މެޑްރިޑް (އޭޕްރީލް 17) - ސްޕެނިޝް ކަޕްގެ ފައިނަލުގައި މިރޭ އެތުލެޓިކް ބިލްބާއޯއާ ދެކޮޅަށް ކުޅޭ މެޗުގެ ކުރިން ބާސެލޯނާގެ ކޯޗު ރޮނާލްޑް ކޫމަން، އެ ކްލަބްގައި އޭނާގެ މުސްތަގުބަލާ ގުޅުވައިގެން ދައްކާ ވާހަކަތަކަށް ޖަވާބުދީފި އެވެ.
މި ސީޒަނުގައި ބާސެލޯނާގެ ކޯޗުކަމާ ކޫމަން ހަވާލުވީ ދެ އަހަރުގެ އެއްބަސްވުމެއްގެ ދަށުންނެވެ. ކޫމަންގެ ފުރަތަމަ ސީޒަނުގައި ބާސެލޯނާ އަށް ތަށްޓެއް ނުހޯދިއްޖެނަމަ އޭނާ އަށް އެ ކްލަބްގެ ކޯޗުގެ މަގާމު ދެމެހެއްޓޭނެ ކަމުގެ ޔަގީންކަން ނެތް ކަމަށް ސްޕެއިނުގެ މީޑިއާތަކުން ރިޕޯޓްކުރެ އެވެ.
ޗެމްޕިއަންސް ލީގުގެ ދެ ވަނަ ބުރުން ބާސެލޯނާ ވަނީ ޕީއެސްޖީ އަތުން ކަޓައިފަ އެވެ. ސްޕެނިޝް ލީގުގައި އެންމެ ފަހުން ރެއާލް މެޑްރިޑް އަތުން ބަލިވި މެޗަކީ އެންމެ ފަހުން ލީގުގައި ކުޅުނު 19 މެޗަށް ފަހު ބާސެލޯނާ އިން ކުރިމަތިލި ފުރަތަމަ ނާކާމިޔާބީ އެވެ.
ސްޕެނިޝް ކަޕް ފައިނަލުގެ ކުރިން އޮތް ނޫސްވެރިންގެ ބައްދަލުވުމުގައި ބާސެލޯނާގައި އޭނާގެ މުސްތަގުބަލާ ގުޅުވައިގެން ކުރާ ސުވާލުތަކާ ބެހޭގޮތުން ކޫމަން ބުނީ ހަގީގަތުގައި އެ ވާހަކަތަކަކީ ވަކި ބަޔަކު ބޭނުންވެގެން ކުރާ ސުވާލުތަކެއް ގޮތަށް ވެސް ބައެއް ފަހަރު ދޭހަވާ ކަމަށެވެ.
"އަހަރެމެން ބަލިނުވެ 19 މެޗު ވެސް މި ފަހަރު ހަމަކޮށްފިން. އެހެން ހުރެފައި އެންމެ މެޗަކުން ބަލިވުމާ އެކު މި ސުވާލުތައް ކުރިމަތިވީމަ ހައިރާންވޭ އަހަރެން. އަހަރެންގެ ކޮންޓްރެކްޓްގައި އެއް އަހަރު ބާކީ އެބައޮތް އެހެންވީމަ މި ސުވާލުތައް ކިތަންމެ ވަރަކަށް ތަކުރާރު ވިޔަސް އަހަރެންގެ ވިސްނުން ހުރީ މި ޓީމާ އެކު ކުރިއަށްދިއުން. ކާމިޔާބު ހޯދަން މަސައްކަތްކުރުން،" ކޫމަން ބުންޏެވެ.
ބާސެލޯނާގެ ރައީސް ކަމަށް ދާދި ފަހުން އިންތިހާބުވެވަޑައިގަތް ޔޮއާން ލަޕޯޓާ ވަނީ ފާއިތުވި ހަފްތާގައި ކޫމަންއާ އެކު ބައްދަލުވުމެއް ބާއްވައިފަ އެވެ. ކޫމަން ބުނީ ލަޕޯޓާ އެކު ދެކެވުނު ވާހަކަތަކަށް ބަލާއިރު ހުރިހާ ކަމެއް އޮތީ ރަނގަޅަށް ކަމަށާއި ވަކި ކަމެއް ކުރުމުގެ ޕްރެޝަރެއް އަދި ނެތް ކަމަށެވެ.
"ވަކި ކަމެއް ކުރުމުގެ ޕްރެޝަރެއް އަދި ނެތް. އެކަމަކު ބާސެލޯނާ ކަހަލަ ޓީމެއްގައި ތަށި ހޯދުމުގެ ޕްރެޝަރު އޮންނާނެ. އޭގެ އަށް އަހަރެން މަސައްކަތްކުރިން ކުޅުންތެރިއެއްގެ ގޮތުގައި ވެސް. މިހާރު ކޯޗަކަށް ހުރެ ވެސް މި ކުރަނީ އެކަންތައް،" ކުރިން ބާސެލޯނާ އަށް ކުޅުނު ކޫމަން ބުންޏެވެ.
މިއީ މި މަސް ތެރޭގައި ކުޅޭ ކޮޕަ ޑެލް ރޭގެ ދެ ވަނަ ފަައިނަލް އެވެ. މިދިޔަ ސީޒަނުގެ ކޮޕަ ޑެލް ރޭގެ ފައިނަލް ވެސް ކުޅުނީ މި މަހުގަ އެވެ. މި މަހު ތިން ވަނަ ދުވަހު ކުޅުނު ފައިނަލުން ބިލްބާއޯ ވަނީ 1-0 އިން ރެއާލް ސޮސިއެޑާޑް އަތުން ބަލިވެފަ އެވެ. މިރޭ ކުޅޭ މި ސީޒަނުގެ ފައިނަލުން ބާސެލޯނާ އަތުން ބިލްބާއޯ ބަލިވެއްޖެނަމަ ދެ ހަފްތާއެއްހާ ދުވަސްތެރޭ މި މުބާރާތުގެ ދެ ފައިނަލުން އެ ޓީމު ބަލިވީ އެވެ.
ބިލްބާއޯ އާއި ބާސެލޯނާ މިރޭ ކުޅޭ ފައިނަލް މެޗު ފަށާނީ ރާއްޖެ ގަޑިން 00:30 ގަ އެވެ.
