އެންޓި ކޮރަޕްޝަން ކޮމިޝަން (އޭސީސީ)ގެ މަސައްކަތްތަކަށް ބޮޑެތި ބަދަލުތަކެއް ގެނެސް، އެ މުއައްސަސާގެ ހިންގުން އިތުރަށް ހަރުދަނާ ކުރުމަށް ހަ ކަމަކަށް އަމާޒުކޮށްގެން ތައްޔާރުކުރި ކުރު ރާސްތާ ޕްލޭނެއް އެ ކޮމިޝަނުން އިފްތިތާހު ކުރީ އިއްޔެ އެވެ.

އޭސީސީ އަށް އަލަށް މެމްބަރުން އައްޔަނުކުރި ފަހުން ފާއިތުވެދިޔަ ދުވަސްތަކުގެ ތެރޭގައި އެ ކޮމިޝަނުގައި ހުރި މައްސަލަތައް އެ މެމްބަރުންނަށް ހޯދިފައިވާ ކަމަށް އިއްޔެ ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ ރައީސް އާދަމް ޝާމިލް ވިދާޅުވި އެވެ.

"އެކަންކަމުން އަރައިގަތުމަށް އަޅުގަނޑުމެން ވާނީ ކުރު ރާސްތާ އޮޕަރޭޝަނަލް ޕްލޭނިންއެއް ހަދާފަ މިހާރު،" ޝާމިލް އިއްޔެ ވިދާޅުވި އެވެ.

ކޮމިޝަނުގައި ހުރި މައްސަލަތަކަށް އަމާޒުކޮށް އެކަންކަން ހައްލުކުރުމަށް އިއްޔެ އިފްތިތާހުކުރި އެ ޕްލޭނަށް ދީފައިވާ ނަމަކީ "އާ ބާބެއް" މި ނަމެވެ. އެ ޕްލޭނުގައި އަމާޒުކުރާ ދާއިރާތަކަކީ އާރުލާ ތަހުގީގު، އިދާރީ ފަހިކަން، ބާރުވެރި މުވައްޒަފުން، ޒަމާނީ ސުމޭކުކަން، ވަށައިޖެހޭ ވިޔަނުދިނުން އަދި މަސްލަހަތުވެރިންގެ އިތުބާރު ހިފެހެއްޓުމެވެ.

އެ ޕްލޭނާއި ގުޅޭގޮތުން ވާހަކަ ދައްކަވަމުން ކޮމިޝަނުގެ ރައީސް ޝާމިލް އިއްޔެ ވިދާޅުވީ އެ ހަ ދާއިރާއަކީ ތަހުގީގަށް އަބަދުވެސް ކުރިމަތިވާ ގޮންޖެހުންތަކާއި ތަހުގީގުގެ ހަރުދަނާ ކަމާއި އަވަސްކަން ގެނައުމަށްޓަކައި ރާވާފައިވާ ކަންކަން ކަމަށެވެ.

"ހަމަ އެއާއެކީގަ މުވައްޒަފުންގެ ތެރޭގައި ހުރި ކަންބޮޑުވުންތަކާއި މުވައްޒަފުންގެ ކިބައިގައި ހުރި ފަންނުވެރިކަން އިތުރަށް ކުރިއަށް ގެންދިޔުމަށް އޮތް މަގުތައް ދެނެގަތުމާއި އަދި އަޅުގަނޑުމެންގެ މަސައްކަތް އެއްކޮށް ޑިޖިޓަލައިޒް ކުރުމަށްޓަކައި މުޅިން އާ މިސްރާބަކަށް އޭސީސީގެ މަސައްކަތް ބައްޓަންކުރުން،" ޝާމިލް އިއްޔެ ވިދާޅުވި އެވެ.

