އޭއެފްސީ ކަޕްގެ ދެކުނު އޭޝިއާ ގްރޫޕްގެ ފުރަތަމަ މެޗުގައި ރޭ ރާއްޖޭގެ މާޒިޔާއާ ދެކޮޅަށް ބަންގްލަދޭޝްގެ ބަޝުންދަރާ ކިންގްސް ނުކުތީ ބޯޅަ ހިފަހައްޓައިގެން މާ މޮޅު ކުޅުމެއް ދެއްކުމުގެ ބަދަލުގައި ނަތީޖާ ނެރެ މާޒިޔާ ބަލިކުރަން ކަމަށް ބަޝުންދަރާގެ ކޯޗު ސްޕެއިނުގެ އޮސްކާ ބްރުޒޮން ބުނެފި އެވެ.
ރާއްޖޭގެ ނިއު ރޭޑިއަންޓް ގޮވައިގެން ކާމިޔާބު އަހަރެއް ހޭދަކުރި އޮސްކާގެ ބަޝުންދަރާ އިން ރޭ 2-0 އިން މާޒިޔާ ބަލިކުރިއިރު، ބަޝުންދަރާގެ ރޭވުންތެރިކަން ރޭގެ މެޗުގައި ވަރަށް ރަނގަޅަށް ފެނިގެންދިޔަ އެވެ. މެޗުގެ ކުރިން އޮތް ނޫސްވެރިންގެ ބައްދަލުވުމުގައި އޮސްކާ ފާހަގަކުރި އެއް ކަމަކީ މާޒިޔާގެ ޑިފެންސްލައިން އެންމެ ވަރުގަދަ ނޫން ކަމަށާއި ފެންވަރު ރަނގަޅު ބިދޭސީ ކުޅުންތެރިންތަކެއް އެޓޭކްގައި ތިބި ބަޝުންދަރާ އަށް ފައިދާތަކެއް ކަމަށެވެ.
މާޒިޔާ ކައިރީގައި ރޭ ބަޝުންދަރާ އިން ނެގީ އެ ފައިދާތޯ ނޫސްވެރިއަކު ސުވާލުކުރުމުން އޮސްކާ ބުނީ މާޒިޔާ ފަހަތް ބަލި ކަމަށް ނުބުނާ ކަމަށާއި އެކަމަކު ކުރިއަށް ޖެހިގެން ކުޅޭ ވަގުތުގައި މާޒިޔާ ފަހަތުން އެ ލިބޭ ޖާގަތަކުގެ ބޭނުން ހިފޭނެކަން އެނގޭތީ އެ އަށް ތައްޔާރުވި ކަމަށެވެ.
"އަހަރެމެންނަށް އެނގޭ އެޓޭކް ޓްރާންސިޝަންތަކުގައި މާޒިޔާގެ ފަހަތުން އެ ޖާގަ ލިބޭނެކަން. އެހެންވެ އެ އަށް ތައްޔާރުވިން. އެކަމަކު، މި މެޗުގައި އަހަރެމެން މޮޅުވުމުގައި ބިދޭސީ ކުޅުންތެރިން އެންމެ މުހިއްމީ. ދެން އަހަރެމެން 90 މިނިޓް ވަންދެން އެ ކުޅެމުންދިޔަ ފޯމޭޝަން ރޫޅާނުލައި ފޯކަސްކޮށްގެން ކުޅެގެން މި ނަތީޖާ މި ނެރުނީ،" އޮސްކާ ބުންޏެވެ.
"މިއީ އަހަރެމެން (ބަޝުންދަރާ އިން) ބޯޅަ ހިފަހައްޓައިގެން ގިނަ ވަގުތު ކުޅުމަށް ވުރެ ނަތީޖާ ނެރެން ބޭނުންވާތީ އެ އަށް ފޯކަސް ކޮށްގެން ކުޅުނު މެޗެއް. އެކަން ކުރެވުނު. ލޯކަލް މެޗުތަކުގައި ބޯލް ޕޮސެޝަން އަށް ވިސްނައިގެން ކުޅުނަސް މިއީ އޭޝިއާ ލެވަލްގެ ބޮޑު މުބާރާތެއް. މީގެ ނަތީޖާ ނެރުން މުހިއްމު،"
ބަޝުންދަރާ މޮޅުކޮށްދިނުމުގެ އެންމެ ބޮޑު ކްރެޑިޓެއް ހައްގުވާ ތިން ކުޅުންތެރިންނަކީ އެ ޓީމުގެ ކުރިއަށް ކުޅުނު ބްރެޒިލްގެ ފޯވާޑް ރޮބީނިއޯގެ އިތުރުން އާޖެންޓީނާގެ ފޯވާޑް ރައުލް ބަސޭރާ އަދި ބްރެޒިލްގެ މިޑްފީލްޑަރު ފެނާންޑޭސް އަށެވެ. އަދި ބަޝުންދަރާގެ ފަހަތުގައި ކުޅުނު އީރާން ޑިފެންޑަރު ހާލިދު ޝާފީ ވެސް ފަހަތް އޮގަނައިޒްކޮށް ބާއްވަން ތަފާތު ދެއްކި އެވެ. އޮސްކާ ވެސް ވަނީ އެކަން ފާހަގަކޮށްފަ އެވެ.
