މަސްވެރިކަމުގެ ސިނާއަތުގައި ހުރި މައްސަލަތައް ހައްލުކުރަން ސަރުކާރުން އެކީ އެ މަސައްކަތުގެ ތެރެއިން ވީއްލި، މަސްވެރިކަމާ ގުޅޭގޮތުން އެ ޕާޓީން ކަނޑައަޅާފައިވާ ސިޔާސަތުތަކަށް އެނބުރެން ދަ ޑިމޮކްރެޓްސް އިން މިއަދު ގޮވާލައިފި އެވެ.

ޑިމޮކްރެޓުން މިހެން ގޮވަލީ ކަނޑު މަސްވެރިންނާއި ކަންނެލި މަސްވެރިންގެ ކަންބޮޑުވުންތައް ކޮޅުން ލައިގެން ގޮސް މުޒާހަރާކޮށް ސަރުކާރާ ދެކޮޅަށް އަޑުއުފުލާ ހިސާބަން ކަންކަން ދިޔުމުން އެ ޕާޓީން ނުހަނަ ކަންބޮޑުވާ ކަމަށް ބުނެ ނެރުނު ނޫސް ބަޔާނެއްގަ އެވެ.

އެ ނޫސް ބަޔާނުގައި ޑިމޮކްރެޓުން، މަސްވެރިންނަށް ދިމާވެގެން އުޅޭ މައްސަލަތައް މި ހިސާބަށް އައުމުގެ އެންމެ ބޮޑު ޒިންމާ އެޅުވީ ކުރީ ސަރުކާރުގެ ބޮލުގަ އެވެ.

އެ ގޮތުން ބާނާ މަހަށް އެކަށޭނެ އަގެއް ނުލިބުމާއި އަދި ކިރުވާ މަހަށް ގަވާއިދުން ފައިސާ ނުލިބޭ މައްސަލަ ހައްލުކުރަން އެންމެ ބޮޑު ހުރަހަކަށްވީ ސަރުކާރުން މަސް ގަނެ ޕްރޮސެސްކުރުމުގެ މަސައްކަތުގެ ތެރޭގައި ހަރަކާތްތެރިވާ ހަރަކާތްތެރިވުން އިތުރުކުރުން ކަމަށާއި، މިކަމާ ދެކޮޅަށް އެ ޕާޓީން އަބަދުވެސް އަޑުއުފުލަމުން އައި ކަަމަށް ޑިމޮކްރެޓުން ބަޔާނުގައި ވެ އެވެ.

ޑިމޮކްރެޓުން ބުނީ އެ ޕާޓީން ގަބޫލުކުރާ ގޮތުގައި، މަސްވެރިން ކިރުވާ މަހުގެ ބޮޑު އިންސައްތައެއް ގަނޑުކުރި ރޯމަހުގެ ގޮތުގައި ބޭރުކުރާހާ ހިނދަކު ރާއްޖެއަށް މަސްވެރިކަމުގެ ފުރިހަމަ ނަފާ ނުލިބޭނެ ކަމަށެވެ. އަދި، ދިވެހި މަސްވެރިންނަށް ފައިސާ ލިބޭނީ މަސް ޕްރޮސެސްކުރަން ބޭނުންކުރާ މޮޑެލް ބަދަލުކުރުމަށް ކަމަށް އެ ޕާޓީން ބުންޏެވެ.

"ދިވެހި މަސްވެރިން ބާނާ މަހަށް އެކަށޭނަ އަގެއް ހޯދައި ދިނުމަށް މިހާރު ރާއްޖޭގައި މަސް ޕްރޮސެސްކުރުމަށް ބޭނުންކުރާ މޮޑެލް ބަދަލުކޮށް، ސަރުކާރުން އެކީ މި މަސައްކަތުގެ ތެރެއިން ވީއްލި، މިހާރު ހުރި ސަރުކާރުގެ މަސް ފެކްޓްރީތަކާއި ކޯލްޑް ސްޓޯރޭޖްތައް ޕްރައިވެޓައިޒް ކުރުން ނުހަނު ބޭނުންތެރިކަމަށް މި ޕާޓީއިން ދެކެން،" ޑިމޮކްރެޓުންގެ ބަޔާނުގައި ވެ އެވެ.

ނިމިދިޔަ ރިޔާސީ އިންތިހާބަށް އެކުލަވާލީ އެ ޕާޓީގެ ރިޔާސީ މެނިފެސްޓޯގައި މަސްވެރިކަމުގެ ސިނާއަތަށް ޑިމޮކްރެޓުން ހުށަހެޅި ބަދަލުތަކުގެ ތެރޭގައި ހިމެނެނީ ސަރުކާރުން މަސްވެރިކަމުގެ ވިޔަފާރިން ނިކުމެ ވިޔަފާރިތަކާއި އަމިއްލަ މަސައްކަތްތެރިންގެ އަތް މައްޗަށް އެ މަސައްކަތް އެއްކޮށް ދޫކޮށްލުމަށެވެ.

މި އަމާޒަށް ވާސިލުވާން ޑިމޮކްރެޓުން ހުށަހެޅީ، އެމްޑީޕީގައި ތިބި އިރު ވެސް އެ ޕާޓީގެ މެމްބަރުން ހުށަހެޅި، އަދި އެމްޑީޕީގެ ކުރީ ސަރުކާރުގެ މެނިފެސްޓޯގައި ހިމަނައި އެކަށީގެންވާ ދުވެލީގައި މަސައްކަތް ނުކުރެވޭ ގޭދޮށު މަސް ފެކްޓްރީތައް ރާއްޖޭގެ އެކި ސަރަހައްދުތަކުގައި ގާއިމުކުރުމެވެ. އަދި މިގޮތަށް މަސައްކަތްކޮށްގެން މެނުވީ މަަސްވެރިކަމުގެ ފުރިހަމަ ނަފާ އެއްވެސް ބަޔަކަށް ނުލިބޭނެ ކަމަށް ވެސް އެ ޕާޓީން ބުންޏެވެ.

"...ގޭދަށު މަސް ފެކްޓްރީތައް ގާއިމުކޮށް އެތަންތަނަށް މަސްވެރިން ބާނާ މަސް ގަނެ، ޖުމްލަކޮށް ރާއްޖެއިން އެކްސްޕޯޓުކުރާ މަހުގެ ބޮޑު ބަޔަކީ ކޮންމެވެސް އެއްގޮތަކަށް ޕްރޮސެސްކުރެވި ވެލިއުއެޑް ކުރެވިގެން އެކްސްޕޯޓް ކުރެވޭ އެއްޗެއްކަމުގައި ހެދިގެން ނޫނީ މަސްވެރިކަމުގެ ފުރިހަމަ ނަފާ ދިވެހި މަސްވެރިންނަށާއި އަދި ދިވެހިރާއްޖެއަށް ވެސް ނުލިބޭނެ،" ޑިމޮކްރެޓުން ބުންޏެވެ.

ނޫސް ބަޔާން ނިންމާލަމުން ޑިމޮކްރެޓުން ބުނީ، ބާނާ މަހަށް އެކަށޭނަ އަގު ދިނުމާއި، މަހުގެ އަގު އުފުލުމާއި، ރައީސް ޑރ. މުހައްމަދު މުއިއްޒު މަސްވެރިކަމާ ގުޅޭ ގޮތުން ވެވަޑައިގެންފައިވާ ވައުދުފުޅުތައް ފުއްދެވުމުމުގެ އިތުރުން އިންޑިއަން އޯޝަން ޓޫނާ ކޮމިޝަން (އައިއޯޓީސީ) އިން ދިވެހިރާއްޖެއަށް ކަނޑައަޅާފައިވާ މަހުގެ ކޯޓާ އަހަރުން އަހަރަށް ހަމަކުރުމަށް އޮތް މަގަކީ އެ ޕާޓީގެ ސިޔާސަތުތަކަށް އެނބުރުން ކަމަށެވެ.