ވަޒީފާއާ ބެހޭ ޓްރައިބިއުނަލްގެ އިންޑަސްޓްރިއަލް ޑިސްޕިއުޓް ރިޒޮލިއުޝަން ޑިވިޝަންގެ މެންބަރު ފަތިމަތު ސައުސަން މިއަދު ނިޔާވެއްޖެ އެވެ.
އަދަދު އަށް އެނގިފައިވާ ގޮތުގައި ސައުސަން ނިޔާވީ ބޭސްފަރުވާއަށް އިންޑިއާއަށް ވަޑައިގެން އުޅުއްވަނިކޮށެވެ.
ލޯޔަރެއްގެ ގޮތުގައި މަސައްކަތްކުރައްވާފައިވާ ސައުސަން ނިޔާވުމާ ގުޅިގެން ގިނަ ބަޔަކު އަންނަނީ އޭނާގެ އާއިލާއަށް ތައުޒިޔާ ކިޔަމުންނެވެ.
ވަޒީފާއާ ބެހޭ ޓްރައިބިއުނަލްއަށް ސައުސަން އައްޔަންކުރެއްވީ 2024 ވަނަ އަހަރުގެ ތެރޭގަ އެވެ. އޭނާ ވަނީ އިންފޮމޭޝަން ކޮމިޝަނަރުގެ އޮފީހުގައި ސީނިއާ ލޯޔަރެއްގެ ގޮތުގައި ކުރިން މަސައްކަތް ކުރައްވާފަ އެވެ.
ވަޒީފާއާ ބެހޭ ޓްރައިބިއުނަލްގެ ރައީސަކީ އަމްޖަދު މުސްތަފާ ކަމަށްވާއިރު، ނައިބުރައީސަކީ އަހްމަދު މަމްދޫހު އެވެ. އެތަނުގެ މެންބަރުންގެ ގޮތުގައި މިހާރު ތިއްބެވީ މަރްޔަމް ރިޝްފާ، ހިކުމާ އަހްމަދު ނިޒާރު ސައުސަން އަލީ، އިޝާރާ އަބްދުލްއަޒީޒް އަދި ހަސަން އިބްރާހިމް އެވެ.