މާޒިޔާ އާއި ބެންގަލޫރަށް އަށް ވެސް ފުރުސަތު އެބައޮތް: އޮސްކާ
މި ގްރޫޕްގެ ފުރަތަމަ މެޗުން އިއްޔެ ހަވީރު އިންޑިއާގެ އޭޓީކޭ މޯހަން ބަގާން ވަނީ 2-0 އިން އެ ގައުމުގެ ބެންގަލޫރު ބަލިކޮށްފަ އެވެ. ބަޝުންދަރާ ރޭ މޮޅުވިއިރު، އެ ދެ ޓީމަށް އަމިއްލަ ބާރުގައި ގްރޫޕް އެއް ވަނަ ހޯދުމުގެ ފުރުސަތު އޮތީ ހުޅުވިފަ އެވެ. އަނެއް ބުރުން ފުރުސަތު ލިބޭނީ ގްރޫޕްގެ އެއް ވަނަ ހޯދާ ޓީމަށް އެކަންޏެވެ. އޮސްކާ ބުނީ އެ ފުރުސަތު އަދި ބެންގަލޫރާއި މާޒިޔާ އަށް ވެސް އެބައޮތް ކަމަށެވެ.
"މި ވަގުތަށް ބަލާއިރު އަހަރެމެންނާއި އޭޓީކޭ އަށް މި އޮތް ހިތްހަމަޖެހުމަކީ އެންމެ ފަހު ވަގުތާ ހަމައަށް އަމިއްލަ ބާރުގައި އެއް ވަނަ ހޯދޭނެ ޖާގަ އޮތުން. މިސާލަކަށް ދެ ވަނަ މެޗުގައި ބެންގަލޫރާއި މާޒިޔާ މޮޅުވެއްޖެނަމަ އެ އަންނަނީ ތަފާތު ހާލަތެއް. މިއީ ގްރޫޕް ސްޓޭޖެއް ގޮތަށް އޮތް ކަމުގައި ވިޔަސް ޕްލޭއޮފް ސްޓައިލަށް ކުޅެން ޖެހޭ ތިން މެޗު. އެއް މެޗުން ބަލިވިޔަސް އެ ދަނީ ވަރަށް އުނދަގޫ ހާލަތަކަށް،" އޮސްކާ ބުންޏެވެ.
އޮސްކާ ބުނީ މާޒިޔާ ކޮޅަށް ފުރަތަމަ ވަން ގޯލާ އެކު ބަޝުންދަރާ އަށް ފަސޭހަތަކެއް ވެގެންދިޔަ ކަމަށާއި ދެ ވަނަ ހާފަށް ނުކުތީ އިތުރު ގޯލުތަކެއް ޖަހައި ފުރަތަމަ މެޗު ނިމޭއިރު ގްރޫޕްގެ އެއް ވަނަ ހޯދުމަށް ކަމަށެވެ. އެކަަަން އެގޮތަށް ނުވީ މާޒިޔާ ދެ ވަނަ ހާފްގައި ރަނގަޅަށް ކުޅުމުންކަން އޮސްކާ ފާހަގަކުރި އެވެ.
"ތެދެއް އަހަރެން ބުނިން ދެ ވަނަ ހާފްގައި އިތުރު ގޯލު ޖަަހަން. އެކަމަކު އަހަރެމެން މާޒިޔާ އަށް އިހުތިރާމް ކުރަން ޖެހޭ. މާޒިޔާ އަކީ ވަރަށް މޮޅު ޓީމެއް. މީގެ ދެ އަހަރު ކުރިން އަހަރެން ރާއްޖޭގައި ހުރިއިރާ މިހާރު މާޒިޔާ ކުޅޭ ލެވަލް މުޅިން ތަފާތު. އަހަރެމެން މާޒިޔާ އަށް ވުރެ މާ މޮޅެއް ނޫނަސް މި މެޗުގައި އަހަރެމެންނަށް ނަތީޖާ ލިބުނީ ރަނގަޅު ބިދޭސީ ކުޅުންތެރިންނާއި ޕްލޭނެއްގެ އެޑްވާންޓޭޖުން،" އޮސްކާ ބުންޏެވެ.
އޮސްކާ ވަނީ މާޒިޔާގެ ކޯޗު ރިސްޓޯ ވިޑަކޮވިޗް އެ ޓީމު ލައްވައި ރަނގަޅު ފުޓްބޯޅައެއް ކުޅުވަން އުޅޭތީ އެއީ ފާހަަގަކުރަން ޖެހޭ ކަމެއް ކަމަށް ބުނެފަ އެވެ.
ރޭގެ މެޗަކީ ބަޝުންދަރާ އިން އޭއެފްސީ ކަޕްގައި ކުޅުނު ދެ ވަނަ މެޗެވެ. ފުރަތަމަ މެޗުގައި މިދިޔަ އަހަރުގެ އޭއެފްސީ ކަޕްގައި ބަންގްލަދޭޝްގައި ކުޅުނު މެޗުން ރާއްޖޭގެ ޓީސީ އަތުން ބަޝުންދަރާ މޮޅުވީ 5-1 އިންނެވެ. މިދިޔަ އަހަރުގެ އޭއެފްސީ ކަޕް ކެންސަލް ކޮށްލުމުން ޓީސީ މެޗަށް ފަހު ބަޝުންދަރާ އޭއެފްސީ ކަޕްގެ މެޗެއް ނުކުޅެ އެވެ.
