ހުޅުމާލެ ދެވަނަ ފިިޔަވަހީގައި މިއަދު އެކްސިޑެންޓުވި ކާރު ދުއްވަން އިން މީހާ ހޯދުމުގެ މަސައްކަތް ކުރަމުންދާ ކަމަށް ފުލުހުން ބުނެފި އެވެ.

މީޑިއާތަކަށް ފުލުހުން ފޮނުވި މެސެޖެއްގައި ފުލުހުން ބުނީ އެކްސިޑެންޓުވުމުން، އެކްސިޑެންޓުވި ކާރު ދުއްވަން އިން މީހާ ފިލާފައިވާ ކަމަށެވެ.

ވިނަރެސް ފުލެޓުތައް ކައިރީގައި މިއަދު ހިނގި އެ އެކްސިޑެންޓުގެ ވީޑިއޯއެއް ސޯޝަލްމީޑިއާގައި ވަނީ އާންމުވެފަ އެވެ. އެ ވީޑިއޯއިން ފެންނަ ގޮތުގައި އެކްސިޑެންޓްވީ ކޮންޓްރޯލުން ނެއްޓިގެން އައި ކާރެއް، މަގުގެ އެއްފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހިގެންނެވެ.

އެ މީހާއަށް ހުޅުމާލެ ހޮސްޕިޓަލުގައި ފަރުވާދެމުންދާ ކަމަށް ފުލުހުން ބުންޏެވެ.

ކޮންޓުރޯލު ނުވެގެން އައި ކާރުން ޖެހުމުން ސައިކަލުގައި އިން މީހާ ވިއްސައިގެން، މަގުގެ ގަސް އިންދާ ބައިގެ މަތިން ގޮސް ދުވާރު މައްޗަށް ވެއްޓޭ މަންޒަރު އެ ވީޑިއޯއިން ފެނެ އެވެ.

ސައިކަލުގައި ޖެހުނު ކާރު ގޮސް މަތަވީ ގަސް އިންދާ ބައި ހުރަސްކޮށް ދުވާރު މައްޗަށެވެ. ސައިކަލުގައި ޖެހުމަށްފަހު ގަހެއްގައި ކާރުން ޖެހި އެ ގަސް ބިންދައިގެންދާ މަންޒަރު ވެސް ވީޑިއޯއިން ފެނެ އެވެ.

އެ ހާދިސާގައި އަނިޔާވެފައި ވަނީ ސައިކަލު ދުއްވަން އިން ފިރިހެނަކަށް ކަމަށް ފުލުހުން ބުނެފައިވެ އެވެ. އެ މައްސަލަ ފުލުހުންނަށް ރިޕޯޓު ކޮށްފައި ވަނީ މިއަދު މެންދުރު ކަމަށް ވެސް ފުލުހުން ބުންޏެވެ.