9 ޖަނަވަރީ 2022 - 11:17 0
ގައުމީ ބީޗްވޮލީބޯޅަ ޓީމަށް ގެނައި ކޯޗު ވިނީޝިއުސް (ވ) އާއި ވީއޭއެމްގެ ރައީސް މުހައްމަދު ރަނޭޝް (ކ).
9 ޖަނަވަރީ 2022 - 11:17 0
ރާއްޖޭގެ ބީޗްވޮލީބޯޅަ ޓީމަށް ދުނިޔޭގެ ފެންވަރުގެ ކޯޗެއް ކަމަށްވާ ބްރެޒިލްގެ ވިނީޝިއުސް މާޓިން ޖިއޯނީ ގެނެސްފި އެވެ.
ވިނީޝިއުސް، 37، އިއްޔެ ރާއްޖެ އަތުވެފައިވާއިރު، އޭނާ އަކީ ރާއްޖޭގެ ބީޗްވޮލީބޯޅަ ޓީމަށް މިހާތަނަށް އިރުޝާދުދޭނެ އެންމެ މަތީ ފެންވަރުގެ ކޯޗެވެ. ރާއްޖެ އަށް މަތީ ލެވަލްގެ ބީޗް ވޮލީބޯޅަ ކޯޗެއް ހަމަޖައްސައިދިނީ ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީންނެވެ. މިއީ ދާދި ފަހުން އެފްއައިވީބީގެ ރައީސް ބްރެޒިލްގެ އަރީ ގްރާސާ ރާއްޖެ ވަޑައިގެންނެވި ދަތުރުގައި ކުރެވުނު މަޝްވަރާތަކުގެ ތެރެއިން ހަމަޖެހިގެން ދިޔަ ކަމެކެވެ.
ފިޒިކަލް ޓްރެއިނިން އާއި ސްޓްރެންތު ޓްރެއިނިން އިން އެންމެ މަތީ ފާސް ހާސިލްކޮށްފައިވާ ކޯޗު ވިނީޝިއުސް އަކީ ބީޗްވޮލީބޯޅައިގެ އިތުރުން އިންޑޯ ވޮލީބޯޅައިގައި ވެސް ކޯޗިންގެ މަސައްކަތްތަކެއް ކުރާ ފަރާތެކެވެ. ބްރެޒިލްގެ ރިއޯ ޑި ޖަނެއިރޯގައި އެރޮބިކްސް އާއި ޖިއު ޖިޓްސޫ އުނގަނައިދިނުމުގައި ވެސް ވިނީޝިއުސް ބައިވެރިވެ އެވެ.
ކުޅުމުގެ ކެރިއަރަށް ބަލާއިރު، ވިނީޝިއުސް ވަނީ ބްރެޒިލްގެ ގިނަ ކްލަބްތަކަށް އިންޑޯ ވޮލީ ކުޅެފަ އެވެ. ގްރީސްގެ އެތަންސްގައި 2004 ވަނަ އަހަރު ބޭއްވި އޮލިމްޕިކްސްގެ ބީޗްވޮލީން ފަސް ވަނަ ހޯދި ޓީމުގައި ވިނީޝިއުސް ހިމެނެ އެވެ.
ކޯޗެއްގެ ގޮތުގައި ވިނީޝިއުސްގެ ތަޖުރިބާ އަށް ބަލާއިރު، އޭނާ ވަނީ އިންޑޯ ވޮލީގައި ބްރެޒިލާއި ޔޫއޭއީ ޓީމުތަކުގެ ފިޓްނަސް ޓްރެއިނަރެއްގެ ޒިންމާ އަދާކޮށްފަ އެވެ. އޭނާ ވަނީ ބީޗް ވޮލީބޯޅަ ހެޑް ކޯޗެއްގެ ގޮތުގައި ބްރެޒިލްގެ ގައުމީ އަންހެން އަދި ފިރިހެން ބީޗް ވޮލީބޯޅަ ޓީމުގައި ވެސް މަސައްކަތްތަކެއް ކޮށްފަ އެވެ.
ވިނީޝިއުސްގެ ކާމިޔާބީތަކަށް ބަލާއިރު، އޭނާ ވަނީ ބްރެޒިލްގެ އަންހެން ބީޗް ވޮލީ ބޯޅަ ޓީމުތަކަށް 2013 ވަނަ އަހަރުގެ ވޯލްޑް ޓުއާ އިން އެއް ވަނަ އަދި ދެ ވަނަ ހޯދައިދީފަ އެވެ. އަދި 2013 ވަނަ އަހަރުގެ ވޯލްޑް ޗެމްޕިއަންޝިޕް އިން ތިން ވަނަ ހޯދައިދިނެވެ. އޭގެ ފަހުން 2014 ވަނަ އަހަރުގައި ކޮންޓިނެންޓަލް ކަޕްގައި ބްރެޒިލްގެ އަންހެން ޓީމަށް އެއް ވަނަ ހޯދައިދިނެވެ. އަދި މިދިޔަ އަހަރުގެ ވޯލްޑް ޓުއާގައި ބްރެޒިލްގެ އަންހެން ޓީމަށް އެއް ވަނަ ހޯދައިދީފަ އެވެ.
ވީއޭއެމް އިން ގެނައި ކޯޗު ވިނީޝިއުސް (މ) އާއި އެސޯސިއޭޝަންގެ ޖެނެރަލް ސެކްރެޓަރީ ސޫޒަން (ވ) އަދި ހަޒާންދާރު ރާމިޒް.
މި އަހަރަކީ ބީޗް ވޮލީބޯޅައިގައި ރާއްޖެ އަށް ބައިނަލްއަގުވާމީ ގިނަ މުބާރާތްތަކެއް އޮތް އަހަރެކެވެ. އެެހެން ކަމުން ބްރެޒިލްގެ ކޯޗު ވިނީޝިއުސްއާ އެކީގައި ވީއޭއެމުން ތައްޔާރުވަމުން މި އަންނަނީ ބޮޑު މަސައްކަތަކަށެވެ.
ބީޗްވޮލީ ޓުއާގެ މުބާރާތެއް މި އަހަރު ރާއްޖޭގައި ކުރިއަށް ގެންދަން ވަނީ ޝެޑިއުލްކޮށްފަ އެވެ. ރާއްޖޭގައި ބޭއްވޭ ބީޗްވޮލީ ޓުއާގެ މެޗުތައް ކުރިއަށްދާނީ މި އަހަރުގެ އޮކްޓޫބަރު 13-16 އަށެވެ. މިއީ ދުނިޔޭގެ ފެޑެރޭޝަނުން ބާއްވާ މި ފަދަ މުބާރާތެއް ރާއްޖޭގައި ހޯސްޓްކުރާ ފުރަތަމަ ފަހަރެވެ. މީގެ ކުރިން ރާއްޖޭގައި ވަނީ 2015 ވަނަ އަހަރު އޭވީސީ ބީޗްވޮލީ މުބާރާތުގެ މެޗުތަކެއް ކުރިއަށް ގެންގޮސްފަ އެވެ.
ބީޗް ވޮލީބޯލް ޓުއާގެ ތިން ބައިގެ ތެރެއިން ޗެލެންޖާސްގެ ބައި ރާއްޖޭގައި ހޯސްޓް ކުރާށެވެ. ބީޗް ވޮލީބޯޅައިގައި ކުރިއަށްދަނީ ފިއުޗާ، ޗެލެންޖާސް އަދި އެލީޓް 16 އެވެ. މީގެ ތެރެއިން ރާއްޖޭގައި ބާއްވާނީ ޗެލެންޖާސްގެ ބަޔެެވެ. އެ ބައި ކުރިއަށް ގެންދާއިރު، ވައިލްޑްކާޑް އެންޓްރީއެއްގައި ރާއްޖޭގެ ކުޅުންތެރިންނަށް ވެސް ފުރުސަތު ލިބޭނެ ކަމަށް ވީއޭއެމުން އޭރު "އަދަދު" އަށް މައުލޫމާތު ދީފައިވެ އެވެ.
Comment