މާލެ ސަރަހައްދުގައި ހިންގާ ސްޕާތަކާއި ސެލޫންތަކުގެ އާންމު ސާފުތާހިރުކަން ބެލުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިންސްޕެކްޝަނެއް ހިންގަން ފަށައިިފި އެވެ.

އެޗްޕީއޭއިން އާންމުކުރި އިއުލާނެއްގައި ބުނީ އެ އިންސްޕެކްޝަން ކުރިއަށް ގެންދަނީ މިދިޔަ ހޯމަ ދުވަހުން ފެށިގެން މި މަހުގެ 19 ގެ ނިޔަލަށް ކަމަށެވެ. ސްޕާތަކާއި ސެލޫންތަކުން އާންމުންނަށް ހިދުމަތް ދޭއިރު، އެ ތަންތަނުގައި ސާފުތާހިރުކަމުގެ މިންގަނޑު ހިފަހައްޓާ މިންވަރު އެ އިންސްޕެކްޝަނުގެ ތެރެއިން ބަލާނެ ކަމަށް އެޗްޕީއޭގެ އިއުލާނުގައި ބުންޏެވެ.

އެޗްޕީއޭއިން ވަނީ އެ އެޖެންސީން ހިންގާ އިންސްޕެކްޝަނަށް އެއްބާރުލުން ދިނުމަށް ސްޕާތަކާއި ސެލޫންތައް ހިންގާ ފަރާތްތަކުގެ ކިބައިން އެދިފަ އެވެ.

މާލޭގައި ހިންގާ ސްޕާތަކާއި ސެލޫންތަކުގެ ސާފުތާހިރުކަން ބަލަން އެޗްޕީއޭއިން އިންސްޕެކްޝަނެއް ހިންގަން ފަށާފައިވާއިރު، މީހުން ދިރިއުޅޭ ރަށްރަށުގައި މަސާޖުޕާލާތައް ހިންގުމަކީ ގަވާއިދާ ހިލާފު ކަމެއް ކަމަށް ހޯމް މިނިސްޓަރު، އަލީ އިހުސާން މީގެ ކުރިން ވިދާޅުވެފަައިވެ އެވެ.

މިދިޔަ އޯގަސްޓު 24، ގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އިހުސާން ވިދާޅުވީ މީހުން ދިރިއުޅޭ ރަށްރަށުގައި މަސާޖުޕާލާއެއް ހިންގަން އެއްވެސް ފަރާތަކަށް މިހާތަނަށް ހުއްދަ ދީފައި ނުވާނެ ކަމަށެވެ. އަދި މަސާޖުޕާލަތައް ގޮތަށް ހިންގާ ތަނެއް ދެން ފާހަގަކުރެވިއްޖެ ނަމަ ބަންދު ކުރާނެ ކަމަށް އިހުސާން އެދުވަހު ވިދާޅުވި އެވެ.

"އަސްލު ރާއްޖޭގައި، މާލޭގައި ހާއްސަކޮށް މީހުން ދިރިއުޅޭ ރަށްރަށުގައި މަސާޖު ޕާލާއެއް ހިންގާކަށް ހުއްދައެއް ދީފައެއް ނުވާނެ، މި ހިންގަނީ ސެލޫންގެ ނަމުގައި ހިންގާ ތަންތަން، އެތަނުގައި ދެން މި ކުރެވެނީ މި ދެންނެވި ބާވަތުގެ މަސައްކަތްތައް،" އިހުސާން ވިދާޅުވި އެވެ.

ދިވެހިރާއްޖޭގައި ރެޖިސްޓަރީ ނުކޮށް ވިޔަފާރިއެއް ހިންގުމަކީ ވިޔަފާރި ރަޖިސްޓަރީކުރުމުގެ ގާނޫނުގައި ލާޒިމު ކޮށްފައިވާ ކަމެކެވެ. ރެޖިސްޓަރީ ނުކޮށް ވިޔަފާރިއެއް ހިންގާ ނަމަ އެބަޔަކާ މެދު ފިޔަވަޅު އެޅޭނެ ގޮތްތައް ވެސް ގާނޫނުގައި ބަޔާން ކޮށްފައިވެ އެވެ.