ގިނަ ބަޔަކު ޕްލޭންކޮށްގެން އަމިއްލަ ކުންފުންޏެއްގެ އިމާރާތުގައި ރައްކާކޮށްފައިވާ 1.9 މިލިއަން ރުފިޔާގެ ނަގުދު ފައިސާ ވަގަށް ނެގި މައްސަލައެއް ފުލުހުން ބަލަން ފަށައިފި އެވެ.

ކްރިމިނަލް ކޯޓަށް މިއަދު އޭގެ ތުހުމަތުގައި މީހަކު ހާޒިރުކޮށްފައިވެ އެވެ. ކޯޓުން އޭނާގެ ބަންދަށް 15 ދުވަސް ޖަހާފައިވެ އެވެ. މީގެ ކުރިން ވެސް އޭނާއަށް ބަންދުގެ މުއްދަތު ޖަހާފައިވެ އެވެ.

ބަންދު އަމުރުގައިވާ ގޮތުން، ބަންދުގެ މުއްދަތު ޖަހަން ބޭއްވި އަޑުއެހުމުގައި ފުލުހުން ބުނެފައިވަނީ ވައްކަން ހިނގި ސަރަހައްދުގައި ވައްކަމުގައި ސީދާ ބައިވެރިވި މީހުން، މިއަދު ކޯޓަށް ހާޒިރުކުރި މީހާގެ އަތަށް ކަޅު ދަބަހެއް ދީފައިވާ ކަމަށެވެ. އެ ދަބަސް ހިފައިގެން އޭނާ އުޅޭ ގެއަށް ދިޔައީ ކަމަށް ފުލުހުން ބުންޏެވެ.

ވައްކަން ކުރި ދުވަހު، ތުހުމަތު ކުރެވޭ މީހުން ބޭނުންކުރި ސައިކަލެއް ކުއްޔަށް ނެގުމުގައި ވެސް އެ މީހަކު ބައިވެރިވި ކަމަށް ވެސް ފުލުހުން ތުހުމަތުކޮށްފައިވެ އެވެ. ފުލުހުން ވަނީ އެ ތުހުމަތުތަކަށް ބާރު ލިބިދޭ ސީސީޓީވީ ފުޓޭޖުގެ ވީޑިއޯ އާއި އޭގެ ސްނެޕްޝޮޓްތަކެއް ކޯޓަށް ހުށަހަޅައިފަ އެވެ.

މި ވައްކަމުގައި ގިނަ އަދަދެއްގެ މީހުން ބައިވެރިވާ ކަމަށް ފުލުހުން ބުނެފައިވާއިރު ބައިވެރިވި ކަމަށް ބެލެވޭ އަދަދެއް ފުލުހުން ކޯޓުގައި ބުނެފައެއް ނުވެ އެވެ. މި މައްސަލައާ ގުޅޭ އެއްވެސް މައުލޫމާތެއް މީޑިއާއަށް ހާމަނުކުރާތީ މި ވައްކަން ހިނގި ތާރީހެއް އަދި މިކަމުގައި ބައިވެރިވީ މީހުންގެ އަދަދެއް ނޭނގެ އެވެ.