ޕޮލެންޑް ބަލިކޮށް ސްލޮވާކިއާ ފެށުން ވަރުގަދަ ކޮށްފި

Jun 14, 2021, 5:52 PM
ލަނޑު ޖެހުމަށް ފަހު ސްލޮވާކިއާގެ ސްކްރިނިއޭ އުފާފާޅުކުރަނީ.-- ފޮޓޯ: އޭއެފްޕީ

ލަނޑު ޖެހުމަށް ފަހު ސްލޮވާކިއާގެ ސްކްރިނިއޭ އުފާފާޅުކުރަނީ.-- ފޮޓޯ: އޭއެފްޕީ

ޕީޓާސްބާގް، ރަޝިއާ (ޖޫން 14) - ޔޫރޯ ފުޓްބޯޅަ މުބާރާތުގައި މިރޭ އެއް ކުޅުންތެރިއަކު މަދުކޮށް މެޗުގެ ފަހު ކޮޅުގައި ކުޅުނު ޕޮލެންޑް 2-1 އިން ބަލިކޮށް ސްލޮވާކިއާ އިން މުބާރާތުގެ ފެށުން ވަރުގަދަކޮށްފި އެވެ.

މީގެ ކުރިން ސްލޮވާކިއާ އިން ބޮޑު މުބާރާތެއްގައި ކުޅުނު ފުރަތަމަ މެޗުތަކުން މޮޅެއް ނުލިބެ އެވެ. އެ ޓީމުން ހަމައެކަނި ވާދަކުރީ 2010 ވަނަ އަހަރުގެ ފީފާ ވޯލްޑް ކަޕާއި 2016 ވަނަ އަހަރުގެ ޔޫރޯގަ އެވެ. ވޯލްޑް ކަޕްގެ ފުރަތަމަ މެޗުގައި ނިއު ޒީލެންޑާ އެއްވަރުވިއިރު، ޔޫރޯ ފުރަތަމަ މެޗުން ވަނީ ވޭލްސް އަތުން ބަލިވެފަ އެވެ. މިރޭގެ މެޗަކީ ޔޫރޯގައި ސްލޮވާކިއާ އިން ހޯދި ދެ ވަނަ މޮޅެވެ. އެ ޓީމުން މީގެ ކުރިން ޔޫރޯގައި ކުޅުނު ހަތަރު މެޗުގެ ތެރެއިން މޮޅުވީ ރަޝިއާ އަތުން އެކަންޏެވެ.

ރަޝިއާގެ ކްރެސްޓޯވްސްކީ ސްޓޭޑިއަމްގައި މިރޭ ކުޅުނު މެޗު ފަށައިގެން ސްލޮވާކިއާ އިން ދިޔައީ މެދުތެރެއިން ބޯޅަ އަވަސްކޮށްގެން އެޓޭކް ކުރެވޭތޯ މަސައްކަތް ކުރަމުންނެވެ. ޕޮލެންޑުން އެ ޓީމުގެ ކެޕްޓަން ރޮބަޓް ލެވަންޑޯސްކީ އަށް ބޯޅަ ދީގެން ފުރުސަތު ތަނަވަސް ކުރެވޭތޯ ބަލަމުންދިޔަ ނަމަވެސް ސްލޮވާކިއާގެ ޑިފެންޑަރު މިލާން ސްކްރިނިއާ ދިޔައީ ލެވަންޑޯސްކީ ހުއްޓުވުމުގައި ކުރި ހޯދަމުންނެވެ. އެ ގޮތުން މެޗުގެ ކުރީކޮޅުގައި ލެވަންޑޯސްކީ ޖެހި ޝޮޓެއް ވަނީ ބްލޮކްކޮށްފަ އެވެ.

މެޗުގެ 12 ވަނަ މިނިޓްގައި ސްލޮވާކިއާގެ އޮންދްރެއީ ޑޫޑާ ޖެހި ޝޮޓެއް ދިޔައީ ދަނޑިކައިރިން ބޭރުންނެވެ. އޭގެ ހަތް މިނިޓް ފަހުން ސްލޮވާކިއާ އިން ލީޑުނެގީ ޕޮލެންޑްގެ ގޯލްކީޕަރު ވޮޒްޝިއޭ ޝެޒްނީ އަތުން ބައިކޮޅަށް ވަން ގޯލުންނެވެ. މެޗުގެ 18 ވަނަ މިނިޓްގައި ޖެހި މި ގޯލުގެ ކްރެޑިޓް ދޭން ޖެހޭނީ ސްލޮވާކިއާގެ ރޮބާޓް މަކް އަށެވެ. ޕޮލެންޑްގެ ދެ ކުޅުންތެރިން ކައިރިން ދެމިގަތުމަށް ފަހު އޭރިއާތެރެއަށް ވަދެ މަކް ފޮނުވާލި ބޯޅަ ގޯލަށް ވަނީ ދަނޑީގައި ޖެހިފައި ކީޕަރު ޝެޒްނީ ގައިގައި ޖެހިފަ އެވެ.

މިރޭގެ މެޗުގެ ތެރެއިން ޕޮލެންޑްގެ ގޯލްކީޕަރު ޝެޒްނީ.-- ފޮޓޯ: އޭއެފްޕީ

މިއީ ޔޫރޯ ތާރީހުގައި ކީޕަރެއް އަތުން ބައިކޮޅަށް ގޯލެއް ވަން ފުރަތަމަ ފަހަރެވެ. ޝެޒްނީ އަށް ބޭނުންނުވާ ރެކޯޑެއް ގާއިމްކުރެވުނީ އެވެ. ޔޫރޯގެ ފުރަތަމަ މެޗުތަކުގައި ޕޮލެންޑްގެ ކީޕަރު ޝެޒްނީގެ ނަސީބު ދެރަ އެވެ. ޕޮލެންޑުން 2012 ވަނަ އަހަރުގެ ޔޫރޯގައި ކުޅުނު ފުރަތަމަ މެޗުގައި ގްރީސްއާ ދެކޮޅަށް ޝެޒްނީ އަށް ރަތް ކާޑެއް ދެއްކިއިރު، 2016 ވަނަ އަހަރުގެ ޔޫރޯ ފުރަތަމަ މެޗުގައި ނޮދަން އަޔަލެންޑާ ދެކޮޅަށް ޕޮލެންޑް ކުޅުނު މެޗުގައި ޝެޒްނީ އަށް އަނިޔާވެގެން ޖެހުނީ ބަދަލުކުރާށެވެ.

ފުރަަތަމަ ހާފުގައި ޕޮލެންޑްގެ ލެވަންޑޯސްކީ އާއި ޕިއޮޓްރޭ ޒިއެލިންސްކީ އަދި ގްރެގޯ ކްރިކޯވިއަކް ފޮނުވާލި ހަަމަލާތައް ގޯލާ ސީދާވާ ގޮތެއްނުވި އެވެ. ފުރަތަމަ ހާުފުގައި ސްލޮވާކިއާގެ ގޯލްކީޕަރު މާޓިން ޑުބްރާވްކާގެ ގޯލަށް މާ ނުރައްކާތެރި ހަމަލާތަކެއް ފޮނުވައެއް ނުލެވެ އެވެ.

އެކަމަކު ދެ ވަނަ ހާފްގެ ކުޅުން ފެށިގެން މިނިޓެއް ވެސް ނުވަނިސް އެ ހުރިހާ ކަމެއް ބަދަލުވި އެވެ. ޕޮލެންޑުން ވަނީ ގޯލެއް ޖަހައި ނަތީޖާ ހަމަހަމަކޮށްފަ އެވެ. އޭރިއާތެރެއިން މަސިއެޖް ރީބަސް ދިން ބޯޅައަކުން މި ގޯލު ޖެހީ ކެރޯލް ލިނޭޓީ އެވެ. ލިނޭޓީ އަށް އެންމެ ރަނގަޅަށް އެ ބޯޅަ ފޮނުވާނުލެވުނު ނަަމަވެސް ކީޕަރު ޑުބްރާވްކާ އަތުގައި ރަނގަޅަށް ނުޖެހި ބޯޅަ ގޯލަށް ވަނީ އެވެ.

ލެވަންޑޯސްކީ (ވ) ފޮނުވާލާ ބޯޅަ ސްކްރިނިއާ ބްލޮކްކުރަނީ.-- ފޮޓޯ: އޭއެފްޕީ

ނަތީޖާ ހަމަހަމަ ކުރުމަށް ފަހު ޕޮލެންޑުން މެޗުގެ ކޮންޓްރޯލް ނަގައިގެން ކުޅެން ފެށި އެވެ. އަދި ސްލޮވާކިއާ އޭރިއާތެރެއިން ލަނޑު ޖަހާނެ ފުރުސަތުތައް ތަނަވަސްކުރަން ފެށި އެވެ. އެކަމަކު އެ ޓީމަށް މައްސަލަ ދިމާވީ 63 ވަނަ މިނިޓްގައި ކްރިކޯވިއަކް އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.

ޕޮލެންޑުން ކުޅުންތެރިއަކު މަދުވިތާ ހަ މިނިޓް ތެރޭ ސްލޮވާކިއާ އިން ދެ ވަނަ ފަހަރަށް ލީޑުނެގި އެވެ. ކޯނަރަކުން އޭރިއާތެރެއިން ލިބުނު ބޯޅައެއް ކޮންޓްރޯލް ކޮށްލުމަށް ފަހު ޑިފެންޑަރު ސްކްރިނިއާ ވަނީ ގޯލުގެ ކަނަށް ބޯޅަ އަމާޒުކޮށްލައިފަ އެވެ. މިއީ ސްލޮވާކިއާގެ ވާދަވެރި މެޗުތަކުގައި ސްކްރިނިއާ ޖެހިޖެހިގެން ލަނޑު ޖެހި ތިން ވަނަ މެޗެވެ. އޭނާ ވަނީ ވޯލްޑް ކަޕް ކޮލިފައިންގައި މާޗް މަހު ރަޝިއާ އާއި މަލްޓާ ކޮޅަށް ގޯލު ޖަހައިފަ އެވެ.

މެޗުގެ ފަހު ކޮޅު އެއް ކުޅުންތެރިއަކު މަދުކޮށް ކުޅުނު ނަމަވެސް ބަދަލުތަކެއް ގެނެސްގެން ޕޮލެންޑުން ލަނޑެއް ޖެހޭތޯ މަސައްކަތްކުރި އެވެ.

ބައިނަލްއަގުވާމީ މުބާރާތްތަކުގައި އެންމެ ފަހުން ޕޮލެންޑް ވާދަކުރި 10 ފަހަރުގެ ތެރެެއިން ފުރަތަމަ މެޗުން މޮޅެއް ލިބުނީ އެންމެ ފަހަރަކު އެވެ. ފަސް މެޗުން ބަލިވިއިރު، ހަތަރު މެޗުން ވަނީ އެއްވަރުވެފަ އެވެ.

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox