ސަރުކާރުން ވިއްކާފައިވާ 500 މިލިއަން ޑޮލަރުގެ ސުކޫކުގެ އިންޓްރެސްޓުގެ ގޮތުގައި އިންވެސްޓަރުންނަށް ދައްކަން ޖެހޭ 25 މިލިއަނެއްހާ ޑޮލަރު ދައްކައި، ހަލާސްކޮށްފި އެވެ.

ފިނޭންސް މިނިސްޓްރީން މި މައުލޫމާތު ރަސްމީކޮށް ހާމަ ނުކުރި ނަމަވެސް، "އަދަދު" އަށް ކަށަވަރުވެފައިވާ ގޮތުގައި މާދަމާގެ ނިޔަލަށް ދައްކަން ޖެހޭ 24.6 މިލިއަން ޑޮލަރުގެ އިންޓްރެސްޓް ޕޭމަންޓު ސަރުކާރުން ވަނީ ދައްކާފަ އެވެ.

މި ސުކޫކު ވިއްކާފައި ވަނީ 9.875 ޕަސެންޓުގެ އިންޓްރެސްޓު ރޭޓެއްގަ އެވެ. އެހެންވެ ސުކޫކުގެ އަގު އަދާކުރެވެންދެން އަހަރަކު 49.3 މިލިއަން ޑޮލަރު އިންޓްރެސްޓުގެ ގޮތުގައި ދައްކަން ޖެހެ އެވެ. މި ފައިސާ ދައްކަނީ ދެ ބަޔަށް ބަހާލައިގެން، އަހަރުގެ ކުރީކޮޅާއި އަހަރުގެ ފަހުކޮޅެވެ.

ރާއްޖޭން ވިއްކާފައިވާ ސުކޫކުގެ އިންޓްރެސްޓު ދައްކަން ޖެހޭ ތާރީހަށް ވުރެ ކުރިން ދެއްކުމުގެ ސަބަބުން ސުކޫކުގެ އަގު ހިފަހައްޓާށާއި އިންވެސްޓަރުންގެ އިތުބާރު ހިފަހައްޓަން ވެސް ފަހިވާނެ އެވެ. މި ފައިސާ ދެއްކުމާއެކީ މިހާރު ދަށް އަގެއްގައި ޓްރޭޑު ކުރެވެމުންދާ ސުކޫކުގެ އަގު އުފުލުމުގެ ފުރުސަތު ވެސް އޮންނާނެ އެވެ.

ސަރުކާރުން މި ފައިސާ ދައްކާފައި މިވަނީ، ފިޗާއި މޫޑީސް ފަދަ ބައިނަލްއަގުވާމީ ރޭޓިން އެޖެންސީތަކުން ރާއްޖެ ޑީފޯލްޓު ވެދާނެ ކަމުގެ ހިރާސް ބޮޑުކަމަށް ނިންމައި، ރާއްޖޭގެ ކްރެޑިޓު ރޭޓިން ދަށްކޮށްފައިވާ ދަނޑިވަޅެއްގަ އެވެ.

ރޭޓިން އެޖެންސީތަކުން ކްރެޑިޓު ރޭޓިން ދަށްކުރުމާ ގުޅިގެން މުޅި ދުނިޔެއިން ވެސް އެންމެ ފުރަތަމަ ޑީފޯލްޓުވާ ސުކޫކަކީ ރާއްޖޭން ވިއްކާފައިވާ ސުކޫކަށް ވުމުގެ ބިރު ބޮޑު ކަމަށް ވެސް މާލީ ހަބަރުތައް ގެނެސްދޭ ބައިނަލްއަގުވާމީ މީޑީއާތަކުން ރިޕޯޓުކުރި އެވެ. އެއާ އެކީގައި ސުކޫކުގެ އަގު ވެސް ވަރަށް ބޮޑަށް ވެއްޓުނެވެ.

ނަމަވެސް، ބައިނަލްއަގުވާމީ ބާޒާރުގައި މި ސުކޫކު މިހާރު ޓްރޭޑު ކުރެވެމުން ދަނީ ކުރިއަށް ވުރެ ރަނގަޅު އަގެއްގައި ކަން ފާހަގަކޮށްލެވެ އެވެ. މިހާރު ސުކޫކުގެ އަގު ހުރީ ޑޮލަރަކަށް 76 ސެންޓުގަ އެވެ. އަގު އެންމެ ބޮޑަށް ދަށްވީއިރު، ސުކޫކުގެ އަގު ޑޮލަރަކަށް 66 ސެންޓަށް ވެއްޓުނެވެ.

ސުކޫކު އަގު އުފުލި، ސްޓޭބަލް ވާން ފަހިކޮށްދިން މައިގަނޑު ސަބަބަކީ އިންޑިއާ ސަރުކާރު މެދުވެރިވެގެން، ސްޓޭޓް ބޭންކް އޮފް އިންޑިއާ (އެސްބީއައި) އިން ގަނެފައިވާ ބޮންޑަށް ދައްކަން ޖެހޭ 50 މިލިއަން ޑޮލަރު ދެއްކުން އަންނަ އަހަރަށް ފަސްކޮށްދިނުމެވެ. އިންޑިއާ ސަރުކާރުން މިކަން ފަހިކޮށްދިނީ ދިވެހި ސަރުކާރުން އެދިގެން އެ ގައުމުން ފޯރުކޮށްދިން ބަޖެޓު ސަޕޯޓެއްގެ ގޮތުގަ އެވެ.