ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގެ ގްރޫޕް ޑީގައި މިރޭ 2-0 އިން ޅ. ނައިފަރު ބަލިކުރުމަށް ފަހު، ރ. އަލިފުށިން މުބާރާތުގެ ދެ ވަނަ ބުރުގެ ޖާގައެއް ޔަގީންކޮށްފި އެވެ.

ދެ ވަނަ ބުރުގެ 12 ޖާގައިގެ ތެރެއިން ތިން ޖާގައެއް ވަނީ މިހާރު ކަށަވަރުވެފަ އެވެ. އެއީ، މާލެ ސިޓީ އާއި ބ. އޭދަފުށީގެ އިތުރުން އަލިފުށިންނެވެ. މި ތިން ޓީމުން ވެސް ވަނީ ފުރަތަމަ ދެ މެޗުން މޮޅުވެ، އަނެއް ބުރުން ފުރުސަތު ހޯދައިފަ އެވެ. ގްރޫޕް އޭގައި ފަސް ޓީމު ހިމެނޭއިރު، މި ގްރޫޕުން ފުވައްމުލަކު ސިޓީ ވަނީ ފުރަތަމަ ދެ މެޗުން މޮޅުވެފަ އެެވެ. އެކަމަކު، އެ ޓީމަށް އަދި ދެ ވަނަ ބުރު ޔަގީންކުރަން ޕޮއިންޓް ބޭނުންވެ އެވެ.

ގަލޮޅު ދަނޑުގައި މިރޭ ކުޅުނު މެޗުގެ ފުރަތަމަ ހާފުގައި އަލިފުށިން ވަނީ ލީޑުނަގައިފަ އެވެ.

މި ލަނޑު އެ ޓީމަށް ޖަހައިދިނީ، ސުޕަ ޔުނައިޓެޑް ސްޕޯޓްސް (ސަސް) އާއި ދަ ގްރާންޑޭ ސްޕޯޓްސް ކްލަބަށް ފުރަތަމަ ޑިވިޝަނުގައި ކުޅުނު އަހުމަދު ހުސާމް (ހުސާންކޮ) އެވެ. ޒުވާން ގައުމީ ޓީމަށް ވެސް ކުޅުނު ހުސާންކޮ އޭރިއާބޭރުން ފޮނުވާލި ބޯޅަ އަމާޒުވީ ގޯލުގެ ތިރީ ކަނަށެވެ.

ނައިފަރުން ވެސް ވަނީ ކައުންޓަ އެޓޭކުގައި ގޯލު ޖަހާނެ ފުރުސަތުތަކެއް ތަނަވަސްކޮށްފަ އެވެ. އެކަމަކު، އޭރިއާތެރެއިން ލިބުނު ފުރުސަތުތަކުގައި ބޯޅަ ފޮނުވާލުން ލަސްކޮށްލުމުގެ ސަބަބުން އެންމެ ރަނގަޅަށް ބޭނުންނުހިފުނެވެ.

ދެ ވަނަ ހާފުގައި އަލިފުށީގެ ދެ ވަނަ ލަނޑު ޖެހީ، އެ ޓީމުގެ ތަޖުރިބާކާރު ކުޅުންތެރިޔާ، އާދަމް އިމްރާން (އިންނަ) އެވެ. އަލިފުށި ޓީމުގެ ކެޕްޓަން، މުހައްމަދު ރަޝީދު (ހޮކޭ) އޭރިއާބޭރުން ފޮނުވާލި ބޯޅަ އިންނަ ވަނީ ބޮލުން ގޯލަށް ފޮނުވާލައިފަ އެވެ. މިއީ، މުބާރާތުގައި ކުޅުނު ދެ މެޗުން އިންނަގެ ތިން ވަނަ ގޯލެވެ.

މި ފަހަރުގެ ގޯލްޑް ކަޕްގައި އެންމެ ވަރުގަދަ ސަޕޯޓެއް ފެންނަ އެއް ޓީމަކީ އަލިފުށްޓެވެ.

ގްރޫޕް ޑީގެ އެއް ވަނައިގައި އޮތީ ދެ މެޗުން މޮޅުވެ، ހަ ޕޮއިންޓް ހޯދި އަލިފުށްޓެވެ. ދެ ވަނައިގައި އޮތް ނައިފަރަށް ދެ މެޗުން ވަނީ ތިން ޕޮއިންޓް ލިބިފަ އެވެ. މި ގްރޫޕްގައި ދެން އޮތް ބ. ކެންދޫ އާއި ކ. މާފުށްޓަށް އަދި ޕޮއިންޓެއް ނުލިބެ އެވެ. މާދަމާ ހަވީރު އެ ދެ ޓީމު ބައްދަލުކުރާ މެޗު އޮންނާނެ އެވެ.