބައިތޯ ސުވާލުކުރުމުން އޮސްކާ ބުނީ މިހާރު އޮތީ ގިނަ ޒުވާން ކުޅުންތެރިންނާ އެކު އަރަމުން އަންނަ ޓީމެއް ކަމަށެވެ.
"އަހަރެން ނިއުއާ އެކު ނުކުތްއިރު ބެންގަލޫރަކީ އިންޑިއާގެ ޓޮޕް ޓީމު. ރަނގަޅު ބިދޭސީ ކުުޅުންތެރިންނާއި ލޯކަލް ކުޅުންތެރިން އެ މީހުން އަތުގައި ތިބީ. އެކަމަކު މިހާރު އެ އޮތީ އެކުލަވާލަމުން އަންނަ ޓީމެއް. މިދިޔަ އަހަރު ބެންގަލޫރު އައިއެސްއެލް އިން ފެއިލްވުމުން ޔޫރަޕްގެ ފެންވަރު ރަނގަޅު ކޯޗެއް ގެނެސްގެން ޓީމު އެކުލަވާލުމުގެ މަސައްކަތް އެ ކުރަނީ،" އޮސްކާ ބުންޏެވެ.
މިއީ ހަފްތާއެއްހާ ދުވަސްތެރޭ ބެންގަލޫރުން ކުޅޭ ތިން ވަނަ މެޗެވެ. އޮސްކާ ބުނީ ބެންގަލޫރަށް އޭގެ ސަބަބުން ހުރި އުނދަގޫތަކުގެ ފައިދާ ބަޝުންދަރާ އިން ނަގަންޖެހޭ ކަމަށާއި މެޗަށް ޓީމު ރޭވުމުގައި ވެސް އެކަމަށް ހާއްސަ ސަމާލުކަމެއް ދޭނެ ކަމަށެވެ.
ހަވީރު ވަގުތުގައި މި މެޗު ކުޅެން ޖެހުނު ނަމަވެސް އެއީ ބަޝުންދަރާ އަށް މާ ބޮޑު ތަފާތަކަށް ނުވާނެ ކަމަށާއި ސަބަބަކީ ބަންގްލަދޭޝްގައި މި ސީޒަނުގައި ބަޝުންދަރާ އިން ފަރިތަކުރަމުން އައީ މުޅިން ހަވީރު ވަގުތުގައި ކަމަށްވާތީ އެވެ. އަދި ބަންގްލަދޭޝް އާއި ރާއްޖޭގެ ފިނިހޫނުމިން ދާދި އެއްވަރެއް ކަަމަށް އޮސްކާ ބުންޏެވެ.
"ކޮންމެ ގޮތެއް ވިޔަސް ބެންގަލޫރުން މުބާރާތުގައި ކުރިއަށްދާން ބޭނުންނަަމަ މި މެޗުން ތިން ޕޮއިންޓް ހޯދުން ނޫން ގޮތެއް ނެތް. އެހެންވީމަ އަހަރެމެން ޖެހޭނެ ފުރަތަމަ 25 ނޫނީ 30 މިނިޓް ވަރަށް ސަމާލުވާން. ދެން އެ މީހުން ކުރިއަށް ޖެހޭ ވަގުތުތަކުގައި ލިބޭ ޖާގަތަކުގެ ބޭނުން ހިފުން މި އޮތީ،" އޮސްކާ ބުންޏެވެ.
ބެންގަލޫރުގައި ތިބި ބިދޭސީ ކުޅުންތެރިންނާއި ބަޝުންދަރާގައި ތިބި ބިދޭސީ ކުޅުންތެރިންގެ ތެރެއިން 100 ފަހަރު ނަގަން ޖެހުނަސް އިހުތިޔާރު ކުރާނީ ބަޝުންދަރާގެ ކުޅުންތެރިން ކަމަށް އޮސްކާ ވަނީ ބުނެފަ އެވެ. ބަޝުންދަރާގެ ކާމިޔާބީގައި އެންމެ ހިއްސާ ބޮޑީ އެ ޓީމުގައި ތިބި ދެކުނު އެމެރިކާ އަށް ނިސްބަތްވާ ބިދޭސީ ތިން ކުޅުންތެރިންނެވެ.
ގަލޮޅު ދަނޑުގައި ބަޝުންދަރާ އާއި ބެންގަލޫރު ކުޅޭ މެޗު ފަށާނީ މިއަދު ހަވީރު 4 ޖަހާއިރު އެވެ.
