ދިވެހިރާއްޖެއަކީ އިންޑިއާގެ ޓައުނެއް ނޫން ކަމަށާއި ރާއްޖޭގައި ތިބި އިންޑިއާ ސިފައިން ޖެހޭނީ ފައިބަން ކަމަށް ކުރީގެ ރައީސް އަބްދުﷲ ޔާމީން އަބްދުއްގައްޔޫމް ރޭ ވިދާޅުވެއްޖެ އެވެ.

އެމްއެމްޕީއާރުސީގެ ހިޔާނާތުގެ ފައިސާ ލޯންޑާ ކުރިކަމުގެ ކުށް ސާބިތުވެ ކުރި ފަސް އަހަރުގެ ޖަލު ހުކުމަކުން މިނިވަންވުމަށް ފަހު ބޭއްވި ފުރަތަމަ ބޮޑު ޖަލްސާގައި ޔާމީންގެ ބަހުގެ ހަމަލާތައް އިންޑިއާ އަށް އަމާޒުކުރައްވަމުން ވިދާޅުވީ އިންޑިއާ އަސްކަރިއްޔާގެ އެންމެ ބޫޓު ޖޯޑެއް ވެސް ރާއްޖޭގެ ފަސްގަނޑުގައި ހުރެގެން ނުވާނެ ކަމަށެވެ.

"މިއަދު ރަސްމީކޮށް އަޅުގަނޑު މި ދަންނަވަނީ، ކުރީގަ އަޅުގަނޑުމެންގެ ތެރެއިން ބައެއް ބޭފުޅުން ދުނިޔެއަށް ދެއްވާފަ އޮންނަ ވާހަކައަކީ މިއީ [އިންޑިއާ ސިފައިން ރާއްޖޭން ބޭރުކުރުމުގެ ވާހަކަ] ވަކި ފެންވަރެއްގެ ބަޔަކު ދައްކާ ވާހަކަ އެކޭ. ނޫން، މިއީ ޕީޕީއެމް ޕީއެންސީގެ ފަރާތުން ރައީސް ޔާމީން. އިންޑިއާ އަސްކަރިއްޔާ ޖެހޭނީ ފައިބަން،" އެ މަނިކުފާނު ވިދާޅުވި އެވެ.

ރޭގެ ޖަލްސާގައި ރައީސް ޔާމީން އާއި ކޯލިޝަންގެ ވެރިން

އިންޑިއާގެ ނުފޫޒު އޮތްކަން ފާހަގަކޮށް ދެއްވުމުގެ ގޮތުން ޔާމީން ވިދާޅުވީ ރާއްޖެއަކީ އިންޑިއާގެ ޓައުނެއްގެ ގޮތުގައި، އަދި ރާއްޖޭގެ ރައީސްއަކީ އިންޑިއާގެ ގަވަރުނަރެއްގެ ގޮތުގައި ދެކިގެން ނުވާނެ ކަމަށާއި "މިއީ ވަކިން އޮތް މުސްތަގިއްލު މިނިވަން ގައުމެއް" ކަމަށެވެ.

"އަޅުގަނޑުމެންގެ އަމަން ބަލަހައްޓަން މިތާކު އިންޑިއާ ސިފައިން ތިބޭކަށް ނުޖެހޭ. އެއީ މި ސަރުކާރުގެ ހިޔާނާތްތެރި ރޭވުމެއް،" އެ މަނިކުފާނު ވިދާޅުވި އެވެ.

ރާއްޖޭގައި އިންޑިއާގެ އަސްކަރިއްޔާގެ އުޅަނދު ފަހަރާއި މީހުން ތިބޭތީވެ، ރައީސް ޔާމީން ޗީފް އޮފް ޑިފެންސް ފޯސް މޭޖަ ޖެނެރަލް އަބްދުﷲ ސަމާލް އަށާއި ސިފައިންގެ ވެރިންނަށް ވެސް ފާޑުވިދާޅުވި އެވެ. އެ މަނިކުފާނުގެ ވެރިކަމުގައި އިންޑިއާގެ ހެލިކޮޕްޓަރުތައް ފޮނުވާލަން އުޅުނު ނަމަ ފޮނުވާލެވުނީސް ކަމަށް މި ސަރުކާރުގެ ބައެއް ބޭފުޅުން ވާހަކަ ދައްކަވާފައިވާތީ، އެކަމަށް ރައްދު ދެއްވައި ޔާމީން ވިދާޅުވީ އެކަމަށް ކުރެވުނު މަސައްކަތް ޑިފެންސް މިނިސްޓްރީގައި ފެންނަން ހުންނާނެ ކަމަށެވެ.

އޭރު ތިބި އިންޑިއާ އަސްކަރިއްޔާގެ މީހުންގެ ވިސާ ހަމަވުމުން ވެސް އެމީހުން ތިބި ކަމަށާއި، "އެ މީހުން ތިބީ ގާނޫނާ ހިލާފަށް" ކަމަށް ޔާމީން ވިދާޅުވި އެވެ.

"އެހެން ވީމަ މިއަދު އަޅުގަނޑު ޝަމާލަށް ދަންނަވާލަން. އަޅުގަނޑުމެން އެންމެން މި ދަންނަވަނީ އަޅުގަނޑުމެން ބޭނުމޭ މިގައުމުން އިންޑިއާ ސިފައިން ބާލަން،" ޔާމީން ވިދާޅުވި އެވެ.

އިންޑިއާ ސިފައިން ރާއްޖޭގައި ތިބީ ގާނޫނާ ހިލާފު އެއްބަސްވުމެއްގެ ދަށުން ކަމަށް ވެސް އެ މަނިކުފާނު ވިދާޅުވި އެވެ.

ނަމަވެސްއިންޑިއާއާއެކު މިހާރު ހަދާފައިވާ އެއްބަސްވުންތަކަށް ވާސިލުވުމުގެ އަސްލަކީ، ކުރީގެ ރައީސް އަބްދުﷲ ޔާމީންގެ ވެރިކަމުގައި 2016 ގައި އެކުލަވާލާފައިވާ އެކްޝަން ޕްލޭން ކަމާއި، އެ އެކްޝަން ޕްލޭންގައި ހިމެނޭ ކަންކަން ރާއްޖެއަށް މުހިންމު ކަމާއި ތަންފީޒުކުރުން ކުރިއަށް ގެންދިއުމަށް، ދެ ގައުމުގެ ބައްދުވުންތަކުގައި ކުރިން ފެށިގެން ވެސް އެދިފައިވާ ރައްޔިތުންގެ މަޖިލީހުގެ 241 ކޮމިޓީގައި ސިފައިން ވެސް އަދި އެ ކޮމިޓީގައި ތިއްބެވި އެމްޑީޕީގެ މެމްބަރުން ވެސް ވިދާޅުވެފައިވެ އެވެ.

އިންޑިއާއެކު ވެފައިވާ އުތުރު ތިލަފަޅުގެ އެއްބަސްވުމާއި، ޑޯނިއާ މަތިންދާ ބޯޓުގެ އެއްބަސްވުން އަދި ރާއްޖޭގެ ޗާޓް ކުރެހަށް ހަދާފައިވާ ހައިޑުރޯގްރަފީ އެއްބަސްވުންތަކުގެ ސަބަބުން ރާއްޖޭގެ ސިޔާދަތާއި މިނިވަންކަމަށް ގެއްލުންވާ ކަމުގެ ތުހުމަތުކުރެވޭ ކަމަށް ބުނެ، އެ އެއްބަސްވުންތަކުގެ ތަފްސީލް ހޯދަން ހުށަހެޅުއްވީ، ކުރީގެ ޑިފެންސް މިނިސްޓަރު އަދި މަޑުއްވަރީ ދާއިރާގެ މެމްބަރު އާދަމް ޝަރީފެވެ.

އެ އެއްބަސްވުންތަކުގެ ސަބަބުން ރާއްޖޭގެ ގައުމީ ސަލާމަތާއި މިނިވަން ކަމަށް އެއްވެސް ގެއްލުމެއް ނެތް ކަމަށް، އެމްޑީޕީގެ މެޖޯރިޓީ އޮތް ރައްޔިތުންގެ މަޖިލީހުން ވަނީ ފާސްކޮށްފަ އެވެ.

ރާއްޖޭގައި ތިބި އިންޑިއާ ސިފައިން ބޭރުކުރުމަށް ގޮވާލައި އިދިކޮޅު ކޯލިޝަނުން "އިންޑިއާ އައުޓް"ގެ ނަމުގައި ހަރަކާތެއް ފަށައި، އަދި ޕެޓިޝަނެއްގައި ސޮއިކުރުމުގެ މަސައްކަތް ދަނީ ކުރަމުންނެވެ. ރައީސް ޔާމީން މިނިވަން ވުމުގެ ކުރިން، އިންޑިއާ އަސްކަރިއްޔާ ބޭފުކުރަން ގޮވާލާއި މާލެ އާއި ހުޅުމާލޭގައި މުޒާހަރާ ވެސް ކޮށްފައިވެ އެވެ.

ރައީސް ޔާމީންގެ ވެރިކަމުގައި އިންޑިއާއާއެކު އޮތް ގުޅުން ހީނަރުވެ، ޗައިނާއާ ގުޅުން ބަދަހިކުރި އެވެ. މިހާރު ރައީސް އިބްރާހިމް މުހައްމަދު ސޯލިހުގެ ވެރިކަމުގައި ފެނިގެންދަނީ، ޗައިނާއާ ދުރުވެ، އިންޑިއާގެ ގުޅުން ވަނީ ވަރަށް ބޮޑަށް ވަރުގަދަކޮށްފަ އެވެ.

ރައީސް ސޯލިހުގެ ސަރުކާރުގެ މާލީ އަދި އިގުތިސޯދީ ސިޔާސަތަށާއި މަޝްރޫއުތައް ތަންފީޒު ނުކުރެވި ލަސްވާތީ ރޭގެ ޖަލްސާގައި ޔާމީންގެ ފާޑުކިޔުން އަމާޒުކުރެއްވި އެވެ.