ދުނިޔޭގެ ކަންކޮޅުތަކުގައި ނޫސްވެރިކަމުގެ މިނިވަންކަން އޮތް މިންވަރު ވަޒަންކޮށް، ރިޕޯޓާސް ވިތައުޓް ބޯޑާސް އިން ކޮންމެ އަހަރަކު އަދާހަމަކުރާ "ވޯލްޑް ޕްރެސް ފްރީޑަމް އިންޑެކްސް" ގައި މިއަހަރު ރާއްޖެ ހަ ދަރަޖަ ފަހަތަށް ޖެހިލައިފި އެވެ.

ވޯލްޑް ޕްރެސް ފްރީޑަމް އިންޑެކްސް މިއަދު އަދާހަމަކުރި އިރު ރާއްޖެ ރޭންކް ކޮށްފައި އޮތީ 106 ވަނައިގައި "ޑިފިކަލްޓް" [ނޫސްވެރިކަން ކުރަން އުނދަގޫ] ގައުމެއްގެ ގޮތުގަ އެވެ. ނޫސްވެރިކަމުގެ މިނިވަންކަމުގައި ރާއްޖެ ފަހަތަށް ޖެއްސުމުގައި ރިޕޯޓާސް ވިތައުޓް ބޯޑާސް އިން ބެލި ސަބަބުތަކުގެ ތެރެއިން އެންމެ ފާހަގަކޮށްލެވޭ އެއް ސަބަބަކީ ނޫސްވެރިން މައުލޫމާތު ހޯދާ މަސްދަރުތައް ކޯޓުން އަމުރުކޮށްފި ނަމަ ހާމަކުރަން ލާޒިމުވާ ގޮތަށް މިދިޔަ އަހަރު ފާސްކޮށް ތަސްދީގުުކުރި ހެއްކާ ބެހޭ ގާނޫނެވެ.

މިދިޔަ އަަހަރު ރާއްޖެ އޮތީ 100 ވަނައިގައި "ޕްރޮބްލޮމެޓިކް" ކެޓަގަރީގަ އެވެ.

ރިޕޯޓާސް ވިތައުޓް ބޯޑާސް އިން ފާހަގަކޮށްފައިވާ ގޮތުގައި ރާއްޖޭގެ ގާނޫނު އަސާސީން ނޫސްވެރިންނަށް ލިބިދީފައިވާ ހައްގަކަށް އެ ބިލުން ވަނީ ހުރަސް އެޅިފަ އެވެ. މިފަހަރުގެ އަދާހަމައިގައި އެކަން ފާހަގަކޮށްފައި އޮތީ ނޫސްވެރިކަމުގެ މިނިވަންކަމަށް ގާނޫނީ ގޮތުން އަޅާފައި އޮތް ހުރަހެއް ކަމަށެވެ.

ނޫސްވެރިކަމުގެ މިނިވަންކަން ވަޒަންކުރާ ފާހަގަތަކުން ޕޮއިންޓް ލިބުނު ގޮތް

• ސިޔާސީ ގޮތުން: ސިޔާސީ ގޮތުން މިދިޔަ އަހަރު ރާއްޖެއަށް 53.75 މާކްސް ލިބުނު އިރު މިއަހަރު ލިބިފައި އޮތީ 43.48 މާކު އެވެ. އެ ފާހަގައިން ބަލާއިރު މިދިޔަ އަހަރު ރާއްޖެ 97 ވަނައިގައި އޮތް އިރު މިއަހަރު އޮތީ 109 ވަނައިގަ އެވެ.
• އިގުތިސާދީ ގޮތުން: އިގުތިސާދީ ގޮތުން ބަލާ އިރު ރާއްޖެއަށް މިދިޔަ އަހަރަށް ވުރެ ގިނައިން މިއަހަރު މާކްސް ލިބުނެވެ. މިދިޔަ އަހަރު 32.84 މާކުހާ އެކު 161 ވަނައިގައި އޮތް އިރު މިއަހަރު އޮތީ 136.04 މާކުހާ އެކު 133 ވަނައިގަ އެވެ.
• ގާނޫނީ ގޮތުން: ގާނޫނީ ގޮތުން ބަލާއިރު ރާއްޖެ މިދިޔަ އަހަރު އޮތީ 59.91 މާކުހާ އެކު 98 ވަނައިގަ އެވެ. އެހެން ނަމަވެސް މިއަހަރު އޮތީ 54.42 މާކުހާ އެކު 111 ވަނައިގަ އެވެ.
• އިޖުތިމާއީ ގޮތުން: އިޖުތިމާއީ މިންގަނޑުން މިދިޔަ އަހަރަށް ވުރެ ރާއްޖޭގެ ރޭންކް އޮތީ ދަށްވެފަ އެވެ. އެ މިންގަނޑުން ބަލާއިރު މިދިޔަ އަހަރު 55.68 މާކުހާ އެކު 124 ވަނައިގަ އެވެ. މިއަހަރު 48.10 މާކުހާ އެކު އޮތީ 131ވަނައިގަ އެވެ.
• ސަލާމަތާއި ރައްކާތެރިކަމުގެ ގޮތުން: ރާއްޖެ ވަނީ ބޮޑުތަނުން ފަހަތަށް ޖެހިފަ އެވެ. މިދިޔަ އަހަރު 82.48 މާކުހާ އެކު 57 ވަނައިގައި އޮތް އިރު 79.76 މާކުހާ އެކު މިއަހަރު އޮތީ 80 ވަނައިގަ އެވެ.

ނޫސްވެރިކަމުގެ މިނިވަންކަމުގައި ރާއްޖޭގެ ރޭންކް ދަށްވި އިރު މި ސަރަހައްދުގެ އެހެން ގައުމުތަކުގެ ހާލަތު އޮތީ މާ ގޯސްކޮށެެވެ. އެގޮތުން އަވަށްޓެރި އިންޑިއާ އޮތީ 159 ވަނައިގައި "ހާލަތު ވަރަށް ގޯސް" ގައުމެއްގެ ގޮތުގަ އެވެ. ޕާކިސްތާނު 152 ވަނައިގައި އޮތް އިރު ސްރީލަންކާ އޮތީ 150 ވަނައިގަ އެވެ.