މި ފަހަރުގެ ވޮލީބޯލް އެސޯސިއޭޝަން ކަޕް ފިރިހެން ޑިވިޝަނުގެ ކޮލިފައިން ބުރުން ފެށިގެން ފައިނަލާ ހަމައަށް ދިޔައިރު، ކްލަބް ވެމްކޯ ބަލިވީ އެންމެ މެޗަކުންނެވެ. އެއީ ލީގު ބުރުގެ ތިން ވަނަ މެޗުގައި ދިވެހި ސިފައިންގެ ކްލަބް އަތުން ސީދާ ތިން ސެޓުންނެވެ.

ވެމްކޯ އިން އެސޯސިއޭޝަން ކަޕްގެ ފައިނަލުން ފުރުސަތު ހޯދީ ރޭ ކުޅުނު ޕްލޭއޮފް މެޗުގައި ސިފައިން އަތުން ސީދާ ތިން ސެޓުން މޮޅުވެގެންނެވެ. އެންމެ ފަހުގެ ޗެމްޕިއަން ސިފައިން އަތުން ބަދަލުހިފައި، ވެމްކޯ އިން މި ވަނީ ފިިރިހެން ޑިވިޝަނުގައި ފުރަތަމަ ފަހަރަށް ފައިނަލުން ފުރުސަތު ހޯދައިފަ އެވެ.

"އެ ބައްޔަކީ (ލީގު ބުރުގައި ސިފައިން އަތުން ބަލިވުމަކީ) ފެށުން ހަގީގަތުގައި، ކުޅިވަރުގައި ހާއްސަކޮށް ބައްޔަކީ (އާ) ފެށުމެއް. ވެމްކޯގެ މެނޭޖްމަންޓާއި ވެމްކޯގެ ސަޕޯޓަރުންގެ ހިތްވަރާއި ޓީމު އެކުރި ހިތްވަރުން މިި މުބާރާތުގެ ފައިނަލަށް އިރާދަކުރެއްވިއްޔާ މި ދެވުނީ. ހާއްސަކޮށް ސިފައިންގެ މެޗުން ބަލިވުމުން ވަރަށް ބޮޑަށް ތައްޔާރުވެގެން އައި ދެ މެޗު މިއީ، އެއް މެޗަކީ ޕޮލިސް މެޗާއި ސިފައިންގެ މެޗު، އެ ކާމިޔާބު އަޅުގަނޑުމެންނަށް ލިބިގެން މިދިޔައީ،" ރޭގެ ޕްލޭއޮފް މެޗަށް ފަހު ވެމްކޯގެ ކޯޗު އިބްރާހިމް ނިޒާރު (ބޮޑޭ) ބުންޏެވެ.

ނިޒާރު ދެކޭގޮތުގައި ވެމްކޯ އަށް ފައިނަލުގެ ޖާގަ ލިބުނީ އެ ޓީމުގެ ކުޅުންތެރިންގެ ވޯކް ރޭޓް ރަނގަޅުވުމާއި ކޯޗުންނާއި ކުޅުންތެރިންގެ އިތުބާރު ޓީމެއްގެ ގޮތުގައި ބޮޑުވުމުންނެވެ. އަނެއްކޮޅުން ޕްލޭއޮފް މެޗަށް އައިއިރު، ވެމްކޯ އަށް ދިމާވެފަައިވާ ކުދިކުދި އަނިޔާގެ މައްސަލަތަކަށް ހައްލު ލިބިފައިވުމަކީ ވެސް ރޭގެ މެޗުން ތަފާތުކޮށް މޮޅުވަން ލިބުނު ފަސޭހަ އެކެވެ.

ވެމްކޯ އަށް ލިބުނު ތިން ބިދޭސީ ކުޅުންތެރިންގެ ތެރެއިން، އިންޑިއާގެ އަމިތުސިންހް އަށް ފުރަތަމަ މެޗުގައި އަނިޔާވެ މުބާރާތް ނިމުނުއިރު، އޭނާ ވަނީ އޮޕަރޭޝަން ކުރަން ޖެހޭތީ އިންޑިއާ އަށް ގޮސްފަ އެވެ. ދެން ވެމްކޯގައި ހިމެނޭ ބިދޭސީ ކުޅުންތެރިންނަކީ، ސެންޓަ ބްލޮކަރު އަޝްވަލް ރާއީ އާއި ސެޓަރު، ރަންޖިތު ސިންގް އެވެ.

ނިޒާރު ބުނީ ރަންޖިތު އާއި އަޝްވަލްގެ ސަޕޯޓް ހުރިހާ ގޮތަކުން ވެސް ލިބޭ ކަމަށެވެ.

"ފައިނަލް މެޗަށް ނުކުންނައިރު ވެސް އަޅުގަނޑުމެންނަށް އެނގޭ ޓީމު އޮތް ފެންވަރާއި އޮތް ހާލަތާ އެއްޗެހި. އެ ހުރިހާ ކަމަކަށް ތައްޔާރުވެގެން ނުކުންނާނީ،" ބުރާސްފަތި ދުވަހުގެރޭ ސްޕޯޓްސް ކްލަބް ސިޓީއާ ދެކޮޅަށް ކުޅޭ ފައިނަލާ ބެހޭގޮތުން ނިޒާރު ބުންޏެވެ.

ސިޓީ އަތުން ސީދާ ތިން ސެޓުން މޮޅުވެވޭނެތޯ އެހުމުން ނިޒާރު ބުނީ ޔަގީންކަމާ އެކު އެގޮތަށް ނުބުނެވޭނެ ކަމަށާއި އެކަމަކު، ވެމްކޯގެ ގޭމް ކުޅެވިއްޖެނަމަ ފައިބާނީ މޮޅުވެގެން ކަމަށެެވެ.

"ސިޓީ ޓީމަށް ބަލާއިރު، ސިޓީ ޓީމަކީ ވަރަށް ވަރުގަދަ މޮޅު ޓީމެއް. ހާއްސަކޮށް މި މުބާރާތުގައި ވަކި ދަށް ޓީމެކޭ ބުނެވޭ ވަރުގެ ޓީމެއް ނެތް، ހަމަ ކުޅެގެން މޮޅުވާން ޖެހޭނީ. ކުޅެގެން ވަރުގަދަ ފައިޓެއް ދީގެން މޮޅުވެވޭނީ، އަޅުގަނޑުމެން މަސައްކަތް ކުރަނީ ކަންކަން ރަނގަޅުކުރަން، ވާހަކަ އަކީ ހުރިހާ އެންމެން ދޭ ހިތްވަރާއި ކުޅުންތެރިންގެ މަސައްކަތް މިއީ،" ނިޒާރު ބުންޏެވެ.

ސިފައިންގެ ޓީމުގެ ކޯޗު ޖުނައިދު: ވެމްކޯއާ ދެކޮޅަށް ޕްލޭއޮފްގައި ސިފައިންގެ އަސްލު ފެންވަރުގެ ކުޅުމެއް ނުދެއްކޭ ކަމަށް ވަނީ ބުނެފައި.-- ފޮޓޯ: އިމޭޖަސް،އެމްވީ

އެންމެ ފަހުގެ ޗެމްޕިއަން ސިފައިން މި ފަހަރުގެ މުބާރާތް ފެށީ ސިޓީ އާއި ޕޮލިސް އަތުން ބަލިވެގެންނެވެ. އެކަމަކު، ދެން ކުޅުނު ތިން މެޗުން ވަނީ ވެމްކޯ އާއި އޮއްފު އެފްސީ އަދި ގުޑީސް ސްޕޯޓްސް ކްލަބް ސީދާ ތިން ސެޓުން ބަލިކޮށްފަ އެވެ.

ޖެހިޖެހިގެން ތިން މޮޅު ހޯދުމަށް ފަހު ރޭގެ ޕްލޭއޮފަށް އައި ނަމަވެސް އެ މެޗުގައި ފެނުނީ ސިފައިންގެ ފަރާތުން ދަށް ކުޅުމެކެވެ. ސެޓެއް ވެސް ނުލިބި ބަލިވިއިރު، އެކަށީގެންވާ ވަރުގެ ފައިޓެއް ވެސް ނުދެވުނެވެ.

ސިފައިންގެ ޓީމުގެ ކޯޗު ޖުނައިދު އަބްދުﷲ ބުނީ ރޭ ވެމްކޯ އަތުން ބަލިވީ ސިފައިންގެ ހުރިހާ ކުޅުންތެރިން ކަހަލަ ގޮތަކަށް މެޗު ފަސޭހަކޮށް ނެގުމުގެ އިތުރުން އަމިއްލަ އަށް ހެދުނު ގޯސްތަކެއްގެ ސަބަބުން ކަމަށެވެ.

"ހަމަ ނުކުޅެވިގެންދިޔައީ. ތަންކޮޅެއް ބޮޑަށް އީޒީ (ފަސޭހަ) ކޮށްލެވުނީ. އަނެއްހެން ބުނަންޏާ ވަކި ކުޅުންތެރިއެއް ނެތް، ބޭރު ކުޅުންތެރިންނަށް ވެސް އީޒީކޮށް ނެގުނީ، އެއީ މައްސަލަ އަކީ،" ޖުނައިދު ބުންޏެވެ.

"މެޗަށް ތައްޔާރުވާން ޖެހޭ ވަރަށް ވެސް ނުވެ މި އާދެވުނީ. ދެން މިސްޓޭކަށް ބަލާއިރު، ވަރަށް އީޒީ ސާވިސްތަކެއް މި ދިޔައީ. ރިސީވް ވެސް ނުދެވި، ގޭމް ތެރެއަށް ވެސް ނުވަދެވި. އަމިއްލަ މިސްޓޭކުން މި ބަލިވީ. ކުޅުންތެރިން މެޗުން މޮޅުވާން މާ ބޮޑަށް ބޭނުންވެފައި ހުރެގެން ވިސްނާނުލެވި ކުޅެވިފައި މި ހުރީ،"

ސިފައިންގެ ޓީމު މި ފަހަރުގެ މުބާރާތް ފަށަން ޖެހުނީ އުނދަގޫކޮށް ނަމަވެސް ފަހުން ފޯމަކަށް އެޅުނު ކަމަށް ޖުނައިދު ފާހަގަކުރި އެވެ. އެކަމަކު، ޕްލޭއޮފުން ބަލިވެ މުބާރާތް ނިންމާލަން ޖެހުނީ ފަހު މެޗުގައި އަމިއްލަ ފެންވަރުގައި ވެސް ނުކުޅެވި ކަމަށް ޖުނައިދު ބުންޏެވެ.

ސިޓީ އާއި ވެމްކޯ ކުޅޭ ފައިނަލް މެޗު ފަށާނީ ބުރާސްފަތި ދުވަހުގެރޭ 20:15 ގަ އެވެ.