މެޑްރިޑް (އޭޕްރީލް 13) – ރެެއާލް މެޑްރިޑްގެ ސްޕެއިން ޑިފެންޑަރު ސާޖިއޯ ރާމޯސް ކޮވިޑް-19 އަށް ޕޮޒިޓިވްވެފައިވާ ކަމަށް ރެއާލުން ބުނެފި އެވެ.
އުމުރުން 35 އަހަރުގެ ރާމޯސް މި ވަގުތު ހުރީ ފަޔަށް ލިބުނު އަނިޔާއަކާ ގުޅިގެން ކުޅުމާ ދުރުގަ އެވެ. ރާމޯސް އަށް މިދިޔަ މަހު ސްޕެއިން ގައުމީ ޓީމުގެ މެޗުތަކުގެ ތެރެއިން އަނިޔާވިއިރު، ރެއާލުން މި މަހުގެ ތެރޭގައި ކުޅޭ މުހިއްމު މެޗުތަކެއް އޭނާ އަށް ގެއްލޭނެ އެވެ. އެ މެޗުތަކުގެ ތެރޭގައި ޗެމްޕިއަންސް ލީގުގައި ލިވަޕޫލާ ދެކޮޅަށް ކުޅޭ ދެ ލެގާއި ބާސެލޯނާއާ ދެކޮޅަށް ކުޅޭ އެލްކްލަސިކޯ ހިމެނެ އެވެ. ރެއާލުން ވަނީ ރާމޯސް ނުލައި ލިވަޕޫލް އަތުން ޗެމްޕިއަންސް ލީގުގެ ފުރަތަމަ ލީގުގައި މޮޅުވުމުގެ އިތުރުން އެލްކްލަސިކޯގައި ބާސެލޯނާ ބަލިކޮށްފަ އެވެ.
ޗެމްޕިއަންސް ލީގުގެ ކުއާޓާ ފައިނަލުގެ ދެ ވަނަ ލެގުގައި މާދަމާރޭ ލިވަޕޫލާ ދެކޮޅަށް ކުޅޭ މެޗުގެ ކުރިން އިއްޔެ ޔުއެފާ ޕްރޮޓޮކޯލްގެ ތެރެއިން ހުރިހާ ކުޅުންތެރިން ކޮވިޑަށް ޓެސްޓްކުރިއިރު، ރާމޯސް ވަނީ ޕޮޒިޓިވްވެފަ އެވެ. މިދިޔަ ހަފްތާގައި ލިވަޕޫލާ ދެކޮޅަށް ރެއާލް ދަނޑުގައި ކުޅުނު ފުރަތަަމަ ލެގުގެ މެޗުގެ ކުރިން ކުރި ކޮވިޑް ޓެސްޓްތަކުން ރެއާލްގެ ފްރާންސް ޑިފެންޑަރު ރަފައެލް ވަރާން ވަނީ ކޮވިޑަށް ޕޮޒިޓިވްވެފަ އެވެ.
މިއީ ރާމޯސްގެ ކެރިއަރުގައި އޭނާ އަށް ކުރިމަތިވެފައިވާ އެންމެ އުނދަގޫ އެއް ސީޒަނެވެ. މި ފަހަރު އަނިޔާގެ ސަބަބުން އޭނާ އަށް ވަނީ ގިނަ މެޗުތަކެއް ގެއްލިފަ އެވެ. ކަކުލަށް ލިބިފައިވާ އަނިޔާއަކަށް ފަރުވާ ހޯދަން ރާމޮސް ވަނީ މިދިޔަ ފެބްރުއަރީ މަހު އޮޕަރޭޝަނެއް ކޮށްފަ އެވެ. އޭނާ ކުޅުމަށް އެނބުރި އައިތާ މާގިނަ ދުވަހެއް ނުވެ ކުޑަކަޅުވާ އަށް މި ވަނީ އަނިޔާވެފަ އެވެ. ކޮވިޑް އިން ރަނގަޅުވެ، މި މަހު ފަހުކޮޅު ރާމޯސް އަށް ކުޅުމަށް އެނބުރި އާދެވޭނެ ކަމަށް ރިޕޯޓްތައް ބުނެ އެވެ.
ރެއާލާ އެކު ރާމޯސް ހަދާފައިވާ އެއްބަސްވުން މި ސީޒަނުގެ ނިޔަލަށް ހަމަވާނެ އެވެ. އާ ކޮންޓްރެކްޓެއްގައި ރާމޯސް ސޮއިކުރުމުގެ ވާހަކަތައް ކުރިއަށްދިޔަ ނަމަވެސް މިހާތަނަށް އަމަލީ މަސައްކަތްތައް ފެށިފައެއްނުވެ އެވެ.
ރެއާލުގެ އިންތިހާބުގައި ކުރިމަތިލުމުގެ މުއްދަތު މިއަދުގެ ނިޔަލަށް ހަމަވިއިރު، ކްލަބްގެ ރައީސްގެ މަގާމަށް ކުރިމަތިލި ހަމައެކަނި ކެންޑިޑޭޓަކީ މިހާރުގެ ރައީސް ފްލޮރެންޓީނޯ ޕެރޭޒް އެވެ. އެހެންވެ އޭނާ އަށް އިތުރު ދައުރަކަށް ކްލަބްގެ ރައީސްކަން ފުރުމުގެ ފުރުސަތު ލިބިފައިވާއިރު، މި ދައުރު ހަމަވާނީ 2025 ވަނަ އަހަރާ ހަމައަށެވެ.
ޕެރޭޒް 2013 އާއި 2017 ވަނަ އަހަރުގެ އިންތިހާބު ކާމިޔާބު ކުރެއްވިއިރު ވެސް އޭނާއާ ވާދަކުރާނެ އިދިކޮޅު ކެންޑިޑޭޓެއް ނެތެވެ.
