25 އޮގަސްޓު 2022 - 19:29 0
އައިޝަތު ނުޒުހާ
އަމީނީ މަގު؛ މަގު ހެދުމުގެ މަސައްކަތް އަންނަ އަންގާރަ ދުވަހު ފަށަން އާރްޑީސީން އަންނަނީ ތައްޔާރުވަމުން-- ފޮޓޯ: މުހައްމަދު ޝާބިން/ އަދަދު
25 އޮގަސްޓު 2022 - 19:29 0
މާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން އަމީނީ މަގު ހެދުމުގެ މަސައްކަތް ފެށުމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އިން ތައްޔާރުވެއްޖެ އެވެ.
ޕްލޭނިން މިނިސްޓްރީން އަމީނީ މަގުގެ މަސައްކަތް އާރްޑީސީއާ ހަވާލުކުރީ 84 މިލިއަން ރުފިޔާއަށެވެ.
އާރްޑީސީގެ މީޑީއާ އޮފިޝަލަކު މި ނޫހަށް ވިދާޅުވީ އެ މަގުގެ އަމަލީ މަސައްކަތް މި މަހުގެ 30 ވަނަ ދުވަހު ފަށަން ވާން ޖެހޭ އެންމެ ފަހުގެ ތައްޔާރީތައް މިހާރު ވަމުން އަންނަ ކަމަށެވެ.
"މަސައްކަތް ފެށުމަށް ވާން ޖެހޭ އެންމެ ފަހުގެ ތައްޔާރީތައް މިހާރު ވަމުން އަންނަނީ، އެގޮތުން ބޭނުންވާ ވެހިކަލް މެޝިނަރީސް ހޯދުމާއި މީހުން ނެގުން ފަދަ ކަންކަން،" އޮފިޝަލް ވިދާޅުވި އެވެ.
އާރްޑީސީން މި މަސައްކަތް ފަށަން ތައްޔާރުވެފައިވާއިރު، މި މަސައްކަތް ބޮޑު އަގުގައި ހަވާލުކުރި މައްސަލަ އެންޓި-ކޮރަޕްޝަން ކޮމިޝަނަށް މިދިޔަ މަހު ވަނީ ހުށަހަޅާފަ އެވެ. މައްސަލަ އޭސީސީއަށް ހުށަހެޅީ ކުރިން 39 މިލިއަން ރުފިޔާއަށް ސިޓީ ކައުންސިލުން އެ މަސައްކަތް ކުރަން އުޅެނިކޮށް، ސަރުކާރުން 84 މިލިއަން ރުފިޔާއަށް އެ މަޝްރޫއު އާރްޑީސީއާ ހަވާލުކުރުމުންނެވެ.
އަމީނީ މަގުގެ މައްސަލަ އެންޓި-ކޮރަޕްޝަން ކޮމިޝަނަށް ހުށަހަޅާފައިވާކަން އެ ކޮމިޝަނުގެ ސީނިއާ ކޮމިޔުނިކޭޝަންސް ޑިރެކްޓަރު ނިޝާން މުހައްމަދު ދީދީ "އަދަދު" އަށް ޔަގީންކޮށް ދެއްވި އެވެ.
އެހެންނަމަވެސް, އޭސީސީން މައްސަލަ ބަލަމުން އަންނަ ކަން ރަސްމީކޮށް އާރްޑީސީއަށް އަންގާފައި ނުވާ ކަމަށާއި އެހެންކަމުން އެ މަސައްކަތް ތާވަލް ކުރެވިފައިވާ ގޮތަށް ކުރިއަށް ދާނެ ކަމަށް އާރްޑީސީގެ އޮފިޝަލް ވިދާޅުވި އެވެ.
"އާރްޑީސީއަކީ މި މަސައްކަތުގެ ކޮންޓްރެކްޓަރުން، ވަކި ދުވަހަކަށް ނިންމަން ހަވާލުކޮށްފައި އޮތް މަޝްރޫއަކަށް ވާތީ، ހުއްޓާލަން ރަސްމީކޮށް ނާންގާ ހިނދަކު މަސައްކަތް ކުރިއަށް ދާނީ،" އޭނާ ވިދާޅުވި އެވެ.
އަމީނީ މަގު ތަރައްގީ ކުރުމުގެ މަސައްކަތް އާރްޑީސީއާ ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށެވެ.
އަމީނީ މަގުގެ މަސައްކަތް ޕްލޭނިން މިނިސްޓްރީން އާރްޑީސީއާ ހަވާލުކުރުމާ ގުޅިގެން މާލޭ ސިޓީ ކައުންސިލްގައި ހިމެނޭ އެމްޑީޕީ މެންބަރުން ހިމެނޭހެން ވަނީ ބޮޑެތި ތުހުމަތުތަކެއް ކޮށްފަ އެވެ.
މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު އެއިރު ވިދާޅުވި ގޮތުގައި ކައުންސިލަށް އާރްޑީސީން ހުށަހެޅި އަގަށް ވުރެ ދެ ގުނަ ބޮޑުކޮށް އަދި ވެފައި އޮތް "އެއްބަސްވުން ބާތިލް ކުރުމަށް ފަހު" އެ މަސައްކަތް އަލުން ހަވާލުކުރުމުން އެ ކަމުގައި ކޮރަޕްޝަންގެ އަމަލުތައް ހިމެނެ އެވެ.
"އަޅުގަނޑުމެންނާ އާރްޑީސީއާ އެއްބަސްވީ 39 މިލިއަން ރުފިޔާއަށް އަމީނީ މަގު ހަދަން، އަޅުގަނޑުމެންނެއް ނޫން އަގު ހުށަހެޅީ، އާރްޑީސީން އަޅުގަނޑުމެންނަށް ފޮނުވި ބީއޯކިއު، އެއީ އަދި އެ ބޭފުޅުންގެ ޕްރޮފިޓް އެއަށް ލާފައި؛ ލޭބާ ކޯސްޓު، މެޓީރިއަލް ކޯސްޓުގެ އިތުރުން ޕްރޮފިޓް އެއަށް ލާފައި 39 މިލިއަން ރުފިޔާއަށް އަމީނީ މަގު ނިންމަން،" މުއިއްޒު ކުރިން ވިދާޅުވެފައިވެ އެވެ.
އެހެންނަމަވެސް، އާރްޑީސީން ވަނީ އެ ތުހުމަތުތައް ދޮގުކޮށް، އެ އަގު ހުށަހެޅި ނަމަވެސް، އެ އަގުގައި އެންމެ ފެންވަރު ރަނގަޅަށް މަގު ނުހެދޭނެ ކަމަށް އޭރު ވެސް ސިޓީ ކައުންސިލަށް އަންގާފައިވާނެ ކަމަށް ބުނެފަ އެވެ.
"އަޅުގަނޑަށް ދިން ބަޖެޓަކީ 40 މިލިއަނަށް ވުރެ ބޮޑު ނުވާނެހެން ގެންދަން، އޭރު ވެސް އަޅުގަނޑު ދެންނެވިން، ސްޓޯމް ވޯޓާ މެނޭޖްމަންޓް ސިސްޓަމްއާއި ޑީވޯޓަރިންއާ ވެސް އެކުގައި ނޫންހޭ ރައްޔިތުންނަށް ދިމާވެގެން މި އުޅޭ ފެންބޮޑުވުމުގެ ދަތިތަކުން ސަލާމަތް ވާނީ،" އާރުޑީސީގެ މެނޭޖިން ޑިރެކްޓަރު މޫސާ އަލީ މަނިކު ވިދާޅުވެފައިވެ އެވެ.
އަމީނީ މަގު ހަދަން މާލެ ސިޓީ ކައުންސިލާއި އާރުޑީސީއާއެކު އެއްބަސްވުމެއް އޮތް ކަމަށް މޭޔަރު ވިދާޅުވިޔަސް އެފަދަ އެއްބަސްވުމެއް ވެސް ނޯންނާނެ ކަމަށް އާރްޑީސީން ބުންޏެވެ.
މި ލިޔުމާ ގުޅޭ ލިޔުންތައް
Comment