މިދިޔަ ބުރާސްފަތި ދުވަހު އެމެރިކާއިން އެޅި ދަތި ކުރުމުގެ ފިޔަވަޅުތަކަށް ރައްދު ދިނުމުގެ ގޮތުން ރަޝިއާގައި އުޅެމުންދާ އެމެރިކާގެ 10 އޮފިޝަލަކު ގައުމުން ބޭރުކޮށް، އިތުރު އަށް އޮފިޝަލުން ރަޝިއާއަށް އެތެރެވުން މަނާކޮށްފި އެވެ.
ރަޝިއާއަށް އެތެރެވުން މަނާކުރި އިސް އޮފިޝަލުންގެ ތެރޭގައި އެފްބީއައިގެ ޑިރެކްޓަރު އަދި އެމެރިކާގެ ބަންޑާރަ ނައިބު ހިމެނެ އެވެ.
ވައިޓް ހައުސްއިން ބުނީ ރަޝިއާއަށް ދަތި ކުރުމުގެ ފިޔަވަޅު އެޅީ އެ ގައުމުން ހިންގާ ނުރައްކާތެރި ހާރިޖީ ހަރަކާތްތައް ހުއްޓުވަން ކަމަށެވެ. އޭގެ އިތުރުން ޔޫކްރެއިނަށް ބިރު ދެއްކުމާއި އެމެރިކާގެ 2020 ވަނަ އަހަރުގެ ރިޔާސީ އިންތިހާބަށް ނުފޫޒު ފޯރުވި ކަމުގެ ތުހުމަތު ވެސް ރަޝިއާއަށް ކުރެ އެވެ.
އެއް ގައުމުން އަނެއް ގައުމަށް ފިޔަވަޅު އަޅާފައި މި ވަނީ ރަޝިއާ އާއި އެމެރިކާގެ ގުޅުން ވަރަށް ބޮޑަށް ގޯސްވެފައިވާ ދަނޑިވަޅެއްގަ އެވެ.
ރަޝިއާއިން ދަނީ އެ ގައުމުގެ ސިފައިން ޔޫކްރެއިނުގެ ބޯޑަރާ ދިމާލަށް ފޮނުވަމުންނެވެ. ރައްދުގައި އެމެރިކާގެ އަސްކަރީ މަނަވަރުތައް ދަނީ ބްލެކް ސީ ކަނޑުގައި ހަރަކާތްތެރިވަމުންނެވެ. އެކަމާ ހިތްހަމަނުޖެހި ރަޝިއާގެ ފޮރިން މިނިސްޓްރީން އެމެރިކާއަށް އިންޒާރު ދީފައި ވެއެވެ.
މިދިޔަ މަހު ވެސް އެމެރިކާއިން ވަނީ ރަޝިއާ ސަރުކާރުގެ ހަތް އޮފިޝަލަކާއި ގިނަ އަދަދެއްގެ ސަރުކާރު އިދާރާތަކާ ދެކޮޅަށް ފިޔަވަޅު އަޅާފަ އެވެ. އެ ފަހަރު ފިޔަވަޅު އެޅީ އިދިކޮޅު ލީޑަރު އެލެކްސީ ނަވަލްނީއަށް ޒަހަރު ދިނުމުގެ ތުހުމަތު ރަޝިއާ ސަރުކާރަށް ކުރުމަށް ފަހު އެވެ. އެކަމަކު ރަޝިއާއިން އެ ތުހުމަތު ދޮގުކުރެ އެވެ.
ނަމަވެސް މި ހަފްތާގައި އެމެރިކާގެ ރައީސް ޖޯ ބައިޑެން ވަނީ ރަޝިއާގެ ރައީސް ލެޑިމިއަ ޕޫޓިން އާއެކު މަޝްވަރާ ކުރެއްވުމަށް ހުށަހަޅުއްވާފަ އެވެ. ރަޝިއާއިން ބުނީ އެ ދައުވަތު "ޕޮޒިޓިވްކޮށް" ނަގާ ކަމަށާއި ބައްދަލުވުމަށް ދިޔުމާ މެދު ވިސްނަމުންދާ ކަމަށެވެ.
