ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ޓެރަރިސްޓު ހަމަލާ ދިން ކަމުގެ ތުހުމަތުކޮށް، ކްރިމިނަލް ކޯޓުގައި ދައުވާ އުފުލާފައިވާ މީހުންގެ ޝަރީއަތްތައް ލަސްވާތީ، ޕްރޮސެކިއުޓާ ޖެނެރަލް (ޕީޖީ) އޮފީހުން ކަންބޮޑުވުން ފާޅުކުރައްވައިފި އެވެ.

ޕީޖީ ހުސައިން ޝަމީމް "އަދަދު"އަށް ވިދާޅުވި ގޮތުގައި, ނަޝީދަށް ދިން ބޮމުގެ ހަމަލާއާ ގުޅިގެން ދައުވާކުރި މީހުންގެ ޝަރީއަތްތައް އަވަސްކޮށްދިނުމަށް ކްރިމިނަލް ކޯޓުގައި މިހާރު ވެސް ވަނީ އެދިފަ އެވެ.

ނަމަވެސް, މިދިޔަ އަހަރުގެ މެއި ހަވަނަ ދުވަހުގެ ރޭ އަތަމާ ޕެލަސް އިމާރާތުގެ އެތެރޭގަ ހުރެ ރިމޯޓެއް ބޭނުންކޮށްގެން ބޮން ގޮއްވާލި މައްސަލާގައި ނުވަ މީހަކަށް ދައުވާ އުފުލާފައި ވާއިރު މިހާތަނަށް ހުކުމަކާ ހަމައަށް ވާސިލްވެފައި ވަނީ އެންމެ މީހަކަށް ކުރި ދައުވާތަކުގަ އެވެ. އެއީ, ބޮން ރިމޯޓް ބޭނުން ކޮށްގެން ގޮއްވާލި އަދުހަމްގެ މައްޗަށެވެ. އޭނާގެ މައްސަލަ އަވަސް ނިޔާއެއްގެ ގޮތުގައި ގެންގޮސް, ހުކުމް އަވަހަށް އިއްވީ ކުށަށް އިއުތިރާފުވުމުންނެވެ.

ބާކީ ތިބި އަށް މީހުންގެ ޝަރީއަތް ނުފެށި، އަދިވެސް އޮތީ އިބްތިދާއީ މަރުހަލާގަ އެވެ.

"ވަކި މުއްދަތެއް ދައުވާކުރުމަށް އަޅުގަނޑުމެންނަށް ލިބިފައި މި އޮންނަނީ، މި މުއްދަތުގެ ތެރޭގައި އަވަސްއަރުވާލައިގެން، މައްސަލަ އެއްކޮށް ނިއުޅުވައިގެން ބެލުމަށްފަހު މި ދައުވާ ކުރަން ޖެހެނީ، އެކަމަކު ކޯޓުގައި މައްސަލަ އެބަ އޮވޭ އެތައް އަހަރެއްވަންދެން ނުނިމި، މަޑުޖެހިފައި،" ކޯޓުތަކަށް މައްސަލަ ނިންމަން ވަކި މުއްދަތެއް ކަނޑައެޅިފައި ނެތުމުގެ ކަންބޮޑުވުން ޝަމީމް ފާޅުކުރެއްވި އެވެ.

"މިސާލަކަށް ރައީސް ނަޝީދަށް ދިން ހަމަލާގެ މައްސަލައަށް ބަލާއިރު، ތިން އަހަރު ކުރިން އެ ހަމަލާ ރާވަމުން ދިޔައީ، އެކަމަކު އެ ތިން އަހަރުގެ ހިނގި ހުރިހާ ކަމެއް ތަހުގީގުކޮށް ދައުވާކުރަން ލިބެނީ 70 ދުވަހުގެ މުއްދަތެއް،"

މަރުގެ މައްސަލަތަކާއި، ބޮޑެތި އެހެނިހެން ޖިނާއީ މައްސަލަތައް އަހަރުތަކަށް ކޯޓުގައި ދިގުދެމިގެން ދިއުމުން، މައްސަލަ ސާބިތު ނުވެ ދިއުމުގެ ފުރުސަތު ބޮޑުވާ ކަމަށް ޝަމީމް ގަބޫލުކުރައްވަ އެވެ. އެއީ ހެއްކަށް އޭގެ ސަބަބުން އަސަރުކުރާތީ އެވެ.

އެހެންވެ ޝަމީމް ވިދާޅުވީ ނަޝީދަށް ދިން ބޮމުގެ ހަމަލާއާ ގުޅިގެން ކުރި ދައުވާތަކުގެ އަޑުއެހުންތައް ވީހާވެސް އަވަހަކަށް ކުރިއަށް ގެންގޮސް ނިންމައިދިނުމަށް އެދޭ ކަމަށެވެ.

ރައީސް ނަޝީދަށް ދިން ހަމަލާއާ ގުޅިގެން ކުރި ދައުވާތައް

އަހްމަދު އަދުހަމަކީ ރައީސް ނަޝީދަށް ހަމަލާ ދިނުމަށްޓަކައި އަތަމާ ޕެލަސްގެ ގޯޅިތެރޭ ހުރެގެން ބޮން ގޮއްވާލި މީހާ އެވެ. އޭނާ ވަނީ ތަހުގީގުގައި އަދި ކޯޓުގައި ވެސް ކުށަށް އިއުތިރާފްވެފަ އެވެ. އެހެންވެ މިދިޔަ ޑިސެމްބަރު 14، 2021 ގައި އަވަސް ނިޔާ މައްސަލައެއްގެ ގޮތުގައި ޝަރީއަތް ކުރިއަށް ގެންގޮސް އޭނާގެ މައްޗަށް 23 އަހަރުގެ ހުކުމެއް އިއްވި އެވެ.

ދެން އެ ހަމަލާއާ ގުޅިގެން ދައުވާ އުފުލާފައި ވަނީ މުޖާޒް އަހްމަދާއި، އަބްދުﷲ އަލިމަނިކާއި، ހއ. ހޯރަފުށީ އަލަނާސިގޭ މުހައްމަދު ތަސްލީމާއި، ތަހުމީން އަހްމަދާއި، އަލީ ހައިޝަމްގެ އިތުރުން ފަހުމީ އަލީ އާއި، މުހައްމަދު ނާޒިމް އަދި އިސްހާގަށެވެ.

ފަހުމީއަށް ތުހުމަތު ކުރެވެނީ ގޮއްވާލި ސައިކަލުގައި ބޮން ހަރުކުރި ވަގުތު ފާރައަށް ހުރި ކަމަށެވެ. ނާޒިމަށް ތުހުމަތު ކުރެވެނީ ބޮން ގޮއްވި އަދުހަމް އަހުމަދަށް ބޮން ގޮއްވަން ބޭނުން ކުރި ރިމޯޓު ދިން ކަމަށެވެ. އަދި އިސްހާގަށް ތުހުމަތު ކުރެވެނީ އެކި ފަހަރުމަތިން ނަޝީދަށް ފާރަލި ކަމަށެވެ.

މުޖާޒްގެ މައްޗަށް ދައުވާ ކުރަނީ އައިއީޑީ ގޮއްވާލުމަށްފަހު އަދުހަމް ފިލުވަން މަސައްކަތް ކުރި ކަމަށް ތުހުމަތުކޮށެވެ. ތަހުމީނުގެ މައްޗަށް ގޮވާ ތަކެތި އެހެން ތަނަކަށް ގެންދިއުމަށް އެހީތެރިވެދިންނެވެ.

ފުލުހުން ތުހުމަތު ކުރާ ގޮތުގައި އިސްހާގާއި ތަސްލީމަކީ އެ ހަމަލާގައި އެންމެ އިސް ދައުރެއް އަދާކުރި ކަމަށް ތުހުމަތުވާ ދެ މީހުންނެވެ. އަދި އަބްދުﷲ އަލިމަނިކަކީ ރާއްޖޭގައި ހަރުކަށި ފިކުރު ފެތުރުމަށް އިސްކޮށް ހަރަކާތްތެރިވާ މީހެއް ކަމަށާއި އަދުހަމް ފިލުވުމާއި ހެކި ނައްތާލުމަށް މަސައްކަތް ކޮށްފައިވާ ކަމަށް ތުހުމަތުވާ މީހެކެވެ.

ޓެރެރިޒަމްގެ ދައުވާ އުފުލާފައިވާ އެ އެންމެން ވެސް ވަނީ ހާއްސަ ގާނޫނުގެ ދަށުން ޝަރީއަތް ނިމެންދެން ބަންދު ކޮށްފަ އެވެ.

އެ މައްސަލާގައި ޕްރޮސެކިއުޓާ ޖެނެރަލް އޮފީހުން ދައުވާ ނުކުރަން ނިންމީ އަހުމަދު ފާތިހުގެ މައްޗަށެވެ. އެއީ އޭނާގެ މައްޗަށް ކުށް ސާބިތުކުރެވޭ ވަރަށް ހެކި ނެތުމުން ކަމަށް އެ އޮފީހުން ބުނެ އެވެ.

މިއީ ރާއްޖޭގައި މިހާތަނަށް ގޮއްވާލި އެންމެ ބާރުގަދަ އައިއީޑީ ކަމަށް ރަސްމީ އިދާރާތަކުން ބުނާއިރު، މި ބޮން ހަދާފައި ވަނީ ބާޒާރުން އާންމުކޮށް ލިބެން ހުރި ބާވަތްތައް ބޭނުންކޮށްގެންނެވެ. އޭގެއިން ދޭ ގެއްލުން ބޮޑުކުރަން އަޅާފައި ހުރީ ރޭޒާ ފުއްތަކެކެވެ.