‏ނިންޓެންޑޯ ސްވިޗް 2 އަށް އެކްސްބޮކްސް ‏‏ގޭމްތައް ގެނައުމަށް މައިކްރޯސޮފްޓުން ‏‏ގަސްދުކޮށްފައިވާ ކަމަށް އެކުންފުނިން ބުނެފި އެވެ. ‏

‏މިދިޔަ މަހު ނިންޓެންޑޯއިން އެ ކުންފުނީގެ އައު ‏‏ކޮންސޯލް، ނިންޓެންޑޯ ސްވިޗް 2 ‏‏ތައާރަފުކޮށްފައި ވާއިރު، ކުންފުނީގެ ގޭމިން ‏‏ޑިވިޝަންގެ ސީއީއޯ ފިލް ސްޕެންސާ ވިދާޅުވީ ‏‏އެ ކޮންސޯލަށް އެކްސްބޮކްސް ގޭމްތައް ‏‏ގެނައުމަށް މައިކްރޯސޮފްޓުން ގަސްދުކުރާ ‏‏ކަމަށެވެ. ‏

‏ވެރައިޓީއަށް ދެއްވި އިންޓަވިއުއެއްގައި ‏‏ސްޕެންސާ ވިދާޅުވީ ނިންޓެންޑޯ ސްވިޗް 2 ‏‏އަކީ އެކްސްބޮކްސް ނުވަތަ ޕީސީ ބޭނުންނުކުރާ ‏‏ކުޅުންތެރިންނާ ހަމައަށް ވާސިލުވުމަށް ލިބޭ ‏‏މުހިންމު ފުރުސަތެއް ކަމަށެވެ. އަދި މިކަމުގެ ‏‏ސަބަބުން އެކްސްބޮކްސްގެ ފްރެންޗައިޒްތަކަށް ‏‏އަހަންމިއްޔަތުކަން ދޭ މީހުންގެ އަދަދު ‏‏އިތުރުވެގެންދާނެ ކަމަށް އޭނާ ވިދާޅުވިއެވެ‏‎.‎

‎"‎‏ނިންޓެންޑޯއަކީ ވަރަށް މުހިންމު ޕާޓްނަރެއް. ‏‏އަޅުގަނޑުމެން ސްވިޗް 1 އަށް ސަޕޯޓް ދިނިން، ‏‏އަދި ސްވިޗް 2 އަށްވެސް ސަޕޯޓް ދޭން ‏‏ބޭނުން، ނިންޓެންޑޯއިން ގޭމިން ‏‏އިންޑަސްޓްރީއަށް ކުރާ އަސަރު ވަރަށް ބޮޑު. ‏‏އަޅުގަނޑުމެންގެ ފްރެންޗައިޒްތަކަށް އެމީހުންގެ ‏‏ސަޕޯޓް ލިބުމަކީ އަޅުގަނޑުމެންގެ ‏‏މުސްތަޤުބަލަށް ވަރަށް މުހިންމު ކަމެއް‏‎،" ސްޕެންސާ ވިދާޅުވިއެވެ.‏

‏ނިންޓެންޑޯ ސްވިޗް 2 އަކީ 2025 ވަނަ އަހަރު ‏‏ނެރުމަށް ހަމަޖެހިފައިވާ ކޮންސޯލެކެވެ. މި ‏‏ކޮންސޯލަށް މާރިއޯ ކާޓް ވޯލްޑް އަދި ޑޮންކީ ‏‏ކޮންގ ބަނާންޒާ ފަދަ ނިންޓެންޑޯގެ އަމިއްލަ ‏‏ގޭމްތަކުގެ އިތުރުން އެހެނިހެން ޑިވެލޮޕަރުންގެ ‏‏ގޭމްތައްވެސް ނެރުމަށް ވަނީ ހަމަޖެހިފައެވެ‏‎.‎

‏ނިންޓެންޑޯގެ އައު ކޮންސޯލަށް ‏‏އެކްސްބޮކްސްއިން ސަޕޯޓް ދޭނެ ކަމަށް ފިލް ‏‏ސްޕެންސަރ ކުރިން ވެސް ވަނީ ‏‏ކަށަވަރުކޮށްދެއްވާފައެވެ. އެޕްރީލް 2 ގައި ‏‏ބޭއްވުނު ނިންޓެންޑޯ ޑައިރެކްޓް ‏‏ޕްރެޒެންޓޭޝަންގައި މައިކްރޯސޮފްޓުން އެއްވެސް ‏‏ގޭމެއް ސްވިޗް 2 އަށް އަންނާނެ ކަމަށް ‏‏އިޢުލާނު ނުކުރި ނަމަވެސް، އެކްސްބޮކްސްގެ ‏‏ބައެއް ގޭމްތައް މި ކޮންސޯލަށް އަންނާނެ ކަމަށް ‏‏ރިޕޯޓުތަކުގައި ބުނެއެވެ‏‎.

‏މި އަހަރުގެ ކުރީކޮޅު، އިންޑަސްޓްރީ ‏‏އިންސައިޑާ ނޭޓްދަހޭޓް ވަނީ 2025 ގައި ‏‏މައިކްރޯސޮފްޓް ފްލައިޓް ސިމިއުލޭޓަރ 2024 ‏‏އަދި ހޭލޯ: ދަ މާސްޓަރ ޗީފް ކަލެކްޝަން ‏‏ނިންޓެންޑޯ ސްވިޗް 2 އަދި ޕީއެސް5 އަށް ‏‏ނެރޭނެ ކަމަށް ލަފާކޮށްފަ އެވެ. މީގެ އިތުރުން، ‏‏ވިންޑޯސް ސެންޓްރަލްގެ ރިޕޯޓެއްގައި ‏‏ބުނެފައިވަނީ ސެނުއާސް ސާގާ: ހެލްބްލޭޑް 2، ‏‏އޭޖް އޮފް މައިތޮލޮޖީ: ރިޓޯލްޑް އަދި ގިއަރސް ‏‏އޮފް ވޯ: އަލްޓިމޭޓް އެޑިޝަން ފަދަ ގޭމްތައް ‏‏ޕީއެސް5 އަދި ނިންޓެންޑޯ ސްވިޗް 2 އަށް މި ‏‏އަހަރު ނެރުމަށް މައިކްރޯސޮފްޓުން ރާވާ ‏‏ކަމަށެވެ‏‎.

މިހާތަނަށް މައިކްރޯސޮފްޓުން ‏‏އެއްވެސް ގޭމެއް ސްވިޗް 2 އަށް އަންނާނެ ‏‏ކަމަށް ރަސްމީކޮށް ކަށަވަރުކޮށްދީފައެއް ނުވެއެވެ. ‏‏އެހެންނަމަވެސް، ސްޕެންސަރ އޭނާގެ އެންމެ ‏‏ފަހުގެ އިންޓަވިއުގައި ފާހަގަކުރެއްވި ފަދައިން، ‏‏މައިކްރޯސޮފްޓުން ވަނީ ކުރިންވެސް ނިންޓެންޑޯ ‏‏ސްވިޗަށް ސަޕޯޓް ދީފައެވެ. މިގޮތުން، މިދިޔަ ‏‏އަހަރު މައިކްރޯސޮފްޓުން އިޢުލާނުކުރީ އެ ‏‏ކުންފުނީގެ ހަތަރު ގޭމެއް ނިންޓެންޑޯ ސްވިޗް ‏‏އަދި ޕީއެސް5 އަށް ނެރޭނެ ކަމަށެވެ‏‎.‎