ކްލަބް މޯލްޑިވްސް ކަޕްގެ ގްރޫޕް ސްޓޭޖުގެ ފަހު މެޗުތަކުން މޮޅުވެ، ކްލަބް ވެމްކޯ އާއި ސްޓެލްކޯ ކްލަބުން ދެ ވަނަ ބުރުގެ ފަހު ޖާގަތަށް ކަށަވަރުކޮށްފި އެވެ.

ވެމްކޯ އާއި ސްޓެލްކޯގެ އިތުރުން މިއަދު ހަވީރާއި މިރޭ ކުޅުނު މެޗުތަކަށް ފަހު ދެ ވަނަ ބުރުގެ ޖާގަ ކަށަވަރުކުރީ އެމްއޭސީއެލް، އުރީދޫ، ޕޮލިސް ކްލަބް އަދި ޓްރޭޑް ކްލަބް އެވެ. މިއަދު ހަވީރު ޕޮލިހާއި ހުޅުމާލެ ހޮސްޕިޓަލް 2-2 އިން އެއްވަރުވިއިރު، އެލައިޑް އަތުން ޓްރޭޑް ކްލަބް މޮޅުވީ 5-2 އިންނެވެ. މިރޭ ކަސްޓަމްސް އަތުން 5-1 އިން ބަލިވެ، މީޑިއާނެޓް ކެޓިއިރު، އެމްއޭސީއެލް އިން ވަނީ 2-0 އިން އުރީދޫ ބަލިކޮށްފަ އެވެ. އަދި ސިޓީ ކައުންސިލް އަތުން 3-2 އިން ވެމްކޯ މޮޅުވިއިރު، ޔޫތު މިނިސްޓްރީގެ މައްޗަށް ސްޓެލްކޯ އިން ކުރިހޯދީ 2-1 އިންނެވެ.

ދެ ވަނަ ބުރުގެ ޖާގަ ޔަގީންކުރި 16 ޓީމު:

އެމްއޭސީއެލް، އުރީދޫ، ޕޮލިސް ކްލަބް، ޓްރޭޑް ކްލަބް، ވެމްކޯ ސްޓެލްކޯ، ކްލަބް އެޗްޑީސީ، ރޯޑް ރެކްރިއޭޝަން ކްލަބް (އާރްއާރްސީ)، ދިރާގު، އެފްއެސްއެމް، ފެނަކަ، ޕްރިޒަން، އެމްޕީއެލް، ދިވެހި ސިފައިންގެ ކްލަބް، އެސްޓީއޯ އަދި އެމްޓީސީ

މިއަދު ހަވީރު ކުޅުނު މެޗުގައި ހުޅުމާލެ ހޮސްޕިޓަލުން އަބްދުﷲ ފާރިޝްގެ ގޯލުން ލީޑުނެގި މި މެޗުގައި ޕޮލިހުން ވަނީ ފަހަތުން އަރައި ދެ ގޯލު ޖަހައިފަ އެވެ. ޕޮލިހުގެ ގޯލުތައް ޖެހީ މުހައްމަދު ޝިފާން އާއި މެޗުގެ މޮޅު ކުޅުންތެރިޔާގެ މަގާމު ހޯދި އަލީ ފަހުމީ އެވެ. ހުޅުމާލެ ހޮސްޕިޓަލަށް އެއްވަރުކޮށްދިން ގޯލު ޖެހީ ހަސަން ސޮލާހު އެވެ.

މި ގްރޫޕްގެ އަނެއް މެޗުގައި ކަޓާފައި އޮތް އެލައިޑް ކޮޅަށް ޓްރޭޑް ކްލަބްގެ ޖުމައިލް ޖަމީލް (ޖުމްބެ) އާއި ސައިފާން އަހުމަދު މަނިކް، ކޮންމެ ކުޅުންތެރިއަކު ދެ ގޯލު ޖެހިއިރު، އަނެއް ގޯލު ކާމިޔާބުކުރީ އިސްމާއިލް އިހުތިރާމް އެވެ. އެލައިޑްގެ ގޯލުތައް ޖެހީ ގައިސާން އަބޫބަކުރު އިބްރާހިމް އާއި އަންސަރު އިބްރާހިމް (އަންކޮ) އެވެ. މި މެޗުގެ މޮޅު ކުޅުންތެރިއަކީ ޓްރޭޑް ކްލަބްގެ ޖުމްބެ އެވެ.

ގްރޫޕް ބީގެ އެއް ވަނަ ޕޮލިހުން ހޯދީ ހަތް ޕޮއިންޓާ އެކު އެވެ. ޓްރޭޑް ކްލަބް ދެ ވަނަ ދިޔައީ ހަ ޕޮއިންޓް ހޯދައިގެންނެވެ. ތިން ވަނައިގައި ނިންމާލި ހުޅުމާލެ ހޮސްޕިޓަލަށް ލިބުނީ ތިން ޕޮއިންޓެވެ. އެންމެ ފުލަށް ދިޔަ އެލައިޑަށް ޕޮއިންޓެއް ނުލިބެ އެވެ.

އުރީދޫ ކޮޅަށް އެމްއޭސީއެލް އިން ގޯލުތައް ޖެހީ އަލީ ޝާފިއު އާއި އަޒްޔާން އިބްރާހިމް އެވެ. ކަޓާފައި އޮތް ކަސްޓަމްސް އިން މިޑިއާނެޓް ބަލިކުރިއިރު، ގޯލުތައް ޖެހީ ހަސަން ނޫރިޝް ހެޓްރިކެއްގެ އިތުރުން މުމްތާޒް އަބްދުލް ރަޝީދު ދެ ގޯލެވެ. މީޑިއާނެޓްގެ ހަމައެކަނި ގޯލު ޖެހީ މޫސާ އަޒީމް ހަސަން އެވެ.

ގްރޫޕް އޭގެ އެއް ވަނަ ދިޔަ އެމްއޭސީއެލް އާއި ދެ ވަނަ އަށް ދިޔަ އުރީދޫ އަށް ވެސް ވަނީ ހަ ޕޮއިންޓް ލިބިފަ އެވެ. އެކަމަކު، ފައިދާ ގޯލު ގިނައީ އެމްއޭސީއެލް އެވެ. ތިން ވަނަ އަށް ދިޔަ ކަސްޓަމްސް އާއި ހަތަރަކަށް ދިޔަ މީޑިއާނެޓަށް ވެސް ލިބުނީ ތިން ޕޮއިންޓެވެ. ލަނޑުގެ ތަފާތުން ކަސްޓަމްސް އަށް ކުރި ލިބުނީ އެވެ.

މިރޭ ފަހު މެޗުތަކުގެ ތެރެއިން ސިޓީ ކައުންސިލުން ވެމްކޯއާ ބައްދަލުކުރި މެޗުގައި ސިޓީ ކައުންސިލުން ދެ ގޯލު ޖެހީ ވެސް ޒުވާން ގައުމީ ޓީމުގެ އަހުނަފް ރަޝީދު (އަހުއްކޮ) އެވެ. ވެމްކޯގެ ގޯލުތައް ޖެހީ އަލީ ހާފިޒް (ހާއްޕެ) އާއި އަބްދުﷲ ޝައްފާން (ޝާކާ) އަދި އަލީ ޝިޔާހު އެވެ. މި ގްރޫޕްގެ އަނެއް މެޗުގައި ސްޓެލްކޯ އިން ޔޫތު މިނިސްޓްރީ ބަލިކުރީ އުނދަގުލުންނެވެ. ގައުމީ ޓީމުގެ ގާސިމް ސައްމާމް (ސައްމެ)ގެ ގޯލުން ޔޫތު މިނިސްޓްރީން ލީޑުނެގި އެވެ. ސްޓެލްކޯ ކޮޅަށް މެޗު އަނބުރާލީ ފުޓްސަލް ތަރި، އަލީ މާއިސް (މައްޓު)ގެ ދެ ގޯލުންނެވެ.

ކުޅުނު ތިން މެޗުން ވެސް މޮޅުވި ވެމްްކޯ ވަނީ ނުވަ ޕޮއިންޓާ އެކު ގްރޫޕް ސީގެ އެއް ވަނަ ހޯދައިފަ އެވެ. ދެ ވަނަ އަށް ދިޔަ ސްޓެލްކޯ އަށް ލިބުނީ ހަ ޕޮއިންޓެވެ. ސިޓީ ކައުންސިލުން ތިން ޕޮއިންޓް ހޯދިއިރު، ދިޔައީ ތިން ވަނަ އެވެ. ޔޫތު މިނިސްޓްރީ މުބާރާތް ނިންމާލީ ޕޮއިންޓެއް ނުލިބި އެވެ.

ސައްތަ އިން ސައްތަ ރެކޯޑަކާ އެކު ގްރޫޕް ސްޓޭޖުން ދެ ވަނަ ބުރަށް ދިޔައީ ހަތަރު ޓީމެކެވެ. އެއީ ވެމްކޯ، އެޗްޑީސީ، އެމްޕީއެލް އަދި އެސްޓީއޯ އެވެ. މުބާރާތުގެ ގަދަ 16 ބުރުގައި ކުޅޭ މެޗުތައް ކަނޑައަޅާނީ ގުރުއަތުލައިގެންނެވެ.