މެންޗެސްޓާ (ނޮވެމްބަރު 23) - މެންޗެސްޓާ ސިޓީ އަށް ކުޅެމުން އަންނަ ކްރޮއޭޝިއާގެ މިޑްފީލްޑަރު، މަޓެއޯ ކޮވަސިޗަށް އަނިޔާވެ، ކުޅުމާ ދުރުގައި މުއްދަތެއް ހޭދަކުރަން ޖެހިފައިވާ ކަމަށް އެ ކްލަބުން ބުނެފި އެވެ.

ސިޓީން ބުނީ، ޔުއެފާ ނޭޝަންސް ލީގުގެ މެޗުތަކަށް ފަހު، ކޮވަސިޗް، އެނބުރި ކްލަބާ ގުޅުނުއިރު، ހުރީ އަނިޔާގައި ކަމަށެެވެ.

ސިޓީގެ ކޯޗު ޕެޕް ގާޑިއޯލާ ބުނީ، ކްރޮއޭޝިއާގެ މެޗުތައް ކުޅުމަށް ފަހު، އެނބުރި ސިޓީ އަށް އައިސް ޓީމާ ގުޅުމުގެ ކުރިން ހެދި ޓެސްޓްތަކުން ކޮވަސިޗްގެ އަނިޔާގެ ކަންތައްތަކެއް ފާހަގަކުރެވިފައިވާ ކަމަށެވެ. އަދި އެ އަނިޔާގެ ތަފްސީލްތައް ދެނެގަންނަން އިތުރު ޓެސްޓްތަކެއް ހެދުމަށް ވަގުތުތަކެއް ހޭދަވާނެ ކަމަށް ވެސް ގާޑިއޯލާ ވަނީ ބުނެފަ އެެެވެ.

"ދެ ހަފްތާ ނޫނީ ތިން ހަފްތާއެއްހާ މުއްދަތު އޭނަ (ކޮވަސިޗް)ގެ އަނިޔާ އިން ރަނގަޅުވާން ނަގާނެ،" ގާޑިއޯލާ ބުންޏެވެ.

ބެލޮންޑިއޯ އެވޯޑް ހޯދި، ސިޓީ އަށް ކުޅޭ ސްޕެއިނުގެ މިޑްފީލްޑަރު، ރޮޑްރީގޯ (ރޮޑްރީ) އަށް އަނިޔާވެ މި ސީޒަން އޭނާ އަށް ނިމިފައިވާއިރު، އެ މަގާމުގައި ކުޅެމުން އައީ ކޮވަސިޗް އެވެ. އެކަމަކު، ކޮވަސިޗަށް ވެސް އަނިޔާވެ، ސިޓީން މި ވަނީ އިތުރު ހައްލެއް ހޯދަން ޖެހިފަ އެވެ.

އެންމެ ފަހުން ކުޅުނު ހަތަރު މެޗުން ވެސް ބަލިވެފައިވާ، ސިޓީން މިރޭ ޓޮޓެންހަމް ހޮޓްސްޕާސްއާ ދެކޮޅަށް ކުޅޭ މެޗަށް ނުކުންނައިރު، ސިޓީގެ ހަތަރު ކުޅުންތެރިއަކު ވަނީ އަނިޔާއިން ރަނގަޅުވެ، ޓީމުގެ ފަރިތަކުރުންތަކުގައި ބައިވެރިވާން ފަށައިފަ އެވެ. އެއީ، ޖޯން ސްޓޯންސް، ކެވިން ޑި ބްރޭނާ، ޖެކް ގްރީލިޝް އަދި މެނުއަލް އަކަންޖީ އެވެ.