ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގެ ގްރޫޕް ސީގައި، މިއަދު ހަވީރު ޅ. ކުރެންދޫ އަތުން 1-0 އިން މޮޅުވެ ކ. ހުރާ އިން މުބާރާތުގައި ކުރިއަށްދިއުމަށް އުންމީދެއް ހޯދައިފި އެވެ.

މި ގްރޫޕްގައި ހުރާ ކުޅުނު ފުރަތަަަމަ މެޗުން ވަނީ ކ. ގުރައިދޫ އަތުން ބަލިވެފަ އެވެ. ކުރެންދޫ ފުރަތަމަ މެޗުން އައްޑޫ ސިޓީއާ ވަނީ އެއްވަރުވެފަ އެވެ. މި ގްރޫޕްގައި ރޭ ކުޅުނު މެޗުން، އައްޑޫ ސިޓީ އާއި ގުރައިދޫ ވަނީ އެއްވަރުވެފަ އެވެ.

ގަލޮޅު ދަނޑުގައި މިއަދު ކުޅުނު މެޗުގައި ހުރާ އިން ވަނީ ޖުމްލަކޮށް ބަލާއިރު ރަނގަޅު ކުޅުމެއް ދައްކައިފަ އެވެ. އަދި ކުރެންދޫން ވެސް ވަނީ ލަނޑު ޖަހާނެ ހުސް ފުރުސަތު ހޯދައި ގޯލަަށް ނުރައްކާކޮށްފަ އެވެ.

ކުރެންދޫ އަށް މި މެޗުގައި އެންމެ ބޮޑު މައްސަލަ އަކަށް ދިމާވީ އެ ޓީމުގެ މެދުތެރެއަށް ކުޅޭ އަބްދުﷲ ނަބާހު އަހުމަދަށް ރަތް ކާޑު ދެއްކުމެވެ. އެ ގޮތުުން، ނަބާހަށް ދެ ވަނަ ރީނދޫ ކާޑު ދެއްކީ މެޗުގެ 45 ވަނަ މިނިޓްގަ އެެެވެ.

މި މެޗުގައި ކުރެންދޫ އަށް ލަނޑު ޖަހަން ލިބުނު ފުރުސަތުގައި، އަޝްހަމް އިބްރާހިމް އަހުމަދު ފޮނުވާލި ބޯޅަ ފޮނުވާލުމުން ހުރާގެ ކީޕަރު، އަހުމަދު އަރީޝް ވަނީ މަތަކޮށްފަ އެެވެ.

ހުރާ އަށް ލީޑުނަަގައިދޭން، ފުރަތަމަ ޑިވިޝަނުގެ ގިނަ ކްލަބްތަކަށް ކުޅުނު، އަލީ ހަމްދާން (އައްޔަ) ފޮނުވާލި ބޯޅަ އަމާޒުވީ ގޯލުގެ ހުރަސްދަނޑިއަށެވެ. މެޗުގެ 74 ވަަނަ މިނިޓްގައި ހުރާ އިން ޖެހި ހަމައެކަނި ލަނޑު ޖެހީ، ޔުނައިޓެޑް ވިކްޓަރީ (ޔޫވީ) އާއި ކްލަބް އީގަލްސް އަށް ކުޅުނު އަރީން އަބްދުﷲ އިބްރާހިމް އެވެ. މިއީ، ކުރެންދޫގެ ގޯލުގައި ހުރި ސްރީ ލަންކާ ގައުމީ ޓީމުގެ ކީޕަރު، ސުޖަން ޕެރޭރާ ކައިރިން ޕެނަލްޓީ އަކުން އަރީން ޖެހި ގޯލެކެވެ. މި ޕެނަލްޓީ ލިބުނީ، އަރީން އަށް އޭރިއާތެެރެއިން ކުރެންދޫގެ މުހައްމަދު ނަބީހު ކުރި ފައުލަކަށް ދިން ޕެނަލްޓީ އެކެވެ.

ގްރޫޕް ސީގެ އެއް ވަނައިގައި އޮތް ގުރައިދޫ އަށް ހަތަރު ޕޮއިންޓް ލިބިފައިވާއިރު، ދެ ވަނައިގައި އޮތް ހުރާ އަށް ތިން ޕޮއިންޓް ވަނީ ލިބިފަ އެވެ. ތިން ވަނައިގައި އައްޑޫ ސިޓީ އޮތީ ދެ ޕޮއިންޓާ އެކު އެވެ. އަދި ފުލުގައި އޮތް ކުރެންދޫ އަށް ވަނީ ޕޮއިންޓެއް ލިބިފަ އެވެ.