އެކާވީސް ވަނަ ގަރުނުގެ ބާރު ދުވެލީގައި ކުރިއަށްދާ، "ހައިޕާ" ދުނިޔޭގައި، މީހުންގެ ދުޅަހެޔޮކަމާއި އުފެއްދުންތެރިކަމަށް ބުރޫއަރުވާލާ މަކަރުވެރި ދުޝްމަނެއްގެ ބާރު އިންތިހާއަށް ގަދަވެއްޖެ އެވެ. ބާންއައުޓްގެ ނަމުން ގިނަބަޔަކު ރިއާޔަތްކުރާ މި ދުޝްމަނަކީ ވަކި ދާއިރާއެއް އިސްތިސްނާނުކޮށް، މަސައްކަތްތެރިންގެ ސްޓްރެސް ހައްދު ފަހަނައަޅުވާލާ، އެތައް މިލިއަން ބައެއްގެ ޖިސްމާނީ އަދި ނަފްސާނީ ސިއްހަތަށް ގެއްލުންދޭ އެއްޗެކެވެ.

ބާންއައުޓްގެ ބޮޑު ނައު، އަނދިރިކަމުގައި މަޑުމަޑުން އެކި ދާއިރާތަކުގެ ކަނޑުތައް ކަފަމުންދާ އިރު، މޯހިރުގައި ވަނީ ވަރުބަލިވެފައިވާ ސިކުނޑިތަކާއި ހަށިތަކެވެ. ބާންއައުޓް ފުރަތަމަ ދެކެވިފައިވަނީ މަސައްކަތުގެ މާހައުލުގެ ސަބަބުން ދިމާވާ ކަމެއްގެ ގޮތުގަ އެވެ. ވަޒީފާ އާއި ބޮޑެތީންގެ ޑިމާންޑްތައް މަތިވުމާއި އެކަންކަން ނުނިންމުމުން ނުވަތަ ނުނިންމޭނެކަމުގެ ބިރުގެ ސަބަބުން ސިކުނޑިއަށް އަންނަ ފިއްތުންތަކާ އެވެ. ނަމަވެސް މިހާރު މި މައްސަލަ ވަނީ ފުޅާވެ، ވަޒީފާ އަދާކުރާ މީހުންގެ އިތުރުން، ދަރިވަރުންނާއި ބެލެނިވެރިންނާއި ފުރާވަރުގެ ކުދިންނަށް ވެސް އޭގެ އަސަރުކުރަން ފަށާފަ އެވެ.

ބާންއައުޓްގެ އަލާމާތްތައް

ބާންއައުޓް އަކީ ހަމައެކަނި ވަރުބަލިކަމެއް ނޫނެވެ. އެއީ ވަރުބަލިކަމުގެ އިތުރުން ސާފުކޮށް ވިސްނަން އުނދަގޫވުމާއި، ކުރިން ޝައުގުވެރިކަން ހުރި ހަރަކާތްތަކުން ދުރުވުމާއި، ކާމިޔާބީގެ އިހުސާސް ކުޑަވުން ފަދަ ގިނަ ކަންކަން ހިމެނޭކަމެކެވެ. ބާންއައުޓްގެ އާންމު އަލާމާތްތަކުގެ ތެރޭގައި މެދުނުކެނޑި އުނދަގޫތަކެއް އިހްސާސްވުމާއި، މޮޓިވޭޝަން ނެތުމާއި، އުފެއްދުންތެރިކަން ދަށްވުން ހިމެނެއެވެ. އަދި ބައެއް ހާލަތްތަކުގައި ބޮލުގައި ރިއްސުމާއި، ނުނިދުމާއި، ދިފާއީ ނިޒާމު ބަލިކަށިވުން ފަދަ، އާންމު ސިއްހަތަށް ނުރައްކާތެރި ޖިސްމާނީ އަލާމާތްތައް ވެސް ފެނިދާނެ އެވެ.

މީގެ އިތުރުން ނަފުސާނީ ގޮތުން ލިބޭ ގެއްލުން ވެސް ކުޑައެއް ނޫނެވެ. ބާންއައުޓްވެފައިވާ މީހުންނަށް އެކަހެރިކަމާއި އަގެއް ނެތްކަމުގެ އިހުސާސެއް ކުރެވިދާނެ އެވެ. އަދި އެމީހުންގެ އުނދަގޫތައް ވަށައިގެން ތިބި މީހުންނަށް ފަހުމު ނުވާނެ ކަމަށް ގަބޫލުކުރެވިދާނެ އެވެ. އަދި އެކަށީގެންވާ ފިޔަވަޅުތަކެއް ނޭޅިއްޖެ ނަމަ ދުވަހަކަށް ދުވަހެއް ހާލަތު ގޯސްވަމުން ގޮސް ނަފުސާނީ ދުޅަހެޔޮކަމަށް ބޮޑެތި ގެއްލުންތައް ވާނެ އެވެ.

ބާންއައުޓުން އަރައިގަތުމަށް އެޅޭނެ ފިޔަވަޅުތައް

1. ބާންއައުޓްގެ އަލާމާތްތައް ދެނެގަތުން

• އަލާމާތްތައް ދެނެގަތުން: ވަރުބަލިވުން، ސިނިސިޒަމް، ޕާފޯމަންސް ދަށްވުން، އެކަނިވެރިވާން އެދުން، އަދި އިމޯޝަނަލް ބަދަލުތައް އައުން.

• މައްސަލަ ގަބޫލުކުރުން: ބާންއައުޓަކީ ސަމާލުކަން ދޭންޖެހޭ ހަގީގީ ކަންބޮޑުވުމެއްކަން ދެނެގަތުން

2. ޒިންމާތައް ވަޒަންކުރުން

• ތިމާގެ މަސައްކަތުގެ ބުރަ ވަޒަންކުރުން: ތިމާގެ ސިކުނޑީގެ ހަމަޖެހުމަށް އެންމެ ބޮޑަށް ބާރުފޯރުވާ މަސައްކަތްތަކާއި ޒިންމާތައް ދެނެގަތުން.

• ބައެއް މަސައްކަތްތައް ހަވާލުކުރުން ނުވަތަ ނައްތާލުން: ކޮންމެހެން ބޭނުން ނުވާ ނުވަތަ ކުދިކުދި މަސައްކަތްތައް އެހެން މީހަކާ ހަވާލުކުރުން ނުވަތަ އިސްކަންދޭ ކަންކަމާ ނުގުޅޭ މަސައްކަތްތައް ނުވަތަ މަރުހަލާތައް ނައްތާލުން

3. ހަގީގީ ލަނޑުދަނޑިތަކާއި އުންމީދުތައް ކަނޑައެޅުން

• މާބޮޑަށް ކޮމިޓް ކުރުމުން ދުރުހެލިވުން: ވަކި މުއްދަތެއްގެ ތެރޭގައި ހާސިލް ކުރެވޭނެ ކަންކަމާ މެދު ހަގީގީ ނުވަތަ "ރިއަލިސްޓިކް" ކޮށް ވިސްނުން

• ކުދިކުދި ފިޔަވަޅުތަކަށް ޓާސްކްތައް ބަހާލުން: ބޮޑެތި ޓާސްކްތައް މެނޭޖްކުރެވޭ ބައިތަކަށް ބަހާލައިގެން ކުޑަކުރުން.

4. މަސައްކަތާއި ދިރިއުޅުމުގެ ވަކި ހައްދުތަކެއް ގާއިމުކުރުން

• ދުވަހުގެ އުސޫލުތައް އުފެއްދުން: މަސައްކަތާއި، ބްރޭކްތަކާއި، އަމިއްލަ ހަރަކާތްތަކަށް ވަކި ވަގުތުތަކެއް ކަނޑައެޅުން.

• ޑިސްޓްރެކްޝަންތައް ދެނެގަތުން: މަސައްކަތްކުރާ ވަގުތު މަސައްކަތާ ގުޅުން ނެތް މުވާސަލާތީ ތަކެއްޗާއި ދުރުހެލިވުން

5. ސިއްހަތަށް އިސްކަންދިނުން

• ނިދުމަށް އިސްކަންދިނުން: ކޮންމެ ރެއަކު ވެސް ސިކުނޑިއާއި ހަށިގަނޑުގެ ތާޒާކަމަށް އެކަށީގެންވާ އަރާމު ނިދި ލިބޭތޯ ޔަގީންކުރުން.

• ގަވާއިދުން ކަސްރަތުކުރުން: ސްޓްރެސް ކުޑަކުރުމަށާއި ހަކަތަ އިތުރުކުރުމަށް ކަމުދާ ޖިސްމާނީ ހަރަކާތްތަކުގައި ބައިވެރިވުން.

• ބެލެންސްޑް ޑައިޓެއް: ދުޅަހެޔޮކަމަށް އެހީތެރިވެދޭ ސިއްހަތަށް ފައިދާހުރި ކާނާތައް ބޭނުންކުރުން

6. ސްޓްރެސް-ރިޑަކްޝަން ޓެކްނިކްސްތައް ބޭނުންކުރުން

• މައިންޑްފުލްނެސް އަދި މެޑިޓޭޝަން: ސްޓްރެސް ކުޑަކުރުމަށްޓަކައި މާއިންޑްފުލްނެސް ޕްރެކްޓިސްކުރުން.

• ފުން ނޭވާލާ ކަސްރަތުތައް: ނާރުތަކުގެ ނިޒާމު ހަމައަކަށް އެޅުވުމަށް ފުން ނޭވާލާ އުކުޅުތައް ބޭނުންކުރުން.

• ހޮބީތަކުގައި ބައިވެރިވުން: މަސައްކަތުން ބޭރުގައި އުފަލާއި އަރާމު ލިބޭ ހަރަކާތްތައް ކުރިއަށް ގެންދިއުން.

7. އިޖްތިމާއީ އެހީތެރިކަން ހޯދުން

• މީހަކާ ވާހަކަ ދެއްކުން: ތިމާގެ އިހްސާސްތައް ތިމާ އިތުބާރުކުރާ ރައްޓެއްސަކާ، އާއިލާގެ މެމްބަރަކާ ނުވަތަ އެކުވެރިއަކާ ހިއްސާކުރުން.

• ޕްރޮފެޝަނަލް އެހީތެރިކަން ހޯދުން: ބޭނުންވެއްޖެނަމަ ތެރަޕިސްޓެއް ނުވަތަ ކައުންސެލަރަކާ ވާހަކަ ދެއްކުން.

8. ގަވާއިދުން ބްރޭކް ނެގުން

• މައިކްރޯ ބްރޭކްސް: މަސައްކަތުގެ ތެރޭގައި ކުރު ބްރޭކްތަކެއް ނަގައިގެން ސްޓްރެޗްކުރުން، ހިނގާލުން ނުވަތަ ސިކުނޑި ހުސްކޮށްލުން

• ޗުއްޓީ: މަސައްކަތާއި މުޅިން ގުޅުން ކަނޑާލުމަށް ޕްލޭންކޮށް ޗުއްޓީ ނެގުން.

9. ބާންއައުޓަށް ހުށަހެޅުން މަދުކުރުން

• ޓްރިގާސް ދެނެގަތުން: ތިބާގެ ބާންއައުޓް އަށް މެދުވެރިވާ ހާލަތްތައް ދެނެގަނެ، އެކަންކަމުން ދުރުހެލިވާނެ ނުވަތަ އެކަމާ ކުރިމަތިލާނެ ގޮތްތައް ހޯދުން.

ނިންމުން

ބާންއައުޓްގެ ހިޔަނި މުޖުތަމައުއަށް އެޅެމުންދާއިރު، މި ގޮންޖެހުމާ ކުރިމަތިލުމަށް ފަރުދުންނާއި މުއައްސަސާތައް އެއްބައިވަންތަވުމަކީ މުހިންމު ކަމެކެވެ. ބާންއައުޓްގެ ފުޅާކަން ގަބޫލުކޮށް، އެކަމާ ދެކޮޅަށް މަސައްކަތް ކުރުމަށް ފިޔަވަޅުތައް އެޅުމުން، ދުޅަހެޔޮ އަދި ދެމެހެއްޓެނިވި މުސްތަގުބަލެއް އުފެއްދިދާނެއެވެ. ބާންއައުޓްގެ ހުޅުކޮޅު ނިއްވާލައި، ދިރުމާއި މަގުސަދުން ފުރިފައިވާ ދިރިއުޅުމަކަށް އުންމީދު ކުރެވޭނީ އޭރުންނެވެ.