23 ނޮވެންބަރު 2021 - 17:33 0
ހުސެއިން އަރުބާން ފައްވާޒް
ޕެޓިޝަން ކޮމިޓީ: މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން -- ފޮޓޯ: ރައްޔިތުން މަޖިލީސް
23 ނޮވެންބަރު 2021 - 17:33 0
ނެޝެނަލް ޑްރަގް އެޖެންސީ (އެންޑީއޭ) ހިންގުމުގެ ނިޒާމް އިސްލާހުކުރަން އަވަސް ފިޔަވަޅުތަކެއް ނާޅައިފި ނަމަ، ކޮވިޑަށް ވުރެ ނުރައްކާތެރި ބަލިމަޑުކަމަކަށް މަސްތުވާތަކެތީގެ ވަބާ ވެގެންދާނެ ކަމުގެ ނުރައްކާތެރި އިންޒާރާއެކު ރައްޔިިތުން މަޖިލީހުގެ ޕެޓިޝަން ކޮމިޓީގެ ހުށަހެޅުންތަކެއް ދީފި އެވެ.
މި ހުށަހެޅުންތައް ދީފައި ވަނީ ހޭންޑްސް ޓުގެދާ ކިޔާ ޖަމިއްޔާއަކުން ހުށަހެޅި "ޗޭންޗް އެންޑީއޭ" ޕެޓީޝަނާއި ގުޅިގެން އެ ކޮމިޓީއިން 200 އަށް ވުރެ ގިނަ ގަޑިއިރު ހޭދަކޮށް ކުރި ދިރާސާގެ އަލީގައި އެކުލަވާލި ރިޕޯޓުގަ އެެވެ.
މަސްތުވާތަކެއްޗާ ދެކޮޅަށް ޕެޓިޝަން ކޮމިޓީއިން ކުރި މި މަސައްކަތުގެ ތެރެއިން ރާއްޖޭގެ އެކި ހިސާބުތަކުގައި ގާއިމްކޮށްފައި ހުރި ރީހެބިލިޓޭޝަން ސެންޓަރުތަކަށާއި ބައެއް ޖަލުތަކަށް ޒިޔާރަތްކޮށްފައި ވެއެވެ.
މި މަސައްކަތުގެ ތެރެއިން ފާހަގަކުރެވުނު ބައެއް މުހިންމު މައުލޫމާތު މީޑިޔާތަކާ ހިއްސާކުރުމަށް މަޖިލީހުގެ އިދާރާގައި މިއަދު ބޭއްވި ނޫސްވެރިންގެ ބައްދަލުވުމުގައި ޕެޓިޝަން ކޮމިޓީގެ މުގައްރިރު، އަދި މުލަކު ދާއިރާގެ މެމްބަރު، އިބްރާހިމް ނަސީރު ވިދާޅުވީ ރާއްޖޭގައި ދިރިއުޅެމުންދާ ކޮންމެ 100 މީހަކުން 57 މީހުންނަކީ މަސްތުވާތަކެތީގެ ވަބާގައި ޖެހިފައިވާ މީހެއް ކަމަށެވެ.
އަދި ރާއްޖޭގެ އާބާދީގެ ތެރެއިން މުޅި ޖުމްލަ 16 ހާހަށް ވުރެ ގިނަ މީހުން މަސްތުވާތަކެއްޗަށް ދެވި ހިފާފައިވާ ކަމަށާއި، ކުށްތަކުގައި ހައްޔަރު ކުރެވެނީވެސް އެފަދަ ކޮންމެވެސް މައްސަލައެއްގައި ކަމަށެވެ.
އަދި މި ވަބާގައި ޖެހިފައިވާ މީހުންނަށް ފަރުވާ ދިނުމަށްޓަކައި މި އަހަރަށްވެސް 95 މިލިއަން ބަޖެޓް ކުރެވި، ބޭނުން ކުރަމުން ދާއިރު، އެންޑީއޭގެ ނިޒާމް ދޯހަޅި ކަމަށާއި، އޭގެ ނަތީޖާއެއްގެ ގޮތުން މަސްތުވާތަކެތީގެ ވަބާ އިތުރަށް ފެތުރިގެން ދާކަން ފާހަގަވެފައިވާ ކަމަށް ނަސީރު ވިދާޅުވިއެވެ.
"އަޅުގަނޑުމެންނަށް ލިބުނު މައުލޫމާތުގެ އަލީގައި ފާހަގަކުރެވުނު، ބައެއް ފަހަރު ހީވާ ކަހަލަ އެއްބަޔަކު އުޅެނީ މިކަން ހުއްޓުވާށޭ، އަނެއް ބަޔަކު މަސައްކަތް ކުރަނީ މިކަން އާލާ ކުރާށޭ،" ނަސީރު ވިދާޅުވި އެވެ.
ކޮމިޓީގެ ނައިބު މުގައްރިރު އަދި ތިނަދޫ އުތުރު ދާއިރާ މެމްބަރު އަބްދުﷲ މުޣުނީ ވިދާޅުވީ 3000 އަށް ވުރެ ގިނަ މީހުންގެ ސޮޔާއެކު ހުށަހެޅުނު މި ޕެޓިޝަނަކީ އެ ކޮމިޓީއަށް މިހާތަނަށް ހުށަހެޅުނު އެންމެ ބޮޑު ޕެޓިޝަން ކަމަށެވެ.
އޭނާ ވަނީ މި ރިޕޯޓް އެކުލަވާލަން ކުރި ދިރާސާގެ ތެރެއިން ދަތުރު ކުރި ބައެއް ރަށްރަށުގެ ރީހެބިލިޓޭޝަން ސެންޓަރުތަކުން ފާހަގަވި ބައެއް ކަންކަން ހާމަކޮށްދެއްވައިފަ އެވެ.
"އެ ކުދިން އެތަން ބޭނުން ކުރަނީ ރަނގަޅަށް ނިދާލަން ތަނެއް ނުލިބުނީމަ، ނޫނީ ޑްރަގް ބޭނުންކޮށްފައި ވަރުބަލިވީމަ، ނޫނީ އެއަށް ސިކު ވީމަ ގޮސް އެތަނަށް ވަދެ ފަރުވާ ހޯދާފައި ބޭރަށް ނުކުމެވޭވަރު ވީމާ ނުކުމެފައި. ވަދެ ނުކުތުމަށް އެއްވެސް ކަހަލަ ހުރަހެއް ނޯންނަ ތަނެއްގެ ގޮތުގައި ފާހަގަވެގެން ދިޔަ،" މުޣުނީ ވިދާޅުވިއެވެ.
1. ޕްރޮސެކިއުޓާ ޖެނެރަލްގެ އޮފީހުން ޑްރަގް ކޯޓަށް ހުށަހަޅާ މައްސަލަތަކާ ގާތްކުރާ ނިސްބަތަށް ނުވަތަ އޭގެ ދެބައިކުޅަ އެއްބަޔަށްވާ އަދަދަށް ފަރުވާގެ ނިޒާމު ފުރިހަމަވާތަން ނުފެންނަކަމުން، އެންޑީއޭގެ ފަރުވާގެ ނިޒާމުގައި ހުރި މައްސަލަތައް ބަލައި، އެކަމަށް ގެންނަންޖެހޭ އިސްލާހުތައް ކަމާގުޅޭ މިނިސްޓްރީން ގެނައުން. 2. މަސްތުވާތަކެއްޗާބެހޭ ގާނޫނުގެ 45 ވަނަ މާއްދާގައި ބަޔާންކޮށްފައިވާ ފަދައިން، ޑްރަގް ކޯޓަށް ލަފާދިނުމަށްޓަކައި ފަންނީ ޓީމެއް ނުވަތަ ޓީމުތަކެއް، އެންޑީއޭއިން އެކުލަވާލާފައިނުވާތީ، އެ ޓީމް ނުވަތަ ޓީމްތައް ވީހާވެސް އަވަހަށް އެކުލަވާލުން؛ 3. ކުށުގެ ވެށިން ހައްޔަރުކުރެވޭ ފަރާތްތަކުގެ މުއްދަތު ޖެހުމުގެ އިހްތިސޯސް ކްރިމިނަލް ކޯޓުގައި ނެތްކަމަށް އެ ކޯޓުގެ ގާޒީންގެ މަޖިލީހުން ނިންމަވާފައިވުމުން، އެ ފަރާތްތަކުގެ މުއްދަތު ޖެހުމުގެ ކަންކަން ކުރިއަށްގޮސްފައި ނުވާތީ އެފަރާތްތައް ހައްޔަރުން ދޫކޮށްލަންޖެހިފައިވުމުން، ގާނޫނީ ގޮތުން މިކަމަށް އަވަސް ހައްލެއް އެޓާނީ ޖެނެރަލްގެ އޮފީހާއި އަދި ޕްރޮސެކިއުޓާ ޖެނެރަލްގެ އޮފީސް ގުޅިގެން ހޯދުން؛ 4. ރާއްޖޭގެ އެކި ސަރަޙައްދުތަކުގައި ދިވެހި ފުލުހުންގެ ހިދުމަތުން ހިންގާ އޮޕަރޭޝަންތައް ހިންގުމަށް ދިމާވާ ހުރަސްތައް ފާހަގަކޮށް އެކަންކަމަށް ގާނޫނީ ހައްލު ހޯދައިދިނުމަށް އެޓާނީ ޖެނެރަލްގެ އޮފީހާއި އަދި ޕްރޮސެކިއުޓާ ޖެނެރަލްގެ އޮފީސް ގުޅިގެން މަސައްކަތްކުރުން؛ 5. މަސްތުވާތަކެއްޗާބެހޭ ގާނޫނަށް ސަރުކާރުގެ ކަމާގުޅޭ އިދާރާތަކުން ފާހަގަކުރާ ބަދަލުތައް ދިރާސާކޮށް، އެ ގާނޫނަށް ގެންނަންޖެހޭ އިސްލާހުތައް ވީހާވެސް އަވަހަށް އެޓާނީ ޖެނެރަލްގެ އޮފީހުން ގެނައުން.
Comment