ސްލޮވާކިއާ އިން ފުރަަތަމަ ފަަހަރަށް ޔޫރޯގައި ކުޅުނީ މީގެ ފަސް އަހަރު ކުރިން ފްރާންސްގައި 2016 ވަނަ އަހަރު ބޭއްވި މުބާރާތުގަ އެވެ. އެ މުބާރާތުގެ ދެ ވަަނަ ބުރުގައި ވާދަކޮށް ސްލޮވާކިއާ ބަލިވީ ޖަރުމަނު އަތުން 3-0 އިންނެވެ. ސްލޮވާކިއާ އިން އެ މުބާރާތުގެ ގްރޫޕް ސްޓޭޖު ފަހަނައަޅައި ދިޔައީ ހުރިހާ ގްރޫޕެއްގެ ތެރެއިން އެންމެ ރަނގަޅު ނަތީޖާ ނެރުނު ތިން ވަނަ ޓީމުތަކުގެ ތެރެއިން ސްލޮޓެއްގަ އެވެ.
ސްލޮވާކިއާ މި ފަހަރުގެ ޔޫރޯ އަށް ކޮލިފައިވީ ކޮލިފައިންގައި ކުޅުނު އަށް މެޗުގެ ތެރެއިން ހަތަރު މެޗުން މޮޅުވެގެން ޕްލޭއޮފް ސްލޮޓެއްގެ ތެރެއިންނެވެ. އެ ޓީމުން ވަނީ ޕްލޭއޮފްގެ ފުރަތަމަ މެޗުގައި ރިޕަބްލިކް އޮފް އަޔަލެންޑް ބަލިކުރުމަށް ފަހު، ޕްލޭއޮފްގެ ފަހު މެޗުގައި ނޮތަން އަޔަލެންޑްގެ މައްޗަށް ކުރި ހޯދައިފަ އެވެ.
ކޮލިފައިންގައި ސްލޮވާކިއާ އިން އެންމެ ގިނަ ގޯލު ޖެހީ ރޮބާޓް ބޮެޒެނިކާއި މަރެކް ހަމްޝިކް އަދި ޔޫރަޖް ކުޗްކާ އެވެ. މީގެ އިން ކޮންމެ ކުޅުންތެރިއަކު ވަނީ ތިން ގޯލު ޖަހައިފަ އެވެ. ސްލޮވާކިއާ އިން އެންމެ ފާހަގަކޮށްލެވޭ ކުޅުންތެރިއަކީ ކުރިން ނަޕޯލީ އަށް ކުޅެ މިހާރު ސްވިޑަން ލީގުގައި ކުޅޭ ހަމްޝިކް އެވެ. އުމުރުން 33 އަހަރުގެ ހަމްޝިކް އަކީ ސްލޮވާކިއާ އަށް އެންމެ ގިނަ މެޗު ކުޅެދީ އެންމެ ގިނަ ގޯލު ޖެހި ކުޅުންތެރިޔާ އެވެ. އެ ޓީމުން މި ފަހަރުގެ ޔޫރޯގައި ފާހަގަކޮށްލެވޭނެ އަނެއް ކުޅުންތެރިއަކީ އުމުރުން 18 އަހަރުގެ ތޯމަސް ސުސްލޯވް އެވެ.
ސްލޮވާކިއާގެ ކޯޗު ޓާކޮވިޗް.
ކޯޗު: ސްޓެފަން ޓާކޮވިޗް
މިއީ ވަގުތީ ކޯޗެއްގެ ގޮތުގައި ބޮޑު ޒިންމާ އަކާ ސްޓެފަން ޓާކޮވިޗާ ހަވާލުވާން ޖެހޭ ދެ ވަނަ ފަހަރެވެ. މިދިޔަ އޮކްޓޫބަރު މަހު ޕަވެލް ހަޕާލް ސްލޮވާކިއާ ކޯޗުކަމުން ވަކިވުމުން ޓާކޮވިޗް އެ ޓީމާ ހަވާލުވި އެެވެ. މިދިޔަ ޑިސެމްބަރު މަހު ސްލޮވާކިއާ ފުޓްބޯޅަ ފެޑެރޭޝަނުން ވަނީ ޓާކޮވިޗަށް ދިގު މުއްދަތުގެ ކޮންޓްރެކްޓެއް ދޭން ނިންމައިފަ އެވެ. ޓާކޮވިޗް ވަނީ 2016 ވަނަ އަހަރުގެ ޔޫރޯގައި ސްލޮވާކިއާ ކޯޗިން ޓީމުގައި މަސައްކަތްކޮށްފަ އެވެ.
ސްކޮޑު
ކީޕަރުން: މާޓިން ޑުބްރާވްކާ (ނިއުކާސަލް)، މަރެކް ރޮޑަކް (ފުލަމް)، ޑޫސާން ކުޝިއަކް (ލެޗިއާ ގަޑާންސްކް)
ޑިފެންޑަރުން: ޕީޓާ ޕެކާރިކް (ހާތާ ބާލިން)، ލިއުބޯމީރް ސަޓްކާ (ލެޗް ޕޮޒްނަން)، ޑެނިސް ވަވްރޯ (ހުއެސްކާ)، މިލާން ސްކްރިނިއޭ (އިންޓަ މިލާން)، ތޯމަސް ހުބޯޗަން (އޮމޯނޯއިއާ)، ޑޭވިޑް ހެންކޯ (ސްޕާޓާ ޕްރާހާ)، މާޓީން ކޮޝްސެލްނިކް (ލިބެރެކް)، މާޓިން ވަލިޔެންޓް (މަޔޯކާ)
މިޑްފީލްޑަރުން: މަރެކް ހަމްޝިކް (އައިއެފްކޭ ގޮޓެބޯގް)، ސްޓަނިސްލާވް ލޮބޮޓްކާ (ނަޕޯލީ)، ޕެޓްރިކް ހްރޯސޯވްސްކީ (ގެންކް)، ޖޫރަޖް ކުޗްކާ (ޕާމާ)، އޮންޑްރޭ ޑޫޑާ (ކޮލޯން)، ރޮބާޓް މާކް (ފެރެންސްވަރޯޝް)، ވްލަޑިމީރް ވެއިސް (ސްލޯވަން ބްރަޓިސްލާވާ)، ލާޒްލޯ ބޭނެސް، (އައުސްބާގް)، ލޫކަސް ހަރާސްލީން (ސަސުއޯލޯ)، ޔަކުބް ރޮމާޑާ (ސްލަވިއާ ޕްރާހާ)، ތޯމަސް ސުސްލޯވް (ގްރޮނިންގެން) ޖޭން ގްރެގަސް (މިނެސޮޓާ)
ފޯވާޑުން: މިކަލް ޑޫރިސް (އޮމޯނޯއިއާ)، ރޮބާޓް ބޮޒެނިކް (ފެއިނޫޑް)، އިވާމް ޝްރާންޒް (ޔަބްލޮނެކް)
