މިއީ ދުޝްމަނުން ހަމަލާދޭން ފެށުމާއެކު ހަމަލާ އައި ދިމާއަށް ހަމަލާދެއްވައި، ދުޝްމަނުން ސިއްސުވައި ފަހަތަށް ޖެއްސެވި ނަސްރުގެ ދުވަހުގެ ބަތޮލު ޝަހީދު ހުސައިން އާދަމްގެ ފަހުގެ އާދޭހެވެ. ދިވެހި ލަސްކަރު އޮތީ ބަދަހިކަމާއެކު ކޮންމެ ވަގުތަކު ދުޝްމަނުންނާ ކުރިމަތިލުމަށް ތައްޔާރަށްކަމުގެ މެސެޖުތައް އަތުގައި އޮތް ބަޑީގެ ވަޒަންތަކުން ދުޝްމަނުންނާ ހަމައަށް ފޮނުއްވަމުން ފަސްޖެހުމެއް ނެތި ޖިހާދުކުރެއްވުމަށްފަހު ޝަހީދުވުމާ ހަމައަށް ވިދާޅުވަމުން ގެންދެވި އެއް ޖުމުލައެވެ.

ނަސްރުގެ ދުވަހުގެ ބަތޮލު ހުސައިން އާދަމް ޝަހީދުވަމުން ކުރައްވަމުން ގެންދެވި މިދެންނެވުނު އާދޭސް އިވޭ ކޮންމެ ފަހަރަކު އަޅުގަނޑުގެ ހިތަށް ވަންނަ ކީރިތި ޤުރުއާނުގެ އާޔަތެއް އޮވެއެވެ. އެއީ އަންފާލް ސޫރަތުގެ 60 ވަނަ އާޔަތެވެ. "އެއުރެންނާ ދެކޮޅަށް ތިޔަބައިމީހުންނަށް ކުޅަދާނަވީހައި ބާރެއް ތިޔަބައިމީހުން ތައްޔާރުކުރާށެވެ!..."

ޝަހީދު ހުސައިން އާދަމްގެ އެ އާދޭހުގެ ބޭރުފުށާއި ސަބަބު ގުޅިފައި އޮތީ، އެދުވަހުގެ ހަނގުރާމަ އާއި އެ ދުވަހުގެ ހާދިސާއާ ކަމަށްވެދާނެ އެވެ. ހުސައިން އާދަމްގެ އެއާދޭހަކީ އަޅުގަނޑުގެ ނަޒަރުގައި ގައުމީ ޝިޢާރެކެވެ. އެދުވަހު ޝަހީދު ވެގެންދިޔަ ބަތޮލުންގެ ޝިޢާރެވެ. އެބަތޮލުން ފަހުތިބީންނަށް ކުރެއްވި ގައުމީ އިލްތިމާސެވެ. "ވަޒަން ހުސްވަނީ މެގަޒިނެއް ދެއްވާ" މި ޝިޢާރަކީ، ކޮންމެ ނަސްރުގެ ދުވަހެއްގައި އައުކުރަންޖެހޭ މުހިންމު ޝިޢާރަކަށް ވަނީ އެހެންވެގެންނެވެ.

އެ ޖުމުލަތައް ވިދާޅުވެފައިވަނީ ކޮންމެ ސަބަބަކާ ހުރެގެން ނަމަވެސް އަޅުގަނޑުމެންގެ ނަސްރުގެ ދުވަހުގެ ޤައުމީ ބަތޮލުގެ ދޫފުޅުން ތަކުރާރުކޮށްނެވެ. ދިވެހިންގެ ލެޔާއި ނަސްރުގެ ދުވަސް ގުޅިފައި އޮތް މިންވަރާއި، އެދުވަހު ދިވެހި ގައުމުގެ ދީނާއި މިނިވަންކަމަށްޓަކައި ޝަހީދުވެދިޔަ ބަތޮލުންނަށް ދިވެހިންގެ ހިތުގައި ދެވިފައިވާ މަތިވެރި މަގާމާމެދު ވިސްނާއިރު، އެދުވަހުގެ ބަތޮލުންގެ ހަބަރުތަކާއެކު ދިވެހިންނަށް އަންނަ ރޫޙާއި ޖޯޝާއި ގައިން ނަގާ ހީބިއްސާ މި ޖުމުލަތައް ލާމެހިފައި އޮންނަ ކަމަށްޓަކައި މި ޝިއާރުގައި ވަނީ ގައުމީ ލެއިން ފުރާނައެޅިފަ އެވެ.

އަދާވާތްތެރިންނަކީ ހަނގުރާމަކުރުމުގައި ދެމިތިބޭ ބަޔެކެވެ. އަލްބަޤަރާ ސޫރަތުގެ 217 ވަނަ އާޔަތުގައި އަންގަވާފައިވާ ފަދައިންނެވެ. "ތިޔަބައިމީހުންގެ ދީނުން ތިޔަބައިމީހުން ބޭރުކޮށް ކާފިރުކަމަށް ތިޔަބައިމީހުން ރައްދުކޮށްފުމަށް ދާނދެން ތިޔަބައިމީހުންނާ ހަނގުރާމަ ކުރުމުގައި އެމީހުން ފިލައިނުދާނެއެވެ." އެހެންވީމާ އަހަރެމެންގެ އަދާވާތްތެރިން ހަނގުރާމަކުރުމުގައި ދެމިތިބޭނެކަމީ ޝައްކެތް އޮތްކަމެއް ނޫނެވެ. ހަނގުރާމައަކީ އަބަދު ކަނޑިއާއި ބަޑިން ކުރެވޭ އެއްޗެއް ނޫނެވެ.

އުދުވާނީ ހަމަލާއަކީ ބަޑިހިފައިގެން އަރާ ބަޔަކު ތަޅައިގަތީމާ ދިވެހި ދަރިންތަކެއްގެ ލޭ އޮހޮރިގެންދިއުން އެކަންޏެއް ނޫނެވެ. އުފެއްދުންތެރިކަން އިތުރުކުރެވި، ފުދުންތެރި އިގުތިސޯދަކާ ދިމާއަށް ދިއުމުގައި، ކޮރަޕްޝަނާއި ހިޔާނާތުގެ އަސަރުތަކަކީ އުދުވާނީ ބޮޑެތި ހަމަލާތަކެވެ. ބައެއް މަގާމުތައް އަދާކުރައްވާ ބޭފުޅުން ދައުރު ހަމަވާއިރު، މިލިޔަން މިލިޔަން ޑޮލަރުން އެކައުންޓަށް ވަދެހުއްޓައި ފެންނައިރު، އެއިން ކަމެއް ޝަރީޢަތަށް ސާބިތުނުވެ އެދަނީ ވަޒަން ހުސްވެ މެގަޒިނެއް ބޭނުންވެފައިވާތީ އެވެ.

ރާއްޖޭގެ ކަނޑުގެ ސަރަހައްދުން އެތެރެއަށް ބަސްތާތަކުން ޝިޕްމަންޓްތަކުން މަސްތުވާތަކެތި އެތެރެކުރެވި، ފަޅު ރަށްރަށުގައި ގުދަންކުރެވުމުގެ އަމަލުތައް އިންތިހާއަށް ތަކުރާރުވަމުން އެދަނީ، ފާރަވެރިންގެ ބެލެހެއްޓުންތެރިކަމުން ވަޒަން ހުސްވެ، ރޭވުންތެރިކަމުގައި މެގަޒިނެއް ނެތީމަ އެވެ.

ފޭރުންތަކާއި ވައްކަންތައް އާންމުވެ މާރާމާރީއާއި މީހުން މެރުމާއި ގެއްލުވާލުމުގެ އަމަލުތަކުން މުޖުތަމައު ނާމާންވެ، އާންމުން ހިނގާބިނގާވެ އުޅުމަށް ޖެހިލުންވެ މޭކަރާ ހިސާބުގައި މިވަނީ، އަމަން ބެލެހެއްޓުމުގެ ސްޓްރެޓެޖީތަކުން ވަޒަން ހުސްވެފައިވާތީ އެވެ.

ނަސްރު ހޯދަންވެފައިވަނީ ވަރަށް ގިނަ ދިމާތަކުންނެވެ. އަހަރެމެން ދިވެހިންނަކީ ވެސް އެހެން ބަޔަކަށް ބަރޯސާވުމަކާ ނުލައި، އަމިއްލަ ހަރަދުގައި އަހަރެމެންގެ މަގުތަކާއި ބުރިޖްތައް ހެދުމުގެ ގާބިލުކަން ހުރި އިގުތިސޯދީ ގޮތުން ނަސްރު ލިބިފައިވާ ބަޔަކަށް ވާންވެއްޖެ އެވެ. ދިވެހިން ޒަމާނުއްސުރެ ގެންގުޅުނު ރީތި އާދަތަކާއި، އިޖުތިމާއީ ހަރުދަނާ އުސޫލުތައް އަލުން އަނބުރާ ގެނެވި އިޖުތިމާއީ ގޮތުން ނަސްރު ލިބިފައިވާ ބަޔަކަށް ވާންވެއްޖެ އެވެ. އަޅުގަނޑުމެންނަކީ ކަމަށް ކަމޭހިތައި، ޒިންމާއަދާކުރާ، އަނެކުންގެ ހައްގުތަކަށް ރައްކާތެރިވާ، އެހެން މީހުންގެ ޙުރުމަތަށް ގަދަރުކުރާ، ބަޔަކު ކަމުގައި ވާންވެއްޖެ އެވެ.

އާދޭހެވެ! އިއްޔެއަކީ ނަސްރުގެ ދުވަހެވެ. ހުސްވެފައިވާ ވަޒަން ހޯދުމަށް އަތުކުރި އޮޅާލަންޖެހޭ ދުވަހެވެ. ހުރިހާ ދިމާއަކުން ހުރިހާ ދާއިރާއަކުން ތަރައްގީ އާއި ތަހުޒީބުގެ އިތުރު މެގަޒިންތައް ހޯދައި، ގައުމު ތަމައްދުނުގެ މަގުގައި ކުރިޔަށް ގެންދިއުމަށް ރޫހު އާލާކުރާންވީ ދުވަހެވެ. ޣާފިރު ސޫރަތުގެ 51 ވަނަ އާޔަތުގައި މާތް ﷲ ވަޙީކުރައްވާފައިވާ ބަސްފުޅުން އުންމީދު ލިބިގަންނަމުންނެވެ. "ހަމަކަށަވަރުން، ތިމަންރަސްކަލާނގެ ރަސޫލުންނަށާއި، އީމާންވި މީހުންނަށް، ދުނިޔޭގެ ހަޔާތުގައްޔާއި، ގިޔާމަތް ދުވަހުގައި ނަސްރު ދެއްވާހުށީމެވެ"