ވިންސެންޓް ވެން ގޯ އާއި ޕޯލް ސެޒާން އަދި ކްލޯޑް މޮނޭ ފަދަ މަޝްހޫރު ކުރެހުންތެރިންގެ، ގިނަ ދުވަސްތަކެއް ވަންދެން އާންމުންނަށް ފެނިފައިނުވާ 12 ކުރެހުމެއްގެ ކަލެކްޝަނެއް އަންނަ ނޮވެމްބަރު މަހު ނިއުޔޯކުގައި ނީލަން ކިޔުމަށް ނިންމައިފި އެވެ.
މި ކުރެހުންތައް ވިއްކައިގެން ގާތްގަނޑަކަށް 450 މިލިއަން ޑޮލަރު ލިބޭނެ ކަމަށް ބެލެވެ އެވެ.
މި ކަލެކްޝަނުގައި ހިމެނޭ ފަސް ކުރެހުމެއް މިދިޔަ ބުދަ ދުވަހު ލަންޑަނުގެ ސޮދަބީޒްގައި ވަނީ ދައްކާލައިފަ އެވެ. އޭގެ ތެރޭގައި ސެޒާންގެ "އާލެކިން" އާއި މޮނޭގެ "ލެ ޖާޑިން ޑެ ޓިއުލެރީސް" ހިމެނެ އެވެ.
މި ކަލެކްޝަނުގެ ބާކީ ހުރި ކުރެހުންތައް މިހާރު ޑިޖިޓަލްކޮށް ދައްކާލަމުންދާއިރު، އޭގެ ތެރޭގައި ހިމެނޭ ވެން ގޯގެ "ޗަޓައިގްނިއާސް އެން ފްލޫސް" ގެ އަގު ގާތްގަނޑަކަށް 180 މިލިއަން ޑޮލަރަށް އަރާނެ ކަމަށް ލަފާކުރެވެ އެވެ. ނޮވެމްބަރު 18 ވަނަ ދުވަހު ނިއުޔޯކުގައި ބާއްވާ ނީލަމުގެ ކުރިން، މި ކުރެހުންތަކުގެ ތެރެއިން ބައެއް އާޓް ގެލެރީތަކުގައި ދުނިޔޭގެ އެކި ކަންކޮޅުތަކުގައި ދައްކާލުމަށް ވަނީ ހަމަޖެހިފަ އެވެ.
ސޮދަބީޒް ޔޫރަޕްގެ ޗެއާމަން ހެލީނާ ނިއުމަން ވިދާޅުވި ގޮތުގައި، މިއީ މިހާތަނަށް ނީލަމަކަށް ހުށަހެޅޭ އެންމެ އަގުބޮޑު އެއް ކަލެކްޝަނެވެ. އަދި ސެޒާން އާއި ވެން ގޯގެ ކުރެހުންތަކުން ރެކޯޑް އަގުތަކެއް ލިބޭނެ ކަމަށް އުންމީދު ކުރައްވާ ކަމަށް ވެސް އޭނާ ވިދާޅުވި އެވެ.