އޭގެ އިތުރުން ވެސް އެ ޕްލޭނުގައި އިދާރީ ގޮތުން ކޮމިޝަން ހިންގުމަށް އޮތް އެންމެ ރަނގަޅު ގޮތްތަކާއި ކޮރަޕްޝަން ޕްރިވެންޝަނާއި ގުޅޭގޮތުން ކުރެވެން ހުރި މަސައްކަތްތައް ހިމެނިފައިވާނޭ ކަމަށް ޝާމިލް ވިދާޅުވި އެވެ.

ކޮމިޝަނުގެ ރައީސް ޝާމިލް ވަނީ އޭސީސީގައި ހުރި މައްސަލަތަކުގެ އަދަދަށް ބަލައި މައްސަލަތަކަށް އިސްކަން ދިނުމުގައި ގެންގުޅޭ އުސޫލާ ގުޅޭ ގޮތުން ވެސް ވާހަކަ ދައްކަވާފަ އެވެ. އަދި، ވަކި މީހެއްގެ މަގާމަށް ބަލައި މައްސަލަ ބެލުމަށްވުރެ، މިހާރު ކޮމިޝަނުގެ އަމާޒަކީ ދައުލަތަށް ގެއްލޭ ފައިސާގެ އަދަދަށް ބަލައި މައްސަލަތައް ޕްރިއޯރަޓައިޒް ކުރުން ކަމަށް ޝާމިލް އިއްޔެ ވިދާޅުވި އެވެ.

"ޕްރިއޯރަޓައިޒް މިކުރެވޭ ގޮތަކީ، އެމީހެއްގެ މަގާމެއް ނޫން. ޕްރިއޯރަޓައިޒް މިކުރެވޭ ގޮތަކީ އެ ކުށެއް ކުރިއިރުގަ އެކުށަކުން ދައުލަތަށް ގެއްލިގެންދިޔަ މިންވަރަކާ އޭގެ މާލީ ކަންކަމުގަ މައްޗަށް، އެއް އެސްޕެކްޓަކީ. އަނެއް ކަމަކީ އެކަމެއް ސަބަބުން ދައުލަތަށް އިއާދަނުކުރަނިވި ގެއްލުމެއް ލިބިގެން ހިނގައިދާނެފަދަ ބައެއް ކަންކަން އެބަ ހުރޭ،" އިއްޔެގެ ނޫސްވެރިންގެ ބައްދަލުވުމުގައި ޝާމިލް ވިދާޅުވި އެވެ.

އޭސީސީގައި މިވަގުތު ތިބީ 45 އިންވެސްޓިގޭޓަރުންކަން ފާހަގަކުރައްވަމުން ކޮމިޝަނުގެ ރައީސް ޝާމިލް ވަނީ އޭގެ ތެރެއިން 12 އިންވެސްޓިގޭޓަރުންގެ ޓީމެއް އެމްއެމްޕީއާރުސީގެ މައްސަލައަށް ހާއްސަކޮށްފައިވާ ކަމަށް އިއްޔެ ވިދާޅުވެފަ އެވެ.

އަދި، އެސެޓް ރިކަވަރީ ކޮމިޝަން އުވާލުމުން އެ ކޮމިޝަނުގައި ހުރި އެ މައްސަލައިގެ ހެކިތައް އޭސީސީއަށް ބަދަލުކުރުމުގެ މަސައްކަތް ކުރިއަށްދާ ކަމަށް ވެސް ޝާމިލް އިއްޔެ ވިދާޅުވި އެވެ.

ބައެއް މުހިންމު ހަބަރުތައް

• ހުޅުމާލޭގައި 2019 ވަނަ އަހަރުގެ ފަހުކޮޅު ތޫނު އެއްޗަކުން ހަމަލާދީ އަނިޔާވެރި ގޮތަކަށް މަރާލި ގާސިމް ހަސަން, 59, މަރާލި ކަމުގެ ދައުވާ ޅ. ހިންނަވަރު، ބޮޑުހިޔާގެ، އަދުހަމް މުހައްމަދުގެ މައްޗަށް ސާބިތު ކުރަން ވެގެން ދައުލަތުން ހުށަހެޅި މުހިންމު ހެއްކެއް ރާއްޖޭން ބޭރުގައި ހުރިކަން އެނގުނީ އިއްޔެ އެވެ.

• ގަވާއިދާ ހިލާފަށް ހުއްދަ ނުނަގައި ހއ. ކެލާއިން ރުއްގަސް ކަނޑައި، އެރަށުން ބޭރުކުރާކަމަށް ބުނެ ސޯޝަލް މީޑިއާގައި ފެތުރެމުންދާ ވާހަކަތައް އެރަށު ކައުންސިލުން ދޮގުކުރީ އިއްޔެ އެވެ.

• ރައްޔިތުންގެ މަޖިލީހުގެ ކޮމިޓީތަކުގެ މަސައްކަތް ކުރިއަށްދާ ގޮތުގެ ޕާފޮމަންސް އޮޑިޓެއް ތައްޔާރު ކޮށްދޭން އިދިކޮޅު ޕީޕީއެމް އާއި ޕީއެންސީގެ ފަރާތުން ރައްޔިތުންގެ މަޖިލީހަށް ހުށަހެޅީ އިއްޔެ އެވެ.

ދުވަހުގެ ކޯޓޭޝަން

ސަރުކާރުން މާބޮޑަށް ވިޔަފާރީގެ ތެރެއަށް ވަންނަ ކަމަށް ތުހުމަތު ކުރައްވައި، ރައްޔިތުންގެ މަޖިލީހުގެ މެދުހެންވޭރު ދާއިރާގެ މެމްބަރު އަލީ އާޒިމް އިއްޔެ ވިދާޅުވީ:

"އެމްޑީޕީގެ ވިސްނުމެއް ނޫން، ފިކުރެއް ނޫން ވިޔަފާރީގެ ތެރެއަށް ވަނުމަކީ. އެހެން ނަމަވެސް ވަރަށް ބޮޑަށް، ވަރަށް ބޮޑަށް ދައުލަތުން ސަރުކާރުން، އަޅުގަނޑުމެންގެ ހިއްސާ އޮތް ސަރުކާރެއް [މިއީ]. ސަރުކާރުން ކުންފުނިތަކުގެ ތެރެއަށް ވަރަށް ބޮޑު ނުފޫޒެއް، ހާއްސަކޮށް ވިޔަފާރިތަކުގެ ތެރެއަށް ފޯރުވަމުންދާތީ ވިޔަފާރިވެރިން ކަންބޮޑުވޭ،"

ދުވަހުގެ ފޮޓޯ

ގއ. ކޮލަމާފުށި ބީޗުގެ ތުނޑީ ސަރަހައްދު. އެ އަތޮޅުގެ އެހެން ރަށްތަކާ ވަކިން މާ ދުރުގައި އޮންނަ ކޮލަމާފުއްޓަކީ ރީތި ހިތްގައިމު ރަށެއް. މިއީ ހުވަދޫ އަތޮޅުގައި ހަތް ވަނަ އަށް އެންމެ ބިން ބޮޑު ރަށް -- ފޮޓޯ: އަބްދުﷲ އަބީދު

ދިރާސާތަކުން ކިޔާލުމަށް

"ފައިނޭންޝިއަލް އިންކްލޫޝަން އިން ދަ މޯލްޑިވްސް"

މިއީ ރާއްޖޭގެ ރައްޔިތުންގެ މެދުގައި ބޭންކިން ހިދުމަތް ހޯދުމަށް މޯބައިލް އެޕްލިކޭޝަނާއި އިންޓަނެޓު ބޭނުންކުރާ މިންވަރު ދެނެގަތުމަށް 2019 ވަނަ އަހަރު ވޯލްޑް ބޭންކުން ކުރިއަށް ގެންގޮސްފައިވާ ދިރާސާއެކެވެ.