މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބޯޑުގައި ހިމެނޭ ޕްރައިވެޓް ސެކްޓާގެ ދެ މެންބަރުން އިއްޔެ ވަކިކުރި އެވެ.

ވަކި ކުރި ދެ މެންބަރުންނަކީ އައްސަދު އަލީ އަދި މުހައްމަދު ޝަހުދީ އަންވަރެވެ. އެއީ ޕްރައިވެޓް ސެކްޓާ ތަމްސީލު ކުރަން އެ ބޯޑަށް އައްޔަންކޮށްފައިވާ ހަމައެކަނި ދެ ބޭފުޅުންނެވެ.

އެމްއެމްއޭއިން ބުނީ އެ އޮތޯރިޓީގެ ބޯޑަށް ދޭތެރެ ދޭތެރެއިން އަބަދުވެސް ބަދަލުތައް ގެންނަ ކަމަށެވެ. ނަމަވެސް އައްސަދު އާއި އަންވަރު ވަކިކުރި ސަބަބެއް މަރުކަޒީ ބޭންކުން ހާމައެއް ނުކުރި އެވެ.

އައްސަދަކީ މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީގެ ޑެޕިއުޓީ ސެކްރެޓަރީ ޖެނެރަލް އެވެ. އޭނާއަކީ ޕާކް ހަޔަޓް މޯލްޑިވްސް ހަޑަހާގެ އޯނަރެެވެ. އަދި އެއީ ނޮވެލްޓީ ގްރޫޕް އޮފް ކޮމްޕެނީސްގެ މެނޭޖިން ޑިރެކްޓަރެވެ.

ޝަހުދީ އަންވަރަކީ މަޝްހޫރު ލޯޔަރެކެވެ. އޭނާއަކީ މޯލްޑިވްސް އިންޓަނޭޝަނަލް އާބިޓްރޭޝަން ސެންޓަރުގެ ޗެއާމަން އެވެ. ޓުއަރިޒަމް ސެކްޓަރުގެ ވަރަށް ގިނަ މަސައްކަތް ގާނޫނީ ދާއިރާއިން އޭނާ ކުރައްވަ އެވެ. އަދި ރާއްޖޭގައި އަމަލު ކުރާ ޓެކްސްއާ ގުޅޭ ގާނޫނުތައް ފަރުމާ ކުރުމުގައި އޭނާ ވަނީ މަސައްކަތް ކުރައްވައިފަ އެވެ.

މުހިއްމު ބައެއް ހަބަރު