އިނގިރޭސި އަމީރު ހެރީ އާއި އަނބިކަނބަލުން މޭގަން މާކަލްގެ ދަރިކަލުން އާޗީ އާއި ދަރިކަނބަލުން ލިލިބެޓް ކިޔަވަމުންދާ ސްކޫލުގެ ގޯތިތެރެއަށް ބޭރުގެ ފޮޓޯގްރަފަރަކު ވަންނަން އުޅެ، ފާރަލާފައިވާތީ އެއީ "އިންތިހާއަށް ފަރުވާކުޑަ" އަމަލެއް ކަމަށް ބުނެ އެ ފޮޓޯގްރަފަރަށް ބޮޑެތި ތުހުމަތުތަކެއް ކޮށްފި އެވެ.
ބުރަކަށީގައި ދަބަސް އަޅުވައިގެން ތިބި ދެ ފިރިހެނަކު އެ ސްކޫލުގެ ވަށައިގެން ހިނގަމުންދަނިކޮށް ފެނިފައިވާއިރު، ފުލުހުން ފަހުން ކަށަވަރުކޮށްދީފައިވާ ގޮތުގައި އޭގެ ތެރެއިން އެކަކީ ބައިނަލްއަގުވާމީ ނޫސް އޭޖެންސީއެއްގައި މަސައްކަތްކުރާ ފޮޓޯގްރަފަރެކެވެ.
ހެރީ އާއި މޭގަންގެ ތަރުޖަމާނު ވިދާޅުވީ، މިއީ ކުޑަކުދިންގެ އަމިއްލަ މިނިވަންކަމާއި ސިއްރުތަކުގެ ތެރެއަށް ވަދެގަތުން ކަމަށާއި، މިއީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށެވެ.
ކެލިފޯނިއާގައި ހަ އަހަރު ދުވަހު ދިރިއުޅުމަށް ފަހު، ހެރީ އާއި މޭގަން އަދި އެ ދެމަފިރިންގެ ދަރިން އިނގިރޭސިވިލާތަށް އެނބުރި އައީ މިދިޔަ މަހުގެ ތެރޭގަ އެވެ.
މިދިޔަ ހޯމަ ދުވަހުގެ ހެނދުނުގެ ވަގުތެއްގައި އެ ދެ މީހުން ސްކޫލުގެ އެކި ސަރަހައްދުތަކަށް މަޑުކޮށް، ސްކޫލުގެ ގޯތިތެރެއަށް ބަލަމުންދިޔަ މަންޒަރު ޕްރައިވެޓް ސެކިއުރިޓީންނާއި ސްކޫލުގެ މުވައްޒަފުންނަށް ވަނީ ފެނިފަ އެވެ. އެ މީހުން އެތަނުން ދިޔައީ ވޭންއަކަށް އަރައިގެން ކަމަށާއި، އެއީ ކުއްޔަށް ހިފާފައިވާ އުޅަނދެއްކަން ފުލުހުން ފަހުން ވަނީ ކަށަވަރުކޮށްދީފަ އެވެ.
އޭގެ ތެރެއިން އެކަކީ ޔޫރަޕްގެ ނޫސް އޭޖެންސީއެއްގައި މަސައްކަތްކުރާ ފޮޓޯގްރަފަރެއްކަން ފަހުން ވަނީ އެނގިފަ އެވެ.
އެ ދެމަފިރިންގެ ދަރިން ސެޕްޓެމްބަރު މަހުގެ ކުރީކޮޅު އިނގިރޭސިވިލާތުގެ ސްކޫލަކަށް ކިޔަވަން ދާން ފެށި ނަމަވެސް، ސްކޫލަށް ދާ ވަގުތުތަކުގައި ދިމާވާ ޓްރެފިކް މައްސަލަތަކާ ގުޅިގެން ސެކިއުރިޓީއަށް ނުރައްކާވެދާނެތީ، މަދު ދުވަސްކޮޅެއްގެ ތެރޭގައި ވަނީ ސްކޫލް ބަދަލުކޮށްފަ އެވެ.
