ރާއްޖޭގައި ވިއްކާ މުދަލުން ނަގާ އާންމު ޖީއެސްޓީ ދާއިރާއިން ނިމުނު އަހަރު ދައުލަތަށް ލިބުނު އާމްދަނީގެ 93 ޕަސެންޓު ލިބުނީ މާލެ ސިޓީން ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އިން ހާމަކޮށްފި އެވެ.

މިދިޔަ އަހަރު ދައުލަތަށް ޖީއެސްޓީން 2.1 ބިލިއަން ރުފިޔާ ލިބުނު އިރު، ޓޫރިޒަމް ޖީއެސްޓީން ލިބުނީ 2.3 ބިލިއަން ރުފިޔާ އެވެ. އަދިި ވިޔަފާރި ފައިދާއިން ނަގާ ބީޕީޓީން 2.4 ބިލިއަން ރުފިޔާ ލިބުނެވެ.

މިއީ ނިމުނު އަހަރު ޓެކްސް އާމްދަނީން ދައުލަތަށް ލިބުނީ 8.6 ބިލިއަން ރުފިޔާގެ އާމްދަނީގެ 80 އިންސައްތައާ ގާތްކުރާ އަދަދެކެވެ.

މާލެ ސިޓީން ޖީއެސްޓީއަށް 1.9 ބިލިއަން ރުފިޔާ

ރާއްޖޭގެ އިގުތިސޯދީ ހަރަކާތްތަކުގެ މައި ހަބަކީ ވެރި ރަށް މާލެ އެވެ. މައި ބަނދަރާއި ހުރިހާ ވިޔަފާރި ހަރަކާތެއް ކަހަލަ ގޮތަކަށް ފެށެނީ މާލެއިން ނޫނީ ކައިރިން އޮންނަ ހުޅުލޭ އެއާޕޯޓުންނެވެ. މީގެ ސަބަބުން ރާއްޖޭގެ އާބާދީގެ ބޮޑު ބަޔެއް ދިރިއުޅެނީ ހުޅުމާލެ އަދި ވިލިމާލެ ހިމެނޭ ގޮތަށް މާލެ ސިޓީގަ އެވެ.

ގައުމީ ސްޓެޓިސްޓިކްސް ބިއުރޯގެ އެންމެ ފަހުގެ އަންދާޒާތަކުން ދައްކާ ގޮތުގައި މާލޭގައި 227،486 މީހުން ދިރިއުޅެ އެވެ. މިއީ ރާއްޖޭގެ އާބާދީގެ 40.8 ޕަސެންޓެވެ. މިދިޔަ އަހަރު މާލެ ސިޓީން ޖީއެސްޓީގެ ގޮތުގައި 1.9 ބިލިއަން ރުފިޔާ ލިބުނެވެ.

މާލެ ނަގާފައި ދެން އެންމެ ގިނައިން ޖީއެސްޓީ ދެއްކީ ރާއްޖޭގައި ތިންވަނައަށް އެންމެ ބޮޑު އާބާދީއެއް އޮންނަ އައްޑޫ ސިޓީންނެވެ. އައްޑޫ ސިޓީ އެ އަހަރު ޖީއެސްޓީއަށް ލިބުނީ 42.3 މިލިއަން ރުފިޔާ އެވެ.

މާލެ ސިޓީ އާއި އައްޑޫ ސިޓީގެ އިތުރުން ހދ. އަތޮޅާއި ފުވައްމުލައް ސިޓީ އަދި ގދ. އަތޮޅާއި ކ. އަތޮޅުން 10 މިލިއަން ރުފިޔާއަށް ވުރެ ބޮޑު އާމްދަނީއެއް ޖީއެސްޓީ ދާއިރާއިން ލިބުނެވެ.

ޖީއެސްޓީ އާމްދަނީން އެންމެ ކުޑަ އަދަދެއް ލިބުނު އަތޮޅަކީ ރާއްޖޭގައި އެންމެ މަދު އަދަދެއްގެ މީހުން ދިރިއުޅޭ ވ. އަތޮޅެވެ. އެންމެ 2،600 މީހުން އުޅޭ އަތޮޅުން ޖީއެސްޓީއަށް ލިބުނީ 121،822ރ. އެވެ.

ރާއްޖޭގެ އެކި ކަންކޮޅުތަކުން ލިބިފައިވާ ޖީއެސްޓީ އާމްދަނީ އާއި އާބާދީގެ އަޅާކިޔުންތަކުން ފާހަގަވާ ގޮތުގައި ޖީއެސްޓީ އާމްދަނީ އޮންނަނީ އާބާދީއާ ވަރަށް ބޮޑަށް ގުޅިފަ އެވެ.

މިގޮތަށް އާބާދީ އާއި ޖީއެސްޓީ އާމްދަނީގެ ގުޅުން ނުފެންނަނީ ކ. އަތޮޅުންނެވެ. އެގޮތުން ރާއްޖޭގެ ދެވަނައަށް އެންމެ ބޮޑު އާބާދީއެއް އޮންނަ ކ. އަތޮޅުން ޖީއެސްޓީއަށް ލިބުނު އަދަދާ، ނިސްބަތުން އާބާދީ ކުޑަ ގދ. އަތޮޅާއި ފުވައްމުލައް ސިޓީން ލިބުނު އަދަދާ ދާދީ އެއްހަމަ އެވެ.

ޓީޖީއެސްޓީ އާމްދަނީގެ ބޮޑު އިންސައްތައެއް ކ. އަތޮޅުން

ރާއްޖޭގައި އެންމެ ގިނަ އަދަދެއްގެ ރިސޯޓުތަކާއި ގެސްޓްހައުސްތައް ހުންނަނީ، މާލެ ސިޓީ ނުހިމެނޭ ގޮތަށް، ކ. އަތޮޅުގަ އެވެ. ދައުލަތަށް ޓީޖީއެސްޓީ އާމްދަނީގެ ބޮޑު އިންސައްތައެއް މި އަތޮޅުން ލިބެނީ އެހެން ވެއެވެ.

މިދިޔަ އަހަރު ކ. އަތޮޅުން ޓީޖީއެސްޓީން 771 މިލިއަން ރުފިޔާ ލިބުނެވެ. މިއީ އަހަރުގެ ތެރޭގައި ޓީޖީއެސްޓީން ލިބުނު އާމްދަނީގެ 32.6 ޕަސެންޓެވެ.

ދެވަނައަށް ޓީޖީއެސްޓީ އެންމެ ގިނައިން ލިބުނީ ބ. އަތޮޅުންނެވެ. އެ އަތޮޅުން ޓީޖީއެސްޓީން 294 މިލިއަން ރުފިޔާ ލިބުނެވެ.

އޭގެ އިތުރުން މާލެ ސިޓީ އަދި ނ. އަތޮޅުން 200 މިލިއަނަށް ވުރެ މަތިން ޓީޖީއެސްޓީ އާމްދަނީ ލިބުނެވެ. އަދި އދ. އަތޮޅުން އިތުރު 184 މިލިއަން ރުފިޔާ ލިބުނެވެ.

އެންމެ ކުޑަ އަދަދެއް ޓީޖީއެސްޓީއަށް ލިބުނީ ފުވައްމުލައް ސިޓީންނެވެ. ރާއްޖޭގައި އެންމެ ރަށެއް އޮންނަ ހަމައެކަނި އަތޮޅުން ޓީޖީއެސްޓީއަށް ލިބުނީ 247،127ރ. އެވެ.

ރާއްޖޭގެ އެކި ސަރަހައްދުތަކުން ލިބުނު ޓީޖީއެސްޓީ އާމްދަނީ ގުޅެނީ ރިސޯޓު، ހޮޓާ އަދި ގެސްޓްހައުސް ހުންނަ އަދަދުތަކާ އެވެ. އަދި އެންމެ ބޮޑު އާމްދަނީއެއް ލިބުނީ ޓޫރިސްޓް އެކޮމޮޑޭޝަން އެންމެ ގިނައިން ހުންނަ އަތޮޅުތަކުންނެވެ.

މިދިޔަ އަހަރު އިގުތިސޯދަށް އައި ލޮޅުމުގައި ރާއްޖޭގެ ހުރިހާ ސަރަހައްދަކުން ލިބުނު އާމްދަނީ އޭގެ ކުރީ އަހަރަށް ވުރެ ދަށެވެ. އެގޮތުން ޖީއެސްޓީ އަދި ޓީޖީއެސްޓީ އާމްދަނީއަށް އެކަނި ބެލި ނަމަވެސް އޭގެ ކުރީ އަހަރާ ބަލާއިރު އާމްދަނީ ތިން ބިލިއަން ރުފިޔާ ދަށްވި އެވެ.