ސިންސިނާޓީ، ޔުނައިޓެޑް ސްޓޭޓްސް (އޮކްޓޫބަރު 1) - މިދިޔަަ ގަރުނުގެ ފަހުކޮޅުގައި، (1970 އިން ފެށިގެން 1980ގެ ފަހުކޮޅާ ހަމައަށް) ބޭސްބޯލްގައި ފެނުނު އާދަޔާހިލާފު ކުޅުންތެރިޔާ އަދި ފަހުން ކޯޗިން ކެރިއަރު ވެސް ފެށި، ޕީޓް ރޯސް، އުމުރުން 83 އަހަރުގައި މަރުވެއްޖެ އެވެ.

މޭޖަ ލީގު ބޭސްބޯލް (އެމްއެލްބީ)ގައި އެންމެ ގިނަ ޝޮޓް ޖެހުމުގެ ރެކޯޑް އޮތް ރޯސް، އަކީ ތިން ފަހަރު ވޯލްޑް ސީރީސް ޗެމްޕިއަނެކެވެ. އެ ގޮތުން، ސިންސިނާޓީ ރެޑްސްއާ އެކު، 1975 އާއި 1976 ވަނަ އަހަރު ވޯލްޑް ސީރީސް ކާމިޔާބުކުރި ރޯސް ވަނީ ފިލަޑެލްފިއާ ފިލީސްއާ އެކު، 1980 ވަނަ އަހަރު ވޯލްޑް ސީރީސްގެ ޗެމްޕިއަންކަން ހޯދައިފަ އެވެ.

އެމްއެލްބީގައި ރޯސް ވަނީ 3562 މެޗު ކުޅެ، 4256 ޝޮޓް ޖަހައިފަ އެވެ. މިއީ، ރެކޯޑެކެވެ.

ޗާލީ ހަސްލްގެ ނަމުން މަޝްހޫރުކަން ހޯދާފައިވާ ރޯސް ވަނީ، 1973 ވަނަ އަހަރު ނޭޝަންސް ލީގުގެ އެންމެ މޮޅު ކުޅުންތެރިޔާގެ މަގާމާއި، 1975 ވަނަ އަހަރު ވޯލްޑް ސީރީސްގެ އެންމެ މޮޅު ކުޅުންތެރިޔާގެ މަގާމު ހޯދައިފަ އެވެ.

ބޭސްބޯލްގެ 21 ސީޒަނުގައި، ރޯސް ކުޅުނުއިރު، 17 ސީޒަނުގެ އޯލް ސްޓާ މެޗަށް އޭނާ ހޮވުުނުއިރު، ތަފާތު ފަސް މަގާމެއްގައި ކުޅެގެން އެ ރެކޯޑް ވެސް ހެދި އެވެ.

ރޯސްގެ ކާމިޔާބު ކެރިއަރަށް ހިޔަނި އެޅުނީ، 1989 ވަނަ އަހަރު އޭނާ އަށް ބެޓިންގެ މައްސަލައެއްގައި އަދަބު ދިނުމުންނެވެ. އެ ގޮތުން، ބެޓިން މައްސަލައެއްގައި ރޯސް އަށް އައީ އުމުރު ދުވަހުގެ ސަސްޕެންޝަނެކެވެ. އެ ގޮތުން، އެ ސަސްޕެންޝަނާ ހެދި އޭނާ އަށް ރަސްމީކޮށް ލެޖެންޑެއްގެ ހައިސިއްޔަތު ދީ، "ހޯލް އޮފް ފޭމް"ގައި ނުހިމަނަން، ބޭސްބޯލްގެ ބައިނަލްއަގުވާމީ ޖަމިއްޔާ އިން ނިންމި އެވެ.

ރޯސް، 2004 ވަނަ އަހަރު ނެރުނު ބަޔޮގްރަފީއެއްގައި ބުނެފައިވަނީ، ސިންސިނާޓީ ރެޑްސްގެ ބައެއް މެޗުތަކަށް އޭނާ ބެޓް ކުރި ކަމަށެވެ. އެކަަމަކު، އެ ޓީމާ ދެކޮޅަށް ދުވަހަކު ވެސް ބެޓްކޮށްފައިނުވާނެ ކަަމަށް ރޯސް ވަނީ ބުނެފަ އެވެ.