31 އޮކްޓޯބަރު 2022 - 13:18 0
މުހައްމަދު ވިޝާމް
އާސަންދައިގެ ހިދުމަތް ލިބޭ ބޭސް ފިހާރައެއް: އާސަންދައިން ކުރާ ހޭދަ ކުޑަކުރަން ސަރުކާރުން ވަނީ ރާވާފައި. -ފައިލް ފޮޓޯ: އަދަދު
31 އޮކްޓޯބަރު 2022 - 13:18 0
ދައުލަތުން ކުރާ ހަރަދުތަކުން ވަމުންދާ އިސްރާފުތައް ކުޑަކޮށްގެން، އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ދައުލަތުގެ ބަޖެޓުން ތިން ބިލިއަން ރުފިޔާ ސަލާމަތްވާނެ ކަމަށް އަންދާޒާކޮށްފި އެވެ.
އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް މިއަދު ހުށަހެޅި 42.6 ބިލިއަން ރުފިޔާގެ ދައުލަތުގެ ބަޖެޓުގައި، 40.557 ބިލިއަން ރުފިޔާ ހަރަދުގެ ގޮތުގައި ހިނގާނެ ކަމަށް ވަނީ އަންދާޒާކޮށްފަ އެވެ.
ހިލޭ އެހީ ހިމެނޭހެން 2023 ގައި 32.098 ބިލިއަން ރުފިޔާ އާމްދަނީގެ ގޮތުގައި ލިބޭނެ ކަމަށް ލަފާކޮށްފައިވާއިރު، ބަޖެޓު ދެކޮޅު ޖައްސަނީ އާމްދަނީ އިތުރުކުރަން ޓެކްސް ބޮޑުކުރުމާއެކު ހަރަދު ކުޑަކުރުމުގެ ވަރުގަދަ ފިޔަވަޅުތަކަކާއެކު އެވެ.
އެގޮތުން، ދައުލަތުގެ ރިކަރަންޓު ހަރަދު އާމްދަނީން ފޫބެއްދޭނެ ގޮތަށް އަންނަ އަހަރުގެ ބަޖެޓު ފަރުމާކޮށްފައިވާއިރު، ހަރަދު ކުޑަކުރުމުގެ ފިޔަވަޅުތަކުން ގާތްގަނޑަކަށް ތިން ބިލިއަން ރުފިޔާ ސަލާމަތް ކުރަން ވަނީ އަމާޒުހިފައިފަ އެވެ.
ފިނޭންސް މިނިސްޓްރީން ހުށަހެޅި ބަޖެޓުގައި، ހަރަދަށް ގެންނަން ހުށަހަޅާ ބަދަލުތަކުގެ ތެރޭގައި، ތެލަށްދެވޭ ސަބްސިޑީ ޓާގެޓެޑް ސަބްސިޑީއަކަށް ބަދަލުކުރުމާއި، އާސަންދަ އާއި ބޭސްގަތުމަށްކުރާ ހަރަދުކުޑަކުރުން ހިމެނެ އެވެ.
ފިނޭންސުން އަންދާޒާކުރާ ގޮތުގައި، ތެލުގެ ސަބްސިޑީ ދިނުމުގެ އުސޫލަށް ގެންނަ ބަދަލުން އެއް ބިލިއަނަށް ވުރެ ގިނަ ރުފިޔާ އަންނަ އަހަރު ސަލާމަތް ކުރެވޭނެ އެވެ. އާސަންދައަށް ކުރޭ ހޭދަ ކުޑަކުރަން ސިޔާސަތުގެ ބަދަލުން 460 މިލިއަން ރުފިޔާ ކުޑަކުރެވޭއިރު، ޕޭ ހާމަނައިޒޭޝަން ނުވަތަ މުސާރަ އެއް ހަމަކޮށްގެން 1.5 ބިލިއަން ރުފިޔާ ބަޖެޓުން ސަލާމަތް ކުރެވޭނެ ކަމަށް ބުނެފައިވެ އެވެ.
ފިނޭންސުން އަންދާޒާކުރާ ގޮތުގައި، މި ފިޔަވަޅުތަކާއެކު އަންނަ އަހަރުގެ ބަޖެޓު ޑެފިސިޓު ހުންނާނީ 8.459 ބިލިއަން ރުފިޔާގަ އެވެ.
ނަމަވެސް، ހަރަދު ކުޑަކުރުމުގެ ފިޔަވަޅުތައް ނޭޅިއްޖެނަމަ، އެ އަދަދު 14.459 ބިލިއަން ރުފިޔާއަށް އަރާނެ ކަމަށް ފިނޭންސުން ވަނީ ލަފާކޮށްފަ އެވެ.
ރައީސް އިބްރާހިމް މުހައްމަދު ސޯލިހުގެ ދައުރުގެ ފަހު އަހަރަށް ހުށަހަޅާފައިމިވަނީ 42.6 ބިލިއަން ރުފިޔާގެ ބަޖެޓެކެވެ.
ބަޖެޓުގެ 40.557 ބިލިއަން ރުފިޔާ ހަރަދުގެ ގޮތުގައި ހިނގާނެ ކަމަށް ބެލެވޭއިރު އޭގެ ތެރެއިން އެންމެ ގިނަ ބޮޑު ބައެއް ހިއްސާކުރަނީ މުވައްޒަފުންގެ މުސާރަ ހަރަދެވެ. އެގޮތުން، ސިއްހީ ދާއިރާގެ މުވައްޒަފުންގެ މުސާރަ އަންނަ އަހަރު ބޮޑުކުރުމަށް ނިންމައި، އެކަމަށް 493.2 މިލިއަން ރުފިޔާ ވަނީ ހިމަނާފަ އެވެ.
ސަބްސިޑީ ސިޔާސަތަށް ގެންނަ ބަދަލާ އެކު އާސަންދައަށް ކުރާ އިސްރާފާއި ދައުލަތުން ދޭ އެހެން ސަބްސިޑީތަކުން ސަލާމަތްކުރެވޭ ފައިސާއާ އެކު ހަރަދުތައް ކުޑަވާނެ ކަމަށް ވަނީ ލަފާކޮށްފަ އެވެ. އެއާ އެކު، ރައީސްގެ ވައުދުތައް ފުއްދުމަށް ކުރިއަށްގެންދާ ޕީއެސްއައިޕީ މަޝްރޫއުތަކަށް 8.427 ބިލިއަން ރުފިޔާ ދާނެ ކަމަށް ވަނީ އަންދާޒާކޮށްފަ އެވެ.
ހިލޭ އެހީ ހިމެނޭހެން 2023 ގައި 32.098 ބިލިއަން ރުފިޔާ އާމްދަނީގެ ގޮތުގައި ލިބޭނެ ކަމަށް ވަނީ އަންދާޒާކޮށްފަ އެވެ. ޓެކްސް ރޭޓުތައް ބޮޑުކުރުމާ އެކު އަންނަ ބަދަލުތަކުގެ ސަބަބުން 3.6 ބިލިއަނުގެ އާމްދަނީ އިތުރުވާނެ ކަމަށް ބެލެވެ އެވެ. އެގޮތުން، ޓެކްސް އާމްދަނީގެ ގޮތުގައި އަންނަ އަހަރު 23.539 ބިލިއަން ލިބޭނެ ކަމަށް ވަނީ ލަފާކޮށްފަ އެވެ. އަދި، އެހެނިހެން އާމްދަނީގެ ގޮތުގައި 6.352 ބިލިއަން ލިބޭނެ ކަމަށް ބެލެވެ އެވެ.
Comment