30 މޭ 2022 - 09:50 0
މުހައްމަދު ނަސީމް
އެމްޑީީޕީގެ ގައުމީ މަޖިލީހުން ރޭ ބޭއްވި ޖަލްސާގައި މެމްބަރުން ބައިވެރިވަނީ. އެޕާޓީގެ ކޮންގްރެސް ބާއްވާނީ އޮގަސްޓް 19 ގައި.
30 މޭ 2022 - 09:50 0
ވެރިކަންކުރާ ކޯލިޝަނުގެ މައިޕާޓީ، އެމްޑީޕީގެ ކޮންގްރެސް ބާއްވަން ކުރިން ނިންމާފައި އޮތް ތާރީހަށް ވުރެ ފަސްކޮށް، އެޕާޓީގެ މެމްބަރުންގެ ދަފްތަރު އިލެކްޝަންސް ކޮމިޝަނުގެ ދަފްތަރާ އެއްގޮތް ކުރުމުގެ މަސައްކަތް ކުރަން ރޭ ނިންމައިފި އެވެ.
އެމްޑީޕީގެ ގައުމީ މަޖިލީހުން ރޭ ބޭއްވި ޖަލްސާގައި މައިގަނޑު ދެކަމެއް ކުރަން ފާސްކުރި އެވެ. ފުރަތަމަ ކަމަކީ ކޮންގްރެސް ބާއްވާ ތާރީހު އޮގަސްޓް ހަތަރަކުން އޮގަސްޓް 19 އަށް ފަސްކުރުމެވެ. ދެވަނަ ކަމަކީ އެޕާޓީގެ ދަފްތަރުގައި ތިބި މެމްބަރުންގެ ތެރެއިން އިލެކްޝަންސް ކޮމިޝަނުގެ ދަފްތަރުގައި ޖެހެން ތިން މަސްދުވަހުގެ މުހުލަތެއް ދީ، އެ ދަފްތަރު ރަނގަޅުކޮށް، އެއްގޮތް ކުރުމެވެ.ެ
އެމްޑީޕީގެ ގައުމީ މަޖިލީހުން ރޭ ބޭއްވި ޖަލްސާގައި މެމްބަރުން ބައިވެރިވަނީ. ފޮޓޯ: އެމްޑީޕީ
އެމްޑީޕީގެ ޗެއާޕާސަންގެ ނައިބު އަދި ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު، "އަދަދު" އަށް މިއަދު ވިދާޅުވީ އެމްޑީޕީގެ މެމްބަރުންގެ ގޮތުގައި އީސީގެ ދަފްތަރުގައި ޖެހިފައިނުވާ މީހުން، އެ ދަފްތަރުގައި ޖެހެން ތިން މަސްދުވަސް ދިން ނަމަވެސް، ކޮންގްރެސްގައި ބައިވެރިވެވޭނީ ފުރަތަމަ 30 ދުވަހުގެ ތެރޭގައި އެ ދަފްތަރުގައި ޖެހޭ މީހުންނަށް ކަމަށެވެ.
"[ރޭ ފާސްކުރީ] ފުރަތަމަ 30 ދުވަހުގެ ތެރޭގައި ސާފުވާ މީހުންނަށް ކޮންގްރެސްގައި ބައިވެރިވެވޭ ގޮތަށް. އޭގެ އިތުރަށް ދެ މަސްދުވަސް މިދެނީ، ގާތްގަނޑަކަށް 30،000 އަށް ވުރެ ގިނަ މީހުން އެބަ އުޅޭ ދަފްތަރުން ވަކިވެފައި އޮތް ކަމަށް ރެެކޯޑްތަކުން ފެންނަ. މުޅި ޖުމްލަ ތިން މަސްދުވަހުގެ ތެރޭގައި ދަފްތަރު ސާފުކުރަން" އޭނާ ވިދާޅުވި އެވެ.
ކޮންގްރެސް ބާއްވާ އިރު އެގޮތަށް އަމަލުކުރަން ރޭގެ ޖަލްސާގައި ހުށަހެޅުއްވީ އިބްރާހީމް ވަހީދު (މަދަނަ އިބްރޭ) އެވެ. އެ ހުށަހެޅުން ފާސްކުރީ އަލީ ނިޔާޒް ވިދާޅުވި ގޮތުގައި ރޭގެ ޖަލްސާގައި ބައިވެރިވި 90 މެމްބަރުންގެ ތެރެއިން 70 މެމްބަރުން ވޯޓު ދެއްވައިގެންނެވެ.
އޭނާ ވިދާޅުވި ގޮތުގައި ޕާޓީގެ ދަފްތަރުގައި އޮވެފައި، ގާނޫނަށް ފަހުން ގެނައި ބަދަލެއްގެ ސަބަބުން އީސީގެ ދަފްތަރުން އުނިކޮށްފައިވާ މެމްބަރުން ވެސް އެމްޑީޕީގައި އެބަ ތިއްބެވެ. އެ މެމްބަރުންނާ މެދު އަމަލުކުރާނެ ގޮތެއް ވެސް ކުރިއަށް އޮތް ތިން މަސްދުވަހުގެ ތެރޭގައި ނިންމާނެ އެވެ.
އޯގަސްޓް މަހު ބޭއްވުމަށް ހަމަޖެހިފައިވާ ކޮންގްރެސްގައި ރާއްޖޭގެ ވެރިކަން ކުރާ ނިޒާމް ބަރުލަމާނީ ނިޒާމަށް ބަދަލުކޮށް, ރިޔާސީ އިންތިހާބެއްގައި ދެވަނަ ބުރެއްގެ ވޯޓަކަށް ނުގޮސް އިންތިހާބު ކާމިޔާބު ކުރެވޭނެ މަގެއް ކަނޑައަޅެމުގެ މަސައްކަތާ ގުޅޭ ގޮތުން މަޝްވަރާކޮށް ނިންމުންތައް ނިންމަން ވަނީ ތާވަލުކޮށްފަ އެވެ.
ގާނޫނު އަސާސީ އަށް ގެންނަން ބަދަލުތަކެއް ހުށަހެޅުއްވީ އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ.
މި ލިޔުމާ ގުޅޭ ލިޔުންތައް
Comment