ލަންޑަން (ނޮވެމްބަރު 23) - ކަކުލުގެ އޮޕަރޭޝަނެއް ކުރަން ޖެހި އާސެނަލްގެ ޑިފެންޑަރު، ބެން ވައިޓް ދިގު މުއްދަތަކަށް ކުޅުމާ ދުރަށްދާން ޖެހިއްޖެ އެވެ.

ވައިޓް، 27، ގެ އެކިއެކި އަނިޔާގެ މައްސަލަތައް ފާއިތުވި ހަފްތާތަކުގައި ދިމާވެ، މި ފަހަރުގެ އިންޓަނޭޝަނަލް ބްރޭކުގައި އާސެނަލްގެ މެޑިކަލް ޑިޕާޓްމަންޓުން ޓެސްޓްތަކެއް ހެދުމަށް ފަހު ގޮތެއް ފައިނަލް ކުރީ އެވެ. އެއީ، އަނިޔާތަކުން އެއްކޮށް ރިކަވާވުމަށްޓަކައި، ކަކުލުގެ އޮޕަރޭޝަނެއް ކުރުމަށެވެ.

އެ ގޮތުން އޮޕަރޭޝަން ކުރުމަށް ފަހު، ރިކަވަރީގެ މަސައްކަތް ފެށުމަށް ފަހު، އާސެނަލްގެ ކޯޗު މިކޭލް އާޓެޓާ ބުނީ، ވައިޓަށް އެނބުރި ދަނޑުމައްޗަށް އާދެވޭނީ ސީދާ ކިހާ ދުވަހެއްގެ ތެރޭގައިކަން މި ވަގުތު ބުނަން ދަތި ކަމަށެވެ. ޔަގީނުންވެސް މަސްތަކެއްވާނެ ކަމަށާއި އުންމީދަކީ، މި ސީޒަނުގައި އޭނާ އަށް އަލުން ކުޅެވޭތޯ މަސައްކަތް ކުރުން ކަމަށް އާޓެޓާ ވަނީ ބުނެފަ އެވެ.

މި ފަހަރުގެ އިންޓަނޭޝަނަލް ބްރޭކުގެ ކުރިން އަނިޔާ އާއި ފިޓްނަސްގެ މައްސަލަ ދިމާވި، އާސެނަލްގެ ޑެކްލަން ރައިސް އާއި ބުކާޔޯ ސަކާ، އިންގްލެންޑުން ޓީމުން ވަކިވި ނަމަވެސް، އާސެނަލުން ދެކޭގޮތުގައި އެ ޓީމުން މި ހަފްތާގައި ލީގުގައި ކުޅޭ މެޗުގައި އެ ދެ ކުޅުންތެރިން ވެސް ބޭނުންކުރެވޭނެ އެވެ.

އިޓަލީގެ ޑިފެންޑަރު، ރިކާޑޯ ކަލަފިއޯރީ އަށް ވެސް މަހެއްހާ ދުވަސް އަނިޔާގެ ސަބަބުން ގެއްލުނުއިރު، އޭނާ ވެސް ފިޓްވުމުގެ ފުރުސަތު އެބައޮތެވެ. އެކަމަކު، އާސެނަލްގެ ޖަޕާން ޑިފެންޑަރު، ޑަކެހީރޯ ޓޮމިޔާސޫ އަދިވެސް އަންނަނީ އަނިޔާގެ މައްސަލަތަކަށް ހައްލުހޯދަން މަސައްކަތް ކުރަމުންނެވެ.

ލީގުގައި މިރޭ އާސެނަލުން އަމިއްލަ ދަނޑުގައި ނޮޓިންހަމް ފޮރެސްޓާ ކުޅޭނެ އެވެ.