ކުރީގެ ރައީސް އަބްދުﷲ ޔާމީނާއި ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމް ގުޅިގެން ހިންގި ކަމަށް ބުނާ ވ. އާރަށް ވިއްކުމުގައި ހިންގި ހިޔާނާތުގެ މައްސަލާގައި, ދައުލަތުން ހުށަހެޅި ހެއްކެއްގެ ޗެއިން އޮފް ކަސްޓަޑީގެ ތާރީހަކަށް 2026 ވަނަ އަހަރުގެ ތާރީހެއް އޮތް ކަން ފެންމަތިވެއްޖެ އެވެ.

މި މައްސަލާގައި ޔާމީންގެ މައްޗަށް ދައުވާ ކުރަނީ އެ ރަށް ކުއްޔަށް ދޫކުރުމުން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރައްވައި އަދި އެ ފައިސާ ލޯންޑާ ކުރެއްވި ކަމަށް ތުހުމަތުކޮށެވެ. އެ މައްސަލާގައި މިހާރު ކުރިއަށް ދަނީ ދައުލަތުން ހުށަހަޅާފައިވާ ހެކިބަސް ނެގުމުގެ މަރުހަލާ އެވެ.

މިއަދު ކްރިމިނަލް ކޯޓުގައި ބޭއްވި އަޑުއެހުމަށް ހެކިބަސް ނަގަން ހާޒިރުކުރީ ޑިޕޮސިޓް ސްލިޕްތަކާއި ސިޓީތަކުގައި ކޮށްފައިވާ ސޮއިތަކުގެ ސައްހަކަން ހޯދަން ޑޮކިއުމަންޓް އެގްޒަމިނޭޝަން ރިޕޯޓް ތައްޔާރު ކުރި ފުލުސް އޮފިސަރެވެ.

ދައުލަތުން ކުރި ސުވާލެއްގެ ޖަވާބު ދެމުން އެ ފުލުސް މީހާ ބުނެފައިވަނީ އެ ހެކިތައް އޭނާއާ ހަމައަށް ގެނެސްފައިވަނީ ހުރިހާ އިޖުރާއަތްތަކެއް ފުރިހަމަ ކުރުމަށް ފަހު ކަމަށެވެ. އަދި އޭނާއާ ހަމައަށް ގެންނާނީ ވެސް ޗެއިން އޮފް ކަސްޓަޑީގައި އެއްވެސް ގޯހެއް ނެތް ކަން ޔަގީން ކުރުމަށް ފަހު ކަމަށެވެ.

އެހެންވިޔަސް ޗެއިން އޮފް ކަސްޓަޑީގައި އެ ހެކި ހޯދި ކަމަށް ފުލުހުން ލިޔެފައި އޮތީ 23 އޮގަސްޓް 2026 އެވެ. ތާރީހުގައި އެފަދަ އޮޅުމެއް އަރާފައި އޮތް ކަމެއް ތަހުގީގު މަރުހަލާގައި ތެރެއިން ފާހަގަ ނުވާ ކަމަށާއި އޭނާ ފުރަތަމަ ބެލިއިރު ޗެއިން އޮފް ކަސްޓަޑީ އޮތީ ރަނގަޅަށް ކަމަށް ވެސް ބުންޏެވެ.

ޗެއިން އޮފް ކަސްޓަޑީއަކީ ހެކި ހޯދި ގޮތާއި ހެކި ތަހުލީލު ކުރުމުގެ މަރުހަލާގައި އެއް އޮފިސަރުން އަނެއް އޮފިސަރުގެ އަތަށް އެ ހެކި ގެންދެވިފައިވާ ގޮތާއި ތާރީހުތައް ބަޔާންކޮށްފައި އޮންނަ އެކުލެވުމެކެވެ.

މި މައްސަލާގައި މިހާތަނަށް ހެކިބަސް ނަގާފައިވަނީ ހަތަރު ހެކިވެރިއެއްގެ ހެކިބަހެވެ. އެއީ މިއަދު ހެކިބަސް ނެގި އޮފިސަރުގެ އިތުރަށް ޓޫރިޒަމް މިނިސްޓްރީގެ އޮފިޝަލަކާއި، ހަތަރު އައިފޯނަކާއި ޕެންޑްރައިވްތަކެއް ތަހުލީލުކޮށް މޯބައިލް ފޮރެންސިކް ރިޕޯޓެއް ތައްޔާރުކުރި އޮފިސަރަކާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ ލެޕްޓޮޕް ތަހުލީލު ކުރި އޮފިސަރެވެ.

ދައުލަތުން ކުރާ ދައުވާގައި ހިމެނޭ ކަންކަން

ދައުލަތުން ކުރާ ދައުވާގައިވާ ގޮތުން ވ. އާރަށް ޓޫރިޒަމް މިނިސްޓްރީއަށް ބަދަލުކުރީ އޮގަސްޓް 9، 2015 ގަ އެވެ. ޔޫސުފް ނައީމްގެ 99 ޕަސަންޓު ހިއްސާ އޮންނަ ގޮތަށް ޓޫޖީ ޕްރައިވެޓް ލިމިޓެޑްގެ ނަމުގައި ކުންފުންޏެއް އުފެއްދީ އޮގަސްޓް 13، 2015 ގަ އެވެ.

ސެޕްޓެމްބަރު 8، 2015 ގައި ޓޫޖީ ޕްރައިވެޓް ލިމިޓެޑްގެ 99 ޕަސަންޓު ހިއްސާ އެލްއޭ ރިސޯޓްސް ޕްރައިވެޓް ލިމިޓެޑްއަށް ވިއްކާލީ ކަމުގަ އެވެ.

ސެޕްޓެމްބަރު 9، 2015 ގައި އެމްއެމްޕީއާރުސީން ޓޫޖީ ޕްރައިވެޓް ލިމިޓެޑް ކުންފުންޏަށް ވ. އާރަށް ހަވާލުކުރިއިރު އެލްއޭއިން އެމްއެމްޕީއާރުސީއަށް ރަށުގެ ލީޒް އެކުއިޒިޝަން ކޮސްޓްއަށް އެއް މިލިއަން ޑޮލަރު އަދި ޔޫސުފް ނައީމަށް ވެސް އެއް މިލިއަން ޑޮލަރުގެ ޗެކެއް ދީފައިވެ އެވެ.

ސެޕްޓެމްބަރު 13، 2015 ގައި ޔޫސުފް ނައީމްގެ އެކައުންޓަށް އެ ފައިސާ ޖަމާވުމުން ސެޕްޓެމްބަރު 15، 2015 ގައި ޔޫސުފް ނައީމްގެ އެކައުންޓުން ޔާމީނަށް އެއް މިލިއަން ޑޮލަރުގެ ޗެކެއް ދީފައިވެ އެވެ. އޭގެ ދެ ދުވަސް ފަހުން އެ ފައިސާ އެޗްއެސްބީސީގައި ޔާމީންގެ ނަމުގައި ހުޅުވާފައިވާ އެކައުންޓަށް ޖަމާކޮށްފައިވާ ކަމަށް ދައުލަތުގެ ދައުވާގައިވެ އެވެ.

ޔާމީނާއި ޔޫސުފް ނައީމްގެ ފަރާތުން ވެސް މި ދައުވާތަކަށް އިންކާރު ކުރެ އެވެ. ޔާމީނާއި ޔޫސުފް ނައީމް ވެސް ބުނާ ގޮތުން އެ ދެ މީހުންގެ ދެމެދުގައި ހިނގާފައިވާ ކަމަށް ދައުލަތުން ބުނާ މުއާމަލާތަކީ ދިވެހި ރުފިޔާއިން ޑޮލަރު ގަތް މުއާމަލާތެއް ކަމަށެވެ. އެ ކަން ސާބިތު ކުރަން ކަމަށް ބުނެ އެ ދެ ފަރާތުން ވެސް ހެކިތަކެއް ހުށަހަޅާފައިވެ އެވެ.