ކުރިއަށް އޮތް ރިޔާސީ އިންތިހާބުގައި އިދިކޮޅު އެމްޑީޕީން ވާދަކުރާނެ ކެންޑިޑޭޓަކު ހޮވުމަށް ބާއްވާ ޕްރައިމަރީގައި ވާދަކުރައްވާނެކަން އެ ޕާޓީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.

އާ ގާނޫނުއަސާސީގެ ދަށުން ރާއްޖޭގައި އުފެއްދި ފުރަތަމަ ސިޔާސީ ޕާޓީ، އެމްޑީޕީގެ ގައުމީ މަޖިލީހުގެ މެންބަރުންގެ ވަޓްސްއެޕް ގްރޫޕަށް ފައްޔާޒު މިއަދު ފޮނުއްވި މެސެޖެއްގައި ވިދާޅުވީ "ޕާޓީގެ ޓްވިޓާ ހެންޑްލް އުވާލަންވީހެން ހީވަނީ. ކުޑަކުދިން މާ ގިނައީ. ހުރިހާ ބޭފުޅުންގެ ސަމާލުކަމަށް. 2028 ގެ ރިޔާސީ ޕްރައިމަރީގައި އަޅުގަނޑު ވާދަކުރަން ނިންމައިފިން. ސަޕޯޓު ކޮށްދެއްވުން އެދެން" ކަމަށެވެ.

ނަމަވެސް މިކަމާ ގުޅޭ ގޮތުން އިތުރު ތަފުސީލެއް ފައްޔާޒު ނުދެއްްވަ އެވެ. ނަމަވެސް އެ ނިންމުމަކީ ސީރިއަސް ނިންމުމެއް ކަމަށް ފައްޔާޒުގެ ގާތް ބޭފުޅުން ވިދާޅުވި އެވެ.

ރައީސުލްޖުމްހޫރިއްޔާގެ މަގާމަށް ވާދަ ކުރެއްވުމަށް ޝައުގުވެރިކަން ހުރި ނަމަވެސް 2028 ގެ ރިޔާސީ އިންތިހާބުގައި ވާދަކުރުމާމެދު ގޮތެއް ނުނިންމާ ކަމަށް މިދިޔަ ހަފުތާ އަދަދު ނޫހުގެ 'އެތެރެފުށް' ޕްރޮގްރާމުގައި ފައްޔާޒު ވިދާޅުވި އެވެ.

"ވަރަށް ގިނަ ބޭފުޅުން ވިދާޅުވާނެ ތިމަންނާ އެކަހަލަ އިންޓްރެސްޓެއް ނެތޭ އެނގޭތޯ. އަޅުގަނޑުގެ އިންޓްރެސްޓް އެބަހުރި. އެކަމަކު އޭގެ މާނައަކީ 2028 ގައި އެކަން ކުރަން ނިންމައިގެން އަޅުގަނޑު ހުރި ވާހަކައެއް ނޫން،" އެ ޕްރޮގްރާމުގައި ފައްޔާޒު ވިދާޅުވި އެވެ.

އެމްޑީޕީގެ ރިޔާސީ ޕްރައިމަރީގައި ވާދަކުރާނެކަން މިހާތަނަށް އެހެން ބޭފުޅަކު ރަސްމީކޮށް އިއުލާނެއް ނުކުރައްވަ އެވެ.

ނަމަވެސް، އެ ޕާޓީގެ ރައީސް އަބްދުﷲ ޝާހިދު، މާލެ ސިޓީގެ މޭޔަރު އާދަމް އާޒިމް، އަދި ކުރީގެ ނައިބު ރައީސް ފައިސަލް ނަސީމު، އެމްޑީޕީގެ ރިޔާސީ ޕްރައިމަރީގައި ވާދަކުރާނެ ކަމުގެ އަޑުތައް ވަނީ ފެތުރިފަ އެވެ.