ޔުނައިޓެޑް އެރަބް އެމިރޭޓްސް (ޔޫއޭއީ) ގެ ފްލައިޑުބާއީ އެއާލައިންގެ ކޯ-ޕައިލެޓަކު، މި ހަފުތާގެ ކުރީކޮޅު ކުރި ދަތުރެއްގެ ތެރެއިން ކޮކްޕިޓްގައި އޮންނަ ކްރޭޝް އޭކްސް (ކޯރާޑި) ބޭނުންކޮށްގެން ޕައިލެޓަށް ހަމަލާދީ، "ޓެރަރިސްޓް އަމަލެއް ހިންގަން މަސައްކަތްކޮށްފައިވާ" ކަމަށް އެ ގައުމުގެ ޕްރޮސެކިއުޓާ ޖެނެރަލް ވިދާޅުވެއްޖެ އެވެ.
އެ ގައުމުގެ ދައުލަތުގެ މީޑިއާ، ވޭމްއިން ހޮނިހިރު ދުވަހު ރިޕޯޓްކޮށްފައިވާ ގޮތުގައި، ޕްރޮސެކިއުޓާ ޖެނެރަލް ހަމަދު ސައިފް އަލް ޝަމްސީ ވިދާޅުވީ މިދިޔަ ބުދަ ދުވަހު ދަތުރުކުރި އެފްޒެޑް1073 ފްލައިޓުގައި ހަމަލާދިން ކޯ-ޕައިލެޓް ވަނީ ބޯޓުގެ ކޮންޓްރޯލް އަތުލަން މަސައްކަތް ކޮށްފަ އެވެ.
މި ހާދިސާ ހިނގަން މެދުވެރިވި ހުރިހާ ސަބަބުތަކާއި، އެކަމުގެ ފަހަތުގައިވާ މަގުސަދުތަކާއި، އެކަމާ ގުޅުންހުރި އެހެނިހެން ކަންކަން ދެނެގަތުމަށް ތަހުގީގު ކުރިއަށްދާ ކަމަށް އޭނާ ވިދާޅުވި އެވެ. މީގެ އިތުރުން، ފަންނީ ތަހުގީގުތައް ފުރިހަމަކުރުމާއި، ފިޒިކަލް އަދި ޑިޖިޓަލް ހެކިތައް ދިރާސާކުރުމުގެ މަސައްކަތް ވެސް ކުރިއަށްދާ ކަމަށް ވިދާޅުވި އެވެ.
އަލް ޝަމްސީ ވިދާޅުވީ، މި މައްސަލައިގައި ފުރިހަމަކުރަންޖެހޭ ގާނޫނީ އިޖުރާއަތްތައް ނިމުނުހާ އަވަހަކަށް ތަހުގީގުގެ ފައިނަލް ނަތީޖާ އާންމުކުރާނެ އެވެ.
ކްރޭޝް އޭކްސް އަކީ ކުއްލި ނުރައްކަލުގެ ހާލަތްތަކުގައި ބޯޓުގެ ބައެއް ބައިތައް ކަފާލައިގެން ނުކުމެވޭނެ ގޮތް ހެދުމަށްޓަކައި ކޮކްޕިޓްގައި ބާއްވާ ކޯރާޑިއެކެވެ.
ޖުމްލަ 174 މީހުންނާއެކު ޔޫއޭއީގެ ދުބާއީން އިޒްރޭލުގެ ތެލް އަވީވަށް ދަތުރުކުރި މި ފްލައިޓުގައި، ނަން ހާމަކޮށްފައިނުވާ ކޯ-ޕައިލެޓް ވަނީ އިންޑިއާގެ ޕައިލެޓެއް ކަމަށްވާ ސްމިތު މަޗާރަށް ހަމަލާދީ ޒަޚަމްކޮށްލާފަ އެވެ.
މި ހަމަލާއާ ގުޅިގެން ބޯޓު ކޮންޓްރޯލުން ނެއްޓި، ކުޑަ ވަގުތުކޮޅެއްގެ ތެރޭގައި ގާތްގަނޑަކަށް 17,000 ފޫޓު (5,180 މީޓަރު) ތިރިއަށް ވެއްޓުނެވެ. ނަމަވެސް، ބޯޓުގައި ތިބި އިތުރު ދެ ޕައިލެޓުން ވަނީ ބޯޓުގެ ކޮންޓްރޯލް އަލުން އަތުލާފަ އެވެ.
މި ހާދިސާއާ ގުޅިގެން ފްލައިޓްގެ މިސްރާބު ބަދަލުކޮށް، ސައުދީ އަރަބިއްޔާގެ ހުޅަނގު އުތުރުގައި އޮންނަ ތަބޫކްގެ ޕްރިންސް ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓަށް ވަނީ ކުއްލި ހާލަތުގައި ޖައްސާފަ އެވެ.
