ޕެރިސް (އޮކްޓޫބަރު 3) - ފްރާންސް ގައުމީ ފުޓްބޯޅަ ޓީމުގެ ކޯޗުކަމާ ޒިނެދިން ޒިދާން ހަވާލުވި ފަހުން އެ ޓީމުން ފުރަތަމަ ފަހަރަށް މެޗަކުން މޮޅެއް ނުލިބި ނިންމާލަން ޖެހިއްޖެ އެވެ.
ސާދަ އަހަރަށް ފަހު، ޑިޑިއޭ ޑެޝޯމްޕްސް، ފްރާންސް ކޯޗުކަމުން ވަކިވިއިރު، ޒިދާން އެ ޓީމާ ހަވާލުވެ ނުކުތް ފުރަތަމަ ދެ މެޗުން، ޔުއެފާ ނޭޝަންސް ލީގުގައި ވަނީ ތުރުކީ އާއި ބެލްޖިއަމް އަތުން 1-0 އިން މޮޅުވެފަ އެވެ. އަމިއްލަ ދަނޑުގައި ފްރާންސުން ރޭ ކުޅުނު މެޗުގައި އިޓަލީއާ އެއްވަރުވީ 1-1 އިންނެވެ.
ޕެރިހުގައި ރޭ ކުޅުނު މެޗުގައި ފްރާންސް އިން ފޮނުވާލި ގިނަ ހަމަލާތައް އިޓަލީގެ ކީޕަރު، ޖިއަންލުއީޖީ ޑޮނަަރުންމާ ވަނީ ހުއްޓުވައިފަ އެވެ. ފްރާންސް އިން މި މެޗުގައި ލީޑުނެގީ 55 ވަނަ މިނިޓްގައި މައިކަލް އޮލީސޭ ޖެހި ގޯލުންނެވެ. މިއީ، ހިލޭޖެހުމަކުން ރަޔާން ޗާކީ ޖައްސާލި ބޯޅައަކުން އޮލީސޭ ޖެހި ގޯލެކެވެ. މި އަހަރު ފެށި ފަހުން ފްރާންސް އިން ކުޅުނު 15 މެޗުން އޮލީސޭ ވަނީ 14 ލަނޑު ޖަހައިފަ އެވެ.
އިޓަލީން ފުރަތަމަ ހާފުގައި މޮއިސް ކީން ޖެހި ގޯލެއް ވަނީ އޮފްސައިޑްވެފަ އެވެ. ދެ ވަނަ ހާފުގައި، މެޗުގެ 68 ވަނަ މިނިޓްގައި އެ ޓީމުން އެއްވަރުކުރީ އަލެސަންޑްރޯ ބަސްޓޯނީ ޖެހި ގޯލުންނެވެ. ބަސްޓޯނީ މި ލަނޑު ޖެހީ ފްރާންސް މެދުތެރެއިން ހެދި ގޯހަކުންނެވެ.
ފްރާންސްގެ އެޑުއާޑޯ ކަމަވިންގާ ފޮނުވާލި ޝޮޓެއް ޑޮނަރުންމާ މަތަކުރިއިރު، އޮސްމާން ޑެމްބެލޭ ފޮނުވާލި ހަމަލާ ދިޔައީ ހުރަސްދަނޑިމަތިންނެވެ. އަދި، އިޓަލީގެ ނިކޯލޯ ބަރޭލާގެ ހަމަލާއެއް ވެސް ގޯލާ ސީދާނުވި އެވެ.
މެޗުގެ 85 ވަނަ މިނިޓްގައި ފްރާންސްގެ ޑަޔޫޓް އުޕަމެކާނޯ އަށް ދެ ވަނަ ރީނދޫ ކާޑާ އެކު ވަނީ ރަތެއް ދައްކަައިފަ އެވެ.
އިޓަލީ ކޯޗުކަމާ ދެ ވަނަ ފަހަރު ހަވާލުވި ރޮބާޓޯ މަންޗިނީގެ ކޯޗުކަމުގައި ފުރަތަމަ މެޗުން އެ ޓީމު ބެލްޖިއަމް އަތުން ބަލިވި ނަމަވެސް ދެ ވަަނަ މެޗުގައި ވަނީ ތުރުކީ ބަލިކޮށްފަ އެެވެ. އަދި، ތިން ވަނަ މެޗުން މި ވަނީ ފްރާންސް ދަނޑުގައި އެ ޓީމާ އެއްވަރުވެފަ އެެވެ.
