ޓްރެފިކް ގަވާއިދާ ހިލާފުވެގެން އެމެރިކާގެ މިނިއަޕޮލިސްގައި މަޑު ކުރުވި ކަޅު ނަސްލުގެ މީހެއްގެ ގަޔަށް ބަޑި ޖެހި ކަމަށް ތުހުމަތު ކުރެވޭ ފުލުސް މީހާގެ މައްޗަށް ގަސްތެއް ނެތި މީހަކު މެރި ކަމުގެ ދައުވާ އުފުލައިފި އެވެ.
އެ މައްސަލާގައި ކިމް ޕޮޓާ ހައްޔަރު ކުރުމަށް ފަހު ކަފާލާތުގެ ދަށުން 100،000 ޑޮލަރު ދެއްކުމުން ވަނީ ދޫކޮށްލާފަ އެވެ. ފުލުހުން ބުނީ އޭނާ ބަޑި ޖެހީ އޮޅިގެން ކަމަށެވެ. ނަމަވެސް ވްރައިޓްގެ އާއިލާއިން އެކަން ގަބޫލެއް ނުކުރެ އެވެ.
ޕޮޓާގެ އިތުރުން އެ ހާދިސާ ހިނގި ސަރަހައްދުގެ ފުލުހުންގެ ވެރިޔާ ޓިމް ގެނަން މިހާރު ވަނީ އިސްތިއުފާ ދީފަ އެވެ. ވްރައިޓްގެ މަރަށް ފަހު މިނިއަޕޮލިސްގައި ވަނީ ހަމަނުޖެހުން ބޮޑެވެފަ އެވެ. ރުޅިގަދަވެފައި ތިބި އާއްމުން އަންނަނީ ފުލުހުންގެ ވެހިކަލްތަކާއި އިމާރާތްތަކަށް ވެސް ގެއްލުން ދެމުންނެވެ.
ކަޅު ނަސްލުގެ މީހެއްގެ ގަޔަށް އަނެއްކާވެސް ބަޑި ޖަހާފައި މި ވަނީ މީގެ ކުރިން ފުލުހުންގެ ލާއިންސާނީ އަނިޔާގެ ސަބަބުން މަރުވި ޖޯޖް ފްލޮއިޑުގެ މަރުގެ ޝަރީއަތް ފަށައިގެން އުޅޭ ދަނޑިވަޅެއްގަ އެވެ.
ޑޯންޓޭ ވްރައިޓް މަރުވީ ކިހިނެއް؟
ބަޑި ޖެހުމުގެ ސަބަބުން މަރުވެފައި ވަނީ އުމުރުން 20 އަހަރުގެ ޑޯންޓޭ ވްރައިޓް އެވެ. މި ފަހަރު ބަޑި ޖެހި ހާދިސާއަށް ފަހު ނެރުނު ބަޔާނެއްގައި ފުލުހުން ބުނީ ޓްރެފިކް ގަވާއިދާ ހިލާފުވެގެން ހުއްޓުވި މީހަކު ހައްޔަރު ކުރުމުގެ އަމުރެއް ކުރިން ނެރިފައި އޮތްކަން އެނގުނު ކަމަށެވެ.
ޑޯންޓޭ ވްރައިޓް--
ނަމަވެސް އޭނާ ހައްޔަރު ކުރަން މަސައްކަތް ކުރުމުން ވަނީ ކާރަށް އަރާ ފިލަން މަސައްކަތް ކޮށްފައި ކަމަށާއި އޭނާގެ ގަޔަށް ފުލުހަކު ބަޑި ޖެހީ ފިލަން އުޅޭތީ ކަމަށް ބުނެފައި ވެއެވެ.
އޭނާ ކާރަށް އަރަމުން ދިޔަ ވަގުތު ފުލުސް މީހާ އެތައް ފަހަރެއްގެ މަތިން "ޓޭޒާ" ގޮވާ އަޑު ހާދިސާގެ ވީޑިއޯއިން އިވެ އެވެ. އެހެންކަމުން ބެލެވޭ ގޮތުގައި އެއީ ވްރައިޓް ހުއްޓުވަން ދިން އިންޒާރެކެވެ. އޭގެ ފަހުން ދެން އިވެނީ ބަޑި ޖަހާ އަޑެވެ.
ވްރައިޓް ދުއްވަމުން ދިޔަ ކާރު ތަންކޮޅެއް ދުރަށް ދިޔަ ފަހުން ހުއްޓުނީ އެހެން ކާރެއްގައި ޖެހި އެކްސިޑެންޓު ވެގެންނެވެ. އޭރު ފުލުހުން ގޮސް ބެލިއިރު، އޭނާ އޮތީ މަރުވެފަ އެވެ.
